5.10 Girmama Ma’auraci

 Citation: Bunguɗu, U.H. (2021). Bara da wasu waƙoƙin bara a ƙasar Hausa. Ahmadu Bello University Press Limited.

Domin samun cikakken littafi, a tuntuɓi:

Dr. Haruna Umar Bunguɗu
(Sarkin Gobir Na Bunguɗu)
Email: harunaumarbungudu@gmail.com
Phone: 08065429369

5.10 Girmama Ma’auraci

Al’adar Bahaushe ce girmama mutum mai aure mace ko namiji. Sau da yawa idan ana yi wa mai sabon aure huɗuba akan lurar da shi yanzu fa ya shigo cikin dattawa. Wannan tunanin ne da ke ga Bahushe na cewa aure shi ne matakin zamowar mutum dattijo kamar yadda hakan ke bayyana a cikin wasu waƙoƙi na mabarata ta hanyar kiran kowace mata da ke gidan aure Inna. Duk wata waƙa ko bara da almajiri zai yi, zai ambaci matar gida da sunan Inna ko da kuwa mai baran ya gimi matar da ke gidan da ake baran. Misali:

 A tumbulo Inna a tumbulo,

 A tumbulo a kawo ma gajere,

 Gajere ba abin reni ne ba.

Da kuma:

 “Ya ta’ala lillahi almajirin bara,

 Inna ina bara kina ƙyale ni, ko ɗanɗanki nit taɓa”.

Duk waɗannan ɗiyan waƙa da aka ambata sama suna nuni ga bayar da girma ga matar da ke da aure wadda ita ce almajri ke zance da ita sadda yake bara ko da kuwa ƙaramar yarinya ce wadda da a kan hanya zai haɗu da ita da ba zai ba ta wannan girma ba. A nan ma wata falsafar zamantakewa ta Bahaushe ta shigo a cikin waƙoƙin na bara.