5.35 ‘Yar Ɗille
Wannan wasa ne na yara maza. An fi gudanar da wannan wasa da damina lokacin da ƙasa take da damshi. Yara biyu ma za su iya wannan wasa a tsakaninsu. Sai dai wasan ya fi daɗi idan an samu kimanin yara uku zuwa sama da hakan (yawansu ba a so ya wuce biyar).
5.35.1 Wuri Da Lokacin Wasa
i. Ana gudanar da wannan wasa a cikin gida, musamman gindin bishiya. Sannan akan gudanar da wasan a ƙofar gida ko dai wani wuri da ake samun taron yara.
ii. Akan gudanar da wannan wasa da hantsi ko da yamma.
5.35.2 Kayan Aiki
i. Ƙaramin dutse (tsakuwa) ko ƙwallon aduwa ko wani abu makamancin wannan
ii. Tsinke mai ɗan kauri
5.35.3 Yadda Ake Wasa
Yara za su toni rami mai ɗan matsakaicin zurfi (ƙarami). Sai kuma kowa ya ja layi daga jikin wannan rami zuwa saitin gabansa. Layin zai kasance an ɗanyi masa gurbi ne. Wato an tona ya ɗan shiga cikin ƙasa kaɗan. Sannan tsawon layin gaban kowa zai kasance daidai da na‘yan’uwansa.
Daga nan kowa zai samo ‘yarsa, wato ɗaya daga cikin abubuwan da aka bayyana ƙarƙashin ‘i’ na 5.35.2. Wani lokaci kuma akan yi amfani da ‘ya guda ɗaya ne. Wanda zagayensa ne a wasa zai aje wannan ‘ya a ƙarshen layi ta gabansa. Sannan zai ɗilla ta da yatsa da niyar ta shiga cikin ramin da aka tona a tsakiya. Idan ya samu nasarar saka ta ciki, zai yi zane a gabansa da tsinke. Yawanci akan ƙayyade tsawon tsanen da mutum zai yi yayin da ya ɗilla‘ ya cikin rami. Zanen kuma yakan kasance jan layi ne.
Yayin da mutum ya faɗi kuma, zai ba wa na gabansa ‘ya don shi ma yayi. Haka yara za su yi ta jan layuka yayin da suka ɗilla ‘ya, har sai sun zana allo a gabansu. Wani lokaci kuma akan zana babban gidan dara na, sannan a masa layuka biyu, daga kusurwa zuwa kusurwa.
5.35.4 Tsokaci
Wannan wasa yana samar da nishaɗi ga yara. Hanya ce da ke sanya musu ƙwarewa wurin saiti da kuma nitsuwa. Domin dole sai da nitsuwa kafin yaro ya iya dilla ‘ya cikin ramin da aka tuna.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
%20Nigeria.png)
0 Comments
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.