Faten Doya Da Faten Dankalin Turawa Da Faten Makani

Faten Dankalin Turawa

i. Albasa mai ganye

ii. Dankalin Turawa (Airish)

iii. Gishiri

iv. Kayan yaji

v. Magi

vi. Mai

vii. Ruwa

viii. Tarugu

ix. Tattasai

A fere dankali, a yanka shi, sannan a wanke a ajiye a zuba mai a tukunya a soya jajjagen tarugu da tattasai da albasa. Idan sun soyu, za a zuba kayan yaji a ciki a saka magi da gishiri da kori. Daga nan sanwa in ta tafasa, sai a zuba dankalin Turawa a ɗan ƙara ruwa a yanka albasa tare da lawashin albasa. Akan ba shi lokaci mai ɗan dama idan ya yi, sai sauƙewa.

Faten Doya

i. Albasa

ii. Doya

iii. Gishiri

iv. Kayan ciki

v. Kayan yaji

vi. Magi

vii. Mai

viii. Ruwa

ix. Tarugu

x. Tattasai

xi. Zogale

Za a fere doya kamar yadda aka fere dankali, sai a wanke a aje gefe guda. Sannan za a tafasa kayan ciki tare da albasa da ɗan gishiri kaɗan, amma ba tare da an sanya ruwa ba. Daga nan za a jajjaga tarugu da albasa da tattasai a saka mai a soya. Idan ya soyu, za a saka kayan yaji da magi da gishiri a yi sanwa. Idan sanwa ta ɗauki lokaci sosai za a ɗauko doya a saka tare da wanke zogale da gishiri kafin a saka. Idan ta ɗan jima, za a ɗauko muciya a ɗan daddaga sama-sama a warwatse doya sai a ɗauko kayan ciki a saka a ciki. Idan ta ɗan ƙara dafuwa za a sauke, sai rabo.

Faten Makani

i. Albasa

ii. Gishiri

iii. Kayan yaji

 iv. Magi

 v. Mai

vi. Makani(gwaza)

vii. Ruwa

viii. Tarugu

 ix. Tattasai

Za a fere makani a aje gefe guda, sai kuma a jajjaga kayan miya a soya su a saka magi da gishiri da kayan ƙamshi a yi sanwa. Idan ta tafasa, sai a zuba makani a saka muciya a farfasa kamar yadda aka yi wa doya. Sai a sauke tukunya. 

Citation (Manazartar Littafin): Sani, A-U. & Umar, H.A. (2022). Cimakar Hausawa. Kano: WT Press. ISBN: 978-978-984-562-9.

Get a copy:

To obtain a copy of this book, kindly send a WhatsApp message to:

+2348133529736

You can also write an email to:

abuubaidasani5@gmail.com