7.27 Hajijiya
Wannan ma wasa ne da yara maza da mata suka yi tarayya wurin gudanarwa. Mutum guda ma yakan iya wannan wasa shi kaɗai. Amma akan samu yara sun taru wuri guda domin gudanar da shi. Akan gauraya wasan da waƙa a wasu lokuta. Sannan yana cikin rukunin wasannin tsaye waɗanda ba su buƙatar kayan aiki. Akan gudanar da wannan wasa a cikin gida ko dandali. Zai iya kasancewa da hantsi ko da yamma ko ma da dare, musamman lokacin farin wata.
7.27.1 Yadda Ake Wasa
Masu hajijiya za su ware hannayensu yayin da suke tsaye. Za kuma su ba da tazara a tsakanin juna gudun kada wani ya buge abokin wasansa, ko kuma ya faɗa kansa. Daga nan za su riƙa juyawa da ƙarfi tamkar fanka. A wasu lokuta sukan haɗa da waƙa kamar haka:
Hajijiya-hajijiya kama ni,
Hajijiya-hajijiya kama ni.
Haka za su ci gaba da yi har lokacin da ƙarfinsu ya ƙare ko kuma jiri ya ɗebe su. Wasu sukan faɗi. Wasu kuwa sukan kama tangaɗi cikin jiri tamkar masu maye. Jarumi a wannan wasa shi ne wanda kowa ya faɗi ya bar shi nan tsaye yana ci gaba da hajijiya.
7.27.2 Tsokaci
Wannan wasa yana samar da nishaɗi a tsakanin yara. Sannan hanya ce ta motsa jiki gare su. Sukan kuma gwada jarumta da juriya yayin gudanar da wasan.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
0 Comments
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.