5.41 Dirƙe-Dirƙe
Wannan ma wasan yara maza ne. Yana ɗaya daga cikin jerin wasannin ƙiriniya. Yara da dama sukan yi wannan wasa ne ba tare da sanin iyayensu ba. Wasu yaran sukan sha zagi ko ma duka yayin da aka san sun je wannan wasa a gida. Wasa ne da ba ya ɗauke da waƙa. Sannan ba a buƙatar kayan aiki yayin gudanar da shi.
5.41.1 Wuri Da Lokacin Wasa
i. Ana gudanar da wannan wasa ne a rafi ko kogi wanda ruwansa ya janye, wanda kuma ke da yashi ciki.
ii. Akan gudanar da wannan wasa da hantsi ko da dare.
5.41.2 Yadda Ake Wasa
Yara sukan tafi wurin rafi ko kogin da ruwa ya janye wanda kuma ke da yashi. Daga nan za su samu wani wuri mai ɗan tsawo (daidai da yadda marasa tsoron cikinsu za su iya dirgawa). A wannan wuri ne za su riƙa tsayawa sannan su daka tsalle su tuma cikin yashin. Idan wurin dirgawar yana da faɗi, yara biyu ko sama da haka na riƙe hannun juna sannan su dirga tare.
5.41.3 Tsokaci
Wannan na ɗaya daga cikin wasannin yara maza da suke da ɗunbin kasada tattare da su. Sau da dama yara sukan fasa bakinsu ko su gurɗe (samu targaɗe) ko ma su karye. Wasa ne da ke sanya jarumta da rashin tsoro ga yara. Sannan hanya ce ta motsa jini.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
0 Comments
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.