Ga Ka Farfesa, Ga Ka Katibi Kan Adabi

Daga taskar Farfesa Sa'idu Muhammad Gusau.

GA KA FARFESA, GA KA KATIBI KAN ADABI
(PROF. SA'IDU MUHAMMAD GUSAU)

Jagora: Ga ka Farfesa,

: Sannu Farfesa Sa'idu Ɗan Muhammadu Na Gusau.

 

Jagora: Ga ka Farfesa, Ga ka katibi kan Adabi,

: Sannu Farfesa Sa'idu Ɗan Muhammadu Na Gusau.

 

'Y/amshi: Ga ka Farfesa, Ga ka katibi kan Adabi,

: Sannu Farfesa Sa'idu Ɗan Muhammadu Na Gusau.

 

'Y/amshi: Ehhh! Ga ka Farfesa, Ga ka katibi kan Adabi,

: Sannu Farfesa Sa'idu Ɗan Muhammadu Na Gusau.

 

Jagora: Rabbu na gode da dubun basira da Ka ban,

: Kuma na gode da tulin basira Ka zuban,

: Falalar Allah da Ka ba ni a Watan Sha'aban,

: Ka tsare min ita kar ya zam ta zam tai nusau.

 

'Y/amshi: Ga ka Farfesa, Ga ka katibi kan Adabi,

: Sannu Farfesa Sa'idu Ɗan Muhammadu Na Gusau.

 

Jagora: Gaisuwa gun Mahmudu ɗan ƙabilar Arabi,

: Sayyadil Umma, ga cikamakin gun su Nabi,

: Sayyadil akalaƙi abin a dube shi a bi,

: Nayi tsanina da biyarsa sawu fa gasau.

 

'Y/amshi: Ga ka Farfesa, Ga ka katibi kan Adabi,

: Sannu Farfesa Sa'idu Ɗan Muhammadu Na Gusau.

 

Jagora: Yau akala na karkata na tunkari Gusau,

: Zan yabon masani mutafannunin nan na Gusau,

: Wanda yai harsasai kala-kala yamma yasau,

: A fagen ilmi yau da gobe ya zamma gasau.

 

'Y/amshi: Ga ka Farfesa, Ga ka katibi kan Adabi,

: Sannu Farfesa Sa'idu Ɗan Muhammadu Na Gusau.

 

Jagora: Wani yacce Ala me za ka kallo a Gusau,

: Wa ka ke so ka kwarzaza ka wasa a Gusau,

: In kuɗi anka baka ai Kano ta fi Gusau,

: Ko fagen bunƙasa da yalwata sun fi Gusau.

 

'Y/amshi: Ga ka Farfesa, Ga ka katibi kan Adabi,

: Sannu Farfesa Sa'idu Ɗan Muhammadu Na Gusau.

 

Jagora: Dakata, in ana ƙi gudu ba sa gudu ne,

: Yau da ka ji ana ga maɗi ba mai zuma ne,

: Ba kitabul ra'asi gunsu fesa shaihu ne,

: Ni ganau jiyau na zama a kan Sa'idu Na Gusau.

 

'Y/amshi: Ga ka Farfesa, Ga ka katibi kan Adabi,

: Sannu Farfesa Sa'idu Ɗan Muhammadu Na Gusau.

 

Jagora: Maƙurar Lauya idan ka ce SAN ai haka ne,

: Sanda duk ka ji gangaran gwanin Ƙur'an ne,

: Sanda duk ka ji an taru to fagen yaƙi ne,

: Maƙurar illimin zamani kwa Farfesa a sau.

 

'Y/amshi: Ga ka Farfesa, Ga ka katibi kan Adabi,

: Sannu Farfesa Sa'idu Ɗan Muhammadu Na Gusau.

 

Jagora: Wani Farfesa ne a ɓangaren turanci,

: Wani Daktor ne a ɓangaren larabci,

: Shi kwa mutafannuni a ɓangaren larabci,

: Kuma Farfesa ɓangaren Adab ɗa a Gusau.

 

'Y/amshi: Ga ka Farfesa, Ga ka katibi kan Adabi,

: Sannu Farfesa Sa'idu Ɗan Muhammadu Na Gusau.

 

Jagora: Masanin harshen Hausa Ɗan Muhammadu na Gusau,

: Masanin Lugga Hausa Ɗan Muhammadu na Gusau,

: Manazarci ne katibi da yammaye sau,

: Ya yi fintinkau, a tarar shi za ai ginsau.

 

'Y/amshi: Ga ka Farfesa, Ga ka katibi kan Adabi,

: Sannu Farfesa Sa'idu Ɗan Muhammadu Na Gusau.

 

Jagora: Adabin Hausa na yaba ka Farfesa Gusau,

: Manazarta ma kayi tubali sun ɗau sau,

: Littafan turke ba da barbarar Hausa kasau,

: Har da ta'alifai na saya da dama a Gusau.

 

'Y/amshi: Ga ka Farfesa, Ga ka katibi kan Adabi,

: Sannu Farfesa Sa'idu Ɗan Muhammadu Na Gusau.

 

Jagora: In yana larabci da za a sanya hijabi,

: Sai ka ce masa makkiyu kuma ƙabilar arabi,

: In yana turanci laka ta harshen adabi,

: Sai ka ce Banasare da yai ɓatan kai a Gusau.

 

'Y/amshi: Ga ka Farfesa, Ga ka katibi kan Adabi,

: Sannu Farfesa Sa'idu Ɗan Muhammadu Na Gusau.

 

Jagora: A fagen harshen Hausa gangaran ka fi gwani,

: In yana magana ba gura-gura ƙunƙuni,

: Sai ka ce Maɗari ke zuba da jera tunani,

: Ga azanci ga hikkima a gun ba gimsau.

 

'Y/amshi: Ga ka Farfesa, Ga ka katibi kan Adabi,

: Sannu Farfesa Sa'idu Ɗan Muhammadu Na Gusau.

 

Jagora: Alan waƙa ke yabonka don ka ɗara sau,

: A fagen waƙa kai rubutuka sun fice sau,

: Haka labaran ƙage kai nazar kansu a sau,

: Binciken Ala da yawansu taskarka Gusau.

 

'Y/amshi: Ga ka Farfesa, Ga ka katibi kan Adabi,

: Sannu Farfesa Sa'idu Ɗan Muhammadu Na Gusau.

 

Jagora: Shehu ɗan Shehu, Ɗan Muhammadu ɗan kullum,

: Shehu nai tammi a gurin Gusau ɗan kullum,

: Ɗan'uwan Malam, Shehu Na'ibin ɗan kullum,

: Ɗan'uwan Alƙali na Alƙalan yanzu Gusau.

 

'Y/amshi: Ga ka Farfesa, Ga ka katibi kan Adabi,

: Sannu Farfesa Sa'idu Ɗan Muhammadu na Gusau.

 

Jagora: Na taho murna yau ka ke bikin taka ɗiya,

: A walimar nan ta Sa'adatu taka ɗiya,

: Allah sambarka da zaman lumana amarya,

: A cikin waƙar gangaran na yakinmu tisau.

 

'Y/amshi: Ga ka Farfesa, ga ka katibi kan Adabi,

: Sannu Farfesa Sa'idu Ɗan Muhammadu na Gusau.

 

Jagora: Ga ka Farfesa, ga ka katibi kan Adabi,

: Sannu Farfesa Sa'idu Ɗan Muhammadu na Gusau.

 

'Y/amshi: Ga ka Farfesa, ga ka katibi kan Adabi,

: Sannu Farfesa Sa'idu Ɗan Muhammadu na Gusau.

 

'Y/amshi: Ga ka Farfesa, ga ka katibi kan Adabi,

: Sannu Farfesa Sa'idu Ɗan Muhammadu na Gusau.