7.31 Lasko
Wannan ma wasa ne na yara maza da mata. Ba ya tafiya da waƙa, sannan babu wani takamaiman lokaci ko wurin da aka ware na gudanar da wannan wasa. Ba a kuma buƙatar kayan aiki yayin gudanar da shi.
7.31.1 Yadda Ake Wasa
An fi gudanar da wasan lasko yayin da ƙawaye ko abokai suka haɗu a hanya. Ko kuma bayan an kamala wasa za a watse, ko yayin da wani ko wata ya kawo ziyara gidan aboki ko ƙawa. Yadda ake lasko kuwa shi ne; yayin da aka zo rabuwa, mai yin lasko zai ɗira wa abokin wasan dundu ko duka. Sannan zai ce:
“Lasko! Ranar aurenka ka rama.”
Idan mace ce kuwa za ta ce:
“Lasko! Ranar aurenki ki rama.”
Daga nan sai wanda ya yi lasko ya gudu. Dolen wanda aka yi wa lasko ya haƙura. Shi ma zai riƙe abin a zuciya, har sai ranar da ya faki wanda ya masa lasko, shi ma ya rama ya gudu.
7.31.2 Tsokaci
Wannan wasa na samar da nishaɗi ga yara. Wanda ya yi lasko da wanda aka yi wa lasko duka babu mai ɓata rai. Domin sun ɗauki wannan duka wasa. Duk da cewa, wani lokaci har akan samu wadda aka yi wa lasko ya yi ƙwalla ko ta yi ƙwalla. Sannan wasan na koya jarumta da juriya. Musamman kasancewar abin kunya ne mutum ya yi kuka ko nuna raki yayin da aka masa lasko.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
0 Comments
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.