Miyar Gauta Ko Data Ko Dwata

Gauta ɗaya ne daga cikin ’ya’yan tsiro da ake samu a ƙasar Hausa. Ƙanana ne masu siffar attaruhu. Sai dai a maimakon zafi da attaruhu ke da shi, gautaytana da ɗanɗano ne mai ɗaci-ɗaci. Baya ga haka, akwai nau’in gauta da ke da matsakaicin girma. Irin waɗannan ba su fiye ɗanɗanon ɗaci ba, sai dai ɗanɗano main zaƙi-zaƙi kaɗan.

Mahaɗin Miyar Gauta (Ɗwata)

Akwai abubbuwan da za a tanada, idan za a haɗa miyar ɗwata.

i. Albasa         

ii. Daddawa   

iii. Gishiri        

iv. Kayan yaji

v. Mai              

vi. Ruwa        

vii. Tarugu      

viii. Tattasai

ix. Wake          

x. Ɗwata

Yadda Ake Miyar Gauta (Ɗwata)

Ita ma miyar gauta idan za a yi ta, akan jajjaga tattasai da tarugu da albasa a daka kayan yaji da daddawa da tafarnuwa. Bayan haka, sai a surfe wake a kuma wanke sannan a aje gefe. Daga nan za a soya jajjage tare da mai. Idan ya soyu, sai a saka daddawa a zuba wake a ciki, sannan a ɗan ƙara soyawa kaɗan. Bayan sun soyu tsaf, sai a saka gishiri a zuba ruwa, wato dai a yi sanwa. Daga zarar sanwa ta tafasa, za a matso da gautan da aka riga aka yanka sannan aka wanke.[1] Yayin da miyar gauta ta dafu takan warwatse ne tamkar guro. Abin da ya rage shi ne saka maburkaki a kaɗa, sai kuma sauke tukunya. Kusan akan ci miyar gauta da kowane irin tuwo.

Tsokaci 

Mutanen Burma suna daga cikin masu yawaita amfani da wannan nau’in miya. Sannan yawanci mata sun fi maza shan miyar gauta. Wannan bai rasa nasaba da tasirin da miyar take da shi wajen ƙara wa mai jego ruwan nono. A dalilin haka ne ma ake nuna buƙatar yin amfani da wannan miya ga mai jego, musamman ga yankunan da ake amfani da miyar sosai. Yara ba su fiye son wannan nau’in miyar ba, wanda hakan na faruwa ne a dalilin ɗan ɗaci-ɗaci da kuma bauri-bauri da take tattare da shi. Daga cikin garuruwan Hausawa da suke amfani da ita sosai akwai, Kano da Zazzau da Niger da Katsina da Zamfara da kuma Kabi da sauransu.

---

[1] Wani lokaci akan sanya gautar ba tare da an yanka ba. A irin waɗannan lokuta, da kansa gautan yake warwatsewa a cikin miyar. 

Citation: Sani, A-U. & Umar, H.A. (2022). Cimakar Hausawa. Kano: WT Press. ISBN: 978-978-984-562-9.

Get a copy:

To obtain a copy of this book, kindly send a WhatsApp message to:

+2348133529736

You can also write an email to:

abuubaidasani5@gmail.com