6.100 To Iya
Wannan ma wasan tashe ne na yara mata. Sukan gudanar da shi da dare bayan an sha ruwa a watan azumi. Sannan sukan bi gida-gida ne domin gudanar da wasan. Yana kuma buƙatar kayan aiki yayin gudanar da shi. Kimanin yara biyar ne zuwa sama suke gudanar da wannan wasa. Daga cikinsu akwai mai fitowa a matsayin uwa, da kuma ake kiranta iya. Sai kuma sauran ‘yan wasa da suke kasancewa a matsayin ‘ya’yanta.
6.100.1 Kayan Aiki
i. Tabarma ko tabarmi
ii. Filo/matashin kai
iii. Kwanoni da wasu shirgi
iv. Zane ko kallabi babba da ake amfani da shi wurin ɗaure faggon kayan
6.100.2 Yadda Ake Wasa
Yara sukan nemi tabarma da filo/matashin kai da wasu tarkace kamar kwanoni da makamantansu. za su ka su nemi zane ko babban kallabi su ɗaure su wuri ɗaya. Daga nan yaran za su ɗunguma wurin tashe. Ɗaya daga cikinsu, wadda ta fi su girma a mafiyawan lokuta, za ta kasance uwarsu a cikin wasan. Sauran kuwa duka ‘ya’yanta ne. Saboda haka za su riƙa kiran ta da iya ita kuwa za ta kira su da ‘ya’yana.
Yayin da suka isa wurin da za su yi tashe, yara za su aje faggon da suka taho da shi. Sai kuma iya ta fara faman tattare-tattare tamkar dai wadda take faman haɗe kayanta wuri ɗaya domin tafiya wani wuri. Za ta riƙa yi tana waƙa. ‘ya’yan nata kuwa za su riƙa amsawa. Ga yadda waƙar take:
Iya: Ku zo ku zo ‘ya’yana,
‘Ya’ya: To iya.
Iya: Ubanku ya koro ni,
‘Ya’ya: To iya.
Iya: Saboda babbar loma,
‘Ya’ya: To iya.
Haka za su ci gaba da wannan waƙa. Yayin da ta kamala tarkata faggonta, za ta kinkime su. Sannan za ta ci gaba da kaɗa kan ‘ya’yan da nufin su tafi. Wato dai tamkar wadda mijinta ya kora da gaske.
6.100.3 Tsokaci
Wannan wasa na samar da nishaɗi ga masu gudanarwa da kuma musamman masu kallo. Sannan akwai ɓirɓishin nuna wani yanayi da aure kan shiga, a ƙasar Hausa. Wato ko dai yaji ko saki. An gina waƙar wasan bisa raha. Lallai riƙon Iya sai hukuma tun da manyan loma har na sa a kore ta.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
.jpeg)
0 Comments
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.