Hammad

1.

Na gode Sarki Allah

Mai Arziki da Jalala

Shi ɗai ya ke da Kamala

  Kuma shi mu ke ma bauta.

2.

Na gai da Manzon nasa

Mahmudu baƙon Aƙsa

Angon Khadija da Hafsa

   Baban su Fatima Binta.

3.

Ga 'yar ƙasida na yi

Manya da su nai koyi

Domin nishaɗi nai yi

   Dangi ku zo ku karanta.

4.

Na jera baiti-baiti

Tamkar gini da siminti

Kuma na aje su a saiti

   Su goma 'yan matsakaita.

5.

Hammadu yaron Umma

Gaishe ka sannu da himma

Ga ɗan da ya wuce goma

  Gun hankali da nagarta.

6.

Hammadu yaron Abba

Wai kai da shi kas saba

Muddin idan ka duba

   Ka gan shi, rai ya faranta.

7.

Kai duniya mai sauri

Jiya nan ka ke jariri

Amma kamar ɗan shuri

   Ka girma sai makaranta.

8.

Hammadu na gaisheka

Na tabbatar ba shakka

In dai ka jure shuka

  Girbinka za ya yawaita.

9.

Gaishe ka yaron kirki

Na san fa ba ka raki

Sannunka sannu da aiki

  Hammadu ɗan makaranta.

10.

Roƙo ga Al-Mannanu

Allahu Ar-Rahmanu

Ya sa ma ɗan nan hannu

   Don rayuwa ta rabauta.

Mustafa Adamu

18.11.2023