Hukuncin Tazarar Haihuwa (Family Planning)

𝐓𝐀𝐌𝐁𝐀𝐘𝐀❓

Shin ko akwai dalilai na shariah da suke halatta mace ta juyar da mahaifarta ko kuma ta samu tazarar haihuwa?

𝐀𝐌𝐒𝐀❗️

 To ɗan'uwa amfani da abin da zai kayyade iyali, ya kasu kashi biyu:

1. Ya zama zai hana ɗaukar cikin kwata-kwata, a nan bai halatta ba, saboda ya saɓawa manufar shari'a na yawaita al’uma, kuma ‘ya’yan da take da su za su iya mutuwa sai ta koma mai wabi.

2. ya zama an tsayar da shi ne na dan wani lokaci, kamar mace ta zama tana yawan haihuwa kuma cikin yana wahalar da ita, sai ta yi nufin ta tsara haihuwarta ta yadda za ta haihu duk bayan shekara biyu ko makamancin haka, to wannan ya halatta in dai miji ya bada izini kuma ba zai cutar da matar ba, dalili akan haka shi ne sahabbai sun kasance suna AZALU a zamanin Annabi Sallallahu Alaihi Wasallam don kar matansu su ɗauki ciki, kuma ba’a hana su ba, kamar yadda Bukari ya rawaito daga hadisin Jabir mai lamba ta: 4911.

Abin da ake nufi da AZALU shi ne idan namiji yana saduwa da matarsa idan ya ji maniyyi zai fito sai ya fitar da azza karinsa ya zubar da maniyyin a wajen farji.

Duba Dima'uddabi'iyya na Ibnu Uthaimin shafi na 57.

Sannan kuma an haramta: VASECTOMY wato kashewa 'ya'yan maniyyin namiji. Idan aka yi ma namiji irin wannan aikin, to zai iya yin Jima'i amma har abada ba zai haihu ba.

TUBECTOMY shima haramun ne. (Daurewa bakin mahaifar mace, ta yadda Ƙoyin halitta ba zai samu damar shiga ba). Idan aka yiwa mace irin wannan aikin, to har abada ba za ta sake haihuwa ba. Domin kuwa Ƙwan halitta ba zai samu damar shiga ba, ballantana har maniyyi ya yi fertilizing ɗinsa.

Ba'ayi sai dai idan matar ta kasance anyi mata operation sau da dama, kuma likitoci sun bada tabbacin cewar ba za ta iya rayuwa ba idan aka sake yi mata wani operation ɗin.

Hakanan irin allurar da ake yiwa mata domin kashewa Ƙoyin halittar ɗan adam (gaba ɗaya) daga cikin mahaifarsu. Itama haramun ce.

Abinda ya kamata kayi, in har matarka tana da larurar da addini ya amince ayi family planning saboda ita, sai kaje ka tuntubi kwararren likita, musulmi wanda kuma yake da fahimta irinta addini domin ku tattauna, ya baka shawarar da ta dace.

Amma kafin nan ya kamata ka san cewar duk waɗannan kwayoyin da alluran tsarin iyali ɗin, suna da mummunan SIDE EFFECT ga ita matar taka. Musamman ma idan tsufa yazo.

Babu mamaki ta samu mental problem (hauka) ko mummunar mantuwa. Ko shanyewar jiki, ko kuma jijjigar gaɓoɓin jiki. Ko kuma sankarar mahaifa, ko cancer acikin bladder ɗinta.

*** ***

HUKUNCIN FAMILY PLANNING (TAZARAR HAIHUWA)

𝐓𝐀𝐌𝐁𝐀𝐘𝐀❓

Aslm malam barka da dare, malam mene ne hukunci mace mai yin family planning? shin akwai laifi yinsa ko ya halarta?

𝐀𝐌𝐒𝐀❗️

Wa'alaikumusalam warahmatallahi wabarakatuh.

Hakika malamai sun yi saɓani akan halaccin yin family planning sai dai an samu hadisai da suka nuna amincewar Annab (Sallallahu Alaihi Wasallam) ga sahabbansa akan su yi AZALU wato zubar da maniyyi yayin saduwa ba tare da ya shiga jikin mace ba. Ko shakka babu wannan ma family planning ne, sai dai inda malamai sukayi saɓani shi yin family planning ta hanyar shan magani, duk da wannan saɓanin wasu suna ba da uzuri idan mahaifiyar na yawan ɗaukar ciki musamman waɗanda suke ɗaukar ciki sau biyu a shekara kuma wannan yakan haifar da rashin lafiyar yayanta. Rashin ingantacciyar lafiyar mahaifiyar, idan yakasance sai an yi operation a kowane haihuwa. wannan wasu suna ga yana zama uzuri macen ta yi family planning domin samun koshin Lafiyar ta da yayanta.

Amma wadanda suke yin family planning domin kauracewa haihuwa na har abada, tsoron talauci, kwaikwayon yahudawa, tsoron karyewar tattalin arziki, to anan malamai sun ce baya halatta ayi family planning akan waɗannan dalilan.

Yin Family planning ba shi daga cikin manufar aure a musulunci, hakika bayan haramcin yinsa haka kuma yana tattare da Matsalolin masu dinbin yawa.

Allah ya faɗa a cikin Alƙur'ani Cewa, “Kada ku kashe ‘ya’yanku don tsoron talauci, Mu muke azurta ku ku da ‘ya’yan naku.”

Yahudawa maƙiya addinin Allah ne suka kawo mana shi domin su rage yawan mu. Kuma duk wanda ya ke bincike ya san ƙasashen da suke zuga mu da mu yi Family Planing su ba sa yi.

Lalle yana daga cikin ni’imar Allah ga Ɗan Adam da Ya ba shi ni’imar ‘ya’ya, duk wanda ya yi aure bai samu ɗa ba, to baya cikin kwanciyar hankali.

Abin da zai ƙara nuna mana mahimmancin ‘ya‘ya shi ne yadda Manzon Allah (Sallallahu Alaihi Wasallam) ya yi wa Anas bin Malik (RA) addu’ar Allah ya ba shi yawan ‘ya‘ya, Allah ya amsa addu’arsa ya ba shi ‘ya‘ya ɗari da ashirin da biyar (125). Lalle wannan kaɗai abin yiwa nazarine.

Idan muka koma gun Manufar aure ita ce domin a hayayyafa yadda manzon Allah (Sallallahu Alaihi Wasallam) zai yi alfahari da yawan mu ranar kiyama kamar yadda ya zo a hadisi Cewa, Wani mutumi ya zo wajen manzon Allah (Sallallahu Alaihi Wasallam) ya ce, “Ya RasulalLah na sami mata kyakkyawa ‘yar dangi amma ba ta haihuwa. Sai ya hana shi auren ta.

Ya ƙara dawowa karo na biyu ya ƙara maimaita maganar auren ta, amma Manzon Allah (Sallallahu Alaihi Wasallam) ya hana shi. Ya ƙara zuwa a karo na uku sai Manzon Allah (Sallallahu Alaihi Wasallam) ya ce masa, “KU AURI WAƊANDA KUKE SON SU, SUKE SON KU (wadanda suka iya soyayya) MASU HAIHUWA DOMIN IN YI ALFAHARI DA YAWANKU A RANAR TASHIN ALƘIYAMA”.

Musulunci addini ne mai tausayi da jinkai hakika Malaman musulunci sun yi ƙiyasi (yarda) akan tsarin iyali, amma da sharadi;

1. Na Farko, Ya zamana Mahaifiyar ba ta samun isasshen lokacin da za ta shayarda jaririnta.

2. Na Biyu, Ya Zamana Mahaifiyar na shan wahala wajen haihuwa, anan an yarda ta tsaya ta huta.

Hakika ajiye haihuwa don tsoron talauci Haramun ne, Domin Allah (swt) yana Cewa, "KADA KU KASHE 'YA'YANKU DON TSORON TALAUCI, MU MUKE AZURTA KU, KU DA 'YA'YAN NAKU".

Wasu sukan ajiye Haihuwa wai don a samu isasshen lokacin tarbiyantar da yara, hakika shi ma wannan ya Saɓawa koyarwar Manzon Allah (Sallallahu Alaihi Wasallam). Domin Sayyidina Anas bin Malik (RA) ya shekara ɗari da hamsin (150) a duniya, saboda dadewa har sai da ya makance. Yana cikin makantar tasa ne ya kira babbar ‘yarsa mai suna Umainatu ya tambaye ta yawan ‘ya’yansa. Sai ta ce sai an ƙirga. Da aka ƙirga ne aka samu ɗari da ashirin da biyar (125) kuma duk sun hardace Ƙur’ani.

Shin idan yawan 'ya'ya na saka a kasa tarbiyantar da 'ya'ya ya Sayyidina Anas ya yi da 'ya 'ya har guda ɗari da ashirin da biyar (125) kuma duk mahardata ƙur'ani? Babu shakka wannan kalubalene ga iyayen mu masu wannan rubabbar dabara.

WALLAHU A'ALAM.

Zauren Fatawoyi Bisa Alkur'ani Da Sunnah. Ku kasance Damu...

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

𝐓𝐄𝐋𝐄𝐆𝐑𝐀𝐌👇

https://t.me/TambayoyiDaAmsoshi

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.