Yadda Ake Abincin Hausawa Na Garau-Garau (Wasa-Wasa)

Gabatarwa

Abincin garau-garau, abinci ne da za a iya dafa shi ba tare da an tuƙa shi ba, kuma za a iya cin garau-garau haka nan ba tare da miya ba. Sannan akan iya cin sa da wani abu daban ba da miya ba, kamar manja ko mangyaɗa. Garau-garau ba sabon abinci ba ne a ƙasar Hausa, yana cikin nau’in abincin da aka gada tun iyaye da kakanni. Sai dai a yau, akan samu nau’o’in garau-garau da zamani ya zo da su waɗanda suka bambanta da waɗanda aka saba da su.

Kashe-Kashen Garau-Garau (Wasa-Wasa)

Kamar yadda nau’o’in abincin da aka lissafo a baya rukunan su ya kasu iri daban-daban, shi ma wannan nau’in abinci za a iya raba shi zuwa wasu rukunai ta hanyar la’akari da kayan haɗi da kuma yadda ake sarrafa shi. Ga wasu daga ciki kamar haka:

Wasa-Wasar Dawa

i. Barkono       

ii. Dawa         

iii. Gishiri

iv. Mai             

v. Ruwa

Dawa za a surfe sosai, sai a wanke ta sannan a bar ta ta tsane. Idan ta tsane, za a ɗora tukunya saman wuta a zuba ruwa a cikinta. Bayan ruwa ya tafasa sai a ɗauko dawar a zuba a ciki, sannan a sanya gishiri a ci gaba da dafuwa. Idan ta dafu, za a sauƙe tukunyar ta ɗan huce, sai a riƙa ɗiba ana ci da mai da yaji kamar yadda ake cin shinkafa.

Wasa-Wasar Shinkafa

i. Barkono       

ii. Gishir          

iii. Mai

iv. Ruwa         

v. Shinkafa

Da farko, za a gyara shinkafar a wanke ta, sannan a aza tukunya da ruwa bisa wuta. Bayan ruwan ya tafasa, sai a zuba wannan shinkafar a ciki tare da ɗan gishiri daidai gwargwado. Bayan shinkafar ta dafu akan ci ta da mai da yaji ko kuma da miya idan da hali.

Wasa-Wasar Gero

i. Barkono       

ii. Gero            

iii. Gishiri

iv. Mai            

v. Ruwa

Yadda ake yin wasa-wasar dawa haka ake ta gero. Bambancin kawai shi ne, a nan ana amfani da gero ne a maimakon dawa.

Wasa-Wasar Dambu

i. Mai                           

ii. Ɓarzazziyar Masara ko Shinkafa

iii. Ruwa                     

iv. Yaji

Akan dafa dambun masara ko na shinkafa haka nan ba tare da an saka masa komai ba. Akan yi wannan dafuwa ne ta hanyar turara shi a madanbaci. Idan an tabbatar da ya yi yadda ake so sai a kwashe shi. Za a iya cin sa da mai da gishiri da Barkono (tonka). Haka kuma, shi ma za a iya saka ganye da ƙuli-ƙuli a yi kwaɗo da shi, kuma za a iya saka masa miya idan ana buƙata a ci da shi.

Wasa-Wasar Burabusko

i. Barkono       

ii. Burabusko (Ɓarzazziyar masara) 

iii. Gishsiri

iv. Mai             

v. Ruwa

Shi ma wannan nau’in dambu akan yi shi ne kamar yadda aka yi bayanin sauran da ke sama. Akan yi shi da ɓarzazziyar masara. Bayan ya kammala, akan sanya masa mai da yaji domin a ci. Wani lokaci akan ci da miya.

Wasa-Wasar Wake

i. Barkono       

ii. Gishiri         

iii. Kanwa

iv. Mai             

v. Ruwa          

vi. Wake

Ita ma wasa-wasar wake duk lokacin da aka buƙaci yin ta ana wanke waken ne sannan a tsince wanda ba shi da kyau. Idan ruwan da aka ɗora a saman wuta ya tafasa, sai a zuba shi a saka ’yar kanwa da gishiri a ciki, sai kuma a saurara har sai ya dafu sosai. Akan ci da mai da yaji, ko kuma a sanya miya idan da hali.

Kammalawa

Nau’in abincin wasa-wasa, abinci ne mai sauƙin dafuwa ba tare da an saka kayayakin lambu a wajen dafuwa ko cinsa ba. Duk da haka, akan samu waɗanda ke amfani da kayan lambun yayin cin wasa-wasa. Mafi yawanci abinci ne da ake cin sa da mai da yaji. Wani lokaci kuwa akan sanya miya, musamman a zamanin yau.

Citation (Manazartar Littafin): Sani, A-U. & Umar, H.A. (2022). Cimakar Hausawa. Kano: WT Press. ISBN: 978-978-984-562-9.

Get a copy:

To obtain a copy of this book, kindly send a WhatsApp message to:

+2348133529736

You can also write an email to:

abuubaidasani5@gmail.com