Tarken Waƙar Sarkin Musulmi Abubakar Na III Ta Salihu Jankiɗi: Duba Zuwa Ga Mazahabar Tarken Gargajiya

 Wannan takarda ta ƙunshi nazarin Waƙar Sarkin Musulmi Abubakar Na III wanda Salihu Jankiɗi ya rera. An yi amfani da Mazhabar Tarken Gargajiya yayin wannan nazari.

Tarken Waƙar Sarkin Musulmi Abubakar Na III Ta Salihu Jankiɗi: Duba Zuwa Ga Mazahabar Tarken Gargajiya

Idris Abubakar

Gabatarwa

          A wannan takarda da za a gabatar za a yi tarken waƙar Sarkin Musulmi Abubakar na III waƙa mai taken “Abubakar Kashe Gwangwanin Maza” wanda makaɗi Salihu Jankiɗi ya yi. Sannan za a ɗora wannan nazarin ne ta hanyar la’akari da mazahabar Tarken Gargajiya. Ma’ana za a ɗora aikin ne ya zuwa kan manufofin wannan mazahabar ta tarken gargajiya. Amma kafin a shiga nazari kai tsaye, yana da kyau a yi ɗan taƙaitaccen bayani dangane da wannan mazahaba ta tarken gargajiya, domin wannan mazahabar ce za ta na haskaka mana hanya ko ɗora mu a hanya wajen yin wannan tarke/nazarin. Mazahabar Tarken Gargajiya an ƙirƙiro ta ne tun lokacin da aka fara nazari da tarken adabin al’ummomin duniya, har ya zuwa farkon ƙarni na 19 lokacin da sabbin matarka suka kunno kai. Tarken Gargajiya shi ne tarken da ake yi a can baya kafin kafuwar makarantu ko hanyoyin tarke na zamani. Saboda haka, tarken gargajiya ne ya mamaye fannin tarken adabi shekaru da dama da suka wuce. A taƙaice tarken gargajiya na nufin hanyar tarke da ta fi daɗewa kuma da ta liƙe ma karatun adabi, mai duba yanayin ɗan-adam da halayen ƙwarai. Wannan mazahabar ta yaɗu ne a cikin duniyar tarken adabi a wajen ƙarni na 18 da 19 a Turai a ƙasashen Larabawa d.s.

          Wannan mazahabar tana da wasu manufofi da duk mai son yin tarken adabi zuwa ga wannan mazahabar zai yi la’akari da suw ajen yin nazarinsa. Wasu daga manufofinta su ne:

Ø Duba aikin wata fasaha a gargajiyance

Ø Neman bayanin manazarci da tarihinsa da kuma zamaninsa

Ø Bayyana ra’ayi game da aikin adabi, wato game da kyansa, ta amfani da zantukan yabo ko kushe da malamai ke darajanta shi kamar kyau, da dama-dama, ko ba kyau, d.s. (Ɗangambo, 2007:7).

Ø Kawo misalai kaɗan, amma babu cikakkiyar fiɗa ta aikin adabi ko fito da ainihin manufofinsa.

Ø La’akari da salo da nahawu da azanci da jigo da kyakkyawar manufa.

Ø Fito da muhimmancin aikin kansa ko ƙarfin harshen da aka rubuta aikin da shi.

Ø Ba da wasu shawarwari yadda za a bunƙasa aikin idan akwai wata naƙasa da aka gano daga gare shi tare da la’akari da yadda aikin fasaha ke zama kamar wani madubi na haskaka yanayin muhallin ɗan-adam.

Baya ga waɗannan akwai kuma wasu matakan da ake son yin amfani da su wajen tarken adabi a kan tarken gargajiya da ya shafi salon aiwatarwa kamar haka:

-         Shin harshen fayyatacce ne?

-         Shin harshen ya yi dai dai da yadda mai magana da masu sauraro ke ciki?

-         Shin harshen mai sauƙi ne?

-         Shin harshen miƙaƙƙe ne (babu harshen damo)?

A taƙaice waɗannan su ne abubuwan da za su yi min jagora wajen yin wannan tarke na waƙar Sarkin Musulmi Abubakar na III, wanda Salihu Jankiɗi ya yi masa waƙa mai suna “Abubakar Kashe Gwamgwamin Maza”.

Bayanin Tarken Wannan Waƙar

          Wannan mashaba da muka yi bayani a sama tana ɗaukar ra’ayin mutuntakar ɗan-adam. A taƙaice za a iya cewa mazahabar tarken gargajiya babu wata fitacciyar hanya ko rattaɓaɓɓiya da aka tsara kuma ake amfani da ita. Sai dai hanya ce kara-zube dan bayyana ra’ayi game da ingancin adabi (Ɗangambo, 2007:9) & (Gusau, 1992:12). Saboda wannan ne ma wannan mazahabar ta ginu a kan wannan manufa, ta bayyana ra’ayi game da aikin adabi, wato game da kyansa, ta amfani da zantukan yabo ko kushe.

          Don haka a matsayina na mai atrken wannan waƙar mai suna “Abubakar Kashe Gwangwanin Maza” Na Salihu Jankiɗi wanda ya yi wa Sarkin Musulmi Abubakar na III zan yi amfani da zantuttuka na yabo ko kushewa da malamai ke darajanta shi da kalmomi yabo ko akasin haka kamar yadda Ɗangambo (2007) ya kawo na bayyana ra’ayina game da wannanw aƙa na Salihu Jankiɗi ya yi wa Sarkin Musulmi Abubakar na III.

          A taƙaice zantuttuka na yabo da kushewa da malamai suke amfani da su wajen bayyana ra’ayi game da ingancin waƙa ko adabi su ne kamar haka:

-         Ta yi armashi

-         Ta burge ni

-         Ta waƙu                    Kyau mai daraja ta I

-         Ta yi

 

-         Ba laifi

-         Ta yi kyau        Kyau mai daraja ta II

-         Ta gamsar

 

-         Ga ta nan dai

-         Dama-dama

-         Ɗan dama-dama         Kyau mai daraja ta III

-         Ba yabo ba fallasa

 

-         Ai sha’ani

-         Ba ta shige ni ba

-         Ba ta min ba               ba kyau

-         Ba tai kyau ba

A taƙaice waɗannan su ne irin kalmomin da ake amfani da su wajen bayyana ra’ayi game da kyan waƙa ko kushe ta. Don haka a matsayina na mai nazarin wannan waƙa na Salihu Jankiɗi zan iya cewa “Ba ta shige ni ba”. Dalili kuma shi ne tun daga farkon waƙar har zuwa ƙarshe babu wani al’amari da ya taɓo wanda zai nuna halayya ko zamantakewa na ƙwarai a cikin al’umma. Ya ƙare waƙarsa ne ta fuskar yabo kawai. Yana ta fifita sarkin Musulmi Abubakar na III a kan kowanne sarki. Ni a gani na kawai Maula ce yake yi don kansa ba don al’umma su saurara su amfana ba.

          Don haka wannan waƙar kamar yadda na ambata a baya da cewa “Ba ta shige ni ba”. Don haka na hukunta wannan waƙar da “Ba kyau”. Ma’ana ita ce ajin ƙarshe na darajojin da masana suka kawo wajen yanke hukuncin ingancin waƙa. Domin wannan mazahaba ta tarken gargajiya ta ban dama in bayyana ra’ayina game da kyanta ko muninta ta hanyar amfani da kalmomin da na ambata a baya.

          Baya ga wannan, tarken gargajiya yana neman bayanin mawaƙi ko makaɗi game da tarihinsa da kuma zamaninsa. Ga ɗan taƙaitaccen tarihin Salihu Jankiɗi kamar haka:

Taƙaitaccen Tarihin Salihu Jankiɗi

          Sunan mahaifinsa Alhassan, mutumin Sakkwato ne kuma hadimin sarkin Sudan Nagwamatse. Mahaifin Jankiɗi makaɗin kalangu ne, sannan ya yi wa sarkin Sudan Ibrahim waƙoƙi da dama. Mafi yawa daga cikin waƙoƙinsa ya yi masa su ne a fagen yaƙi. Kakansa kuwa shi ne Gi’iye da ake yi wa laƙabi da “Ɗantigari mai abin kiɗa”. Mahaifiyarsa kuma ita ce Hadijatu wadda ake yi wa laƙabi da “Umma Tsohuwa”.

          Tarihi ya nuna an haifi Salihu Jankiɗi a Rawayya ne wanda a halin yanzu take ƙarƙashin hukumar kwatarkwashi a shekarar 1852. Makaɗi Salihu ya sami tarbiyya ta ddini da ilimin Musulunci mai yawa. Hakan ne ma ya ba shi damar sawwara waƙoƙinsa tare da jefa kalamai na Larabci a ciki. Akan yi masa kirari da cewa, “Da safe Malam, da yamma Maroƙi”.

          Salihu shi ne sunansa na yanka, amma ana masa laƙabi da Jankiɗi. An ce ya sami laƙabin Jankiɗi ne a lokacin da ƙanin mahaifiyarsa ya je karɓan jinjirin da aka samu, sai ya lura da jan da Allah ya yi masa sai ya ce “Barakallah wagga ɗa Umma Jankiɗi”. Tun daga wannan lokaci wannan laƙabi ya bi shi.

Ƙuruciyarsa

          Salihu Jankiɗi ya buɗe idansa a Kwantagora a nan ne ya yi rayuwarsa ta ƙuruciya. Ya tashi yana yaro mai ƙarfi da kurari. Jankiɗi ya yi dambe da kokawa da sauran wasu ayyukan samartaka na sha’awa saboda kasancewar Salihu ta tashi cikin yaƙe-yaƙe kafin zuwan Turawan Mulkin Mallaka, duk abubuwan da ya yi na yarinta na nuna ƙarfi da bajinta ne.

Iliminsa

          Salihu kamar yadda aka ambata a baya, ya yi karatun allo inda har ya sauƙe Alƙur-ani mai tsarki, ya kuma karanta wasu daga cikin littatattafan addini kamar ƙawa’idi, ishmawi, ahalari, da kuɗabi, d.s.

Koyo da Fara Waƙa

          Alhassan shi ne ya fara koya masa kiɗa da waƙa inda ya soma kiɗi har ya fara kaɗa kuntakuru wato kanzagi. Daga nan kuma ya shiga cikin yayunsa mata masu amshi. Lokacin masu yi wa mahaifin nasa amshi su ne:

Ø Umma Tsohuwa

Ø Aishatu

Ø Halimatu Bakaba

Ø Salihu Jankiɗi

Sannan kuma yana da yara irin su:

Ø Aishatu

Ø Halima

Ø Bahago

Ø Ajiya d.s.

Sannan yana da mataimaka kamar su:

Ø Makaɗi Ibrahim Ɗankaro

Ø Abdullahi

Ø Musa Ɗangaladiman Labbo

Ø Muhammadu Tambai d.s.

Sannan kuma a wancan lokacin sa’o’insa a waƙa akwai:

Ø Ibrahim Narambaɗa

Ø Ibrahim Gurso Mafara

Ø Buda Ɗan Tanoma Argungu

Ø Aliyu Ɗandawo

Ø Muhammadu Sarkin Taushin Katsina

Bayan rasuwar mahaifinsa ya ci gaba da kiɗan kalangu a garin Kwantagora. A dalilin yaƙe-yaƙe Salihu ya tashi ya kama ƙasar Anka. Daga baya ya koma Bungudu na ɗan wani lokaci daga bisani ya sake komawa Kwantagora. Bayanw ani lokaci kuma sai ya koma gida Rawayya a 1903-1915. Sai Jankiɗi ya koma garin Tsafe har zuwa mulkin ‘Yandoto Abdullahi (1928-1948) ya tashi daga Tsafe ya koma Gusa lokacin mulkin Sarkin Katsina Gusa Muh’d mai akwai.

          Jan-kiɗi ya ji daɗin zaman Gusau inda ya mallaki gida babba da zuriya, akwai inda yake nuna hakan a waƙarsa inda yake cewa:

          Jagora:        Ni Jankiɗi ba ni zuwa ko’ina,

          Y/amshi:     Kwadain ba shi wucewa Gusau

          Bayan da aka fitar da Sarkin Katsina Gusau mai akwai, aka naɗa Shehu ɗan Sama’ila (1943-1945) sai Salihu ya koma wajen Sarkin Musulmi Abubakar na III ya zama shi ne ubangidansa. Sannan aka naɗa Jankiɗin Sarkin Taushin Sarkin Musulmi.

          Salihu Jankiɗi ya yi waƙoƙi da dama a rayuwarsa, kaɗan daga ciki sun haɗa da:

Ø Abubakar Kashe Gwangwanin Maza

Ø Arziƙi ya yi kai as Sarki yau Sunusi ke Mulkin Kano

Ø Mai Katsinawa Dikko Adili

Ø Jafaru bajimi Ɗan Ishiyaku Sarkin Zazzau ya haɗa maza

Ø Mujaddadi ka-ke birni, Muhaddadi kake daji d.s.

Rasuwarsa

          Salihu Jankiɗi ya rasu ranar Juma’a 13 ga watan Oktoba 1973 a lokacin yana da shekara 120 a duniya. Allah ya gafarta masa, amin.

          A taƙaice wannan shi ne taƙaitaccen tarihin Salihu Jankiɗi kamar yadda wannan mazahaba ta tarken gargajiya ta buƙaci mai nazarin da zai ɗora aikinsa a wannan mazahabar dole ya kawo bayanai game da makaɗi.

          Baya ga wannan, mazahabar tarken gargajiya takan kawo misalai kaɗan, amma babu cikakkiyar fiɗa da adabi dangane da manufarsa.

          Dangane da wannan kuma, manazarci zai fito da manufar (wato jigon waƙar) ta hanyar kawo misalai kaɗan kamar yadda aka buƙata, amma babu cikakkiyar fiɗa. A wannan waƙa mai suna “Abubakar Kashe Gwangwanin Maza” na Salihu Jankiɗi. Za a iya cewa manufa/jigon shi ne ZUGA. A wannan waƙa Jankiɗi ya nuna wa jama’a cewa Sarkin Musulmi Abubakar na III fa ya zarce kowa. Don haka kar ma wani ya gwada ja da shi. Za mu tabbatar da haka idan muka dubi waɗannan baitocin kamar haka:

Jagora:        Fitila mai korewar duhu,

                   Sabulu mai wanke dauɗa,

                   Abubakar annurin duniya,

                   Farin ciki ya ƙaru ga kamai,

                             Ya kyautata wa Musulmi hamdala.

‘Yan amshi: Shugabanin sarkin duniya, Abubakar Kashe gwangwanin maza.

          Idan muka dubi waɗannan baitocin za a ga Jankiɗi yana fifita Sarkin Musulmi ta hanyar zuga. Inda ya ƙira shi a matsayin fitila mai kawar da duhu, sannan ya sake cewa shi sabulu ne mai wanke dauɗa, da kuma shi annurin duniya ne. kamar yadda aka sani fitila dai takan sa wuri ya yi haske don haka a nan an samu zuga sosai. Bayan haka an san cewa sabulu shi ke kawar da duk wani dauɗa a nan ma an sami zuga sosai.

          Haka zalika idan muka ƙara duba waɗannan za a tabbatar da cewa Jankiɗi ya koɗa Sarki Musulmi Abubakar na III kamar inda yake cewa:

Jagora:        Suna adawa tare da tsegumi,

                   Mahassada kun kwan da baƙin ciki,

                   Sun sake tsidau ya girma,

                   Abin da Allah ya yi ku hanƙuri,

                             Ku daina tsegumi ku bi gaskiya.

‘Yan amshi: Shugabannin sarkin duniya, Abubakar kashe gwangwanin maza.

          Idan muka duba waɗannan ma, za a ga cewa Jankiɗi mahassadansa su yi haƙuri su daina tsegumi su zo su bi gaskiya. Allah ya riga ya yarda Abubakar ya zarce kowa.

          Ya ƙara wannan zuga inda yake cewa:

Jagora:        Birnin Kano, Daura da Haɗeja,

                   A bi ku ba wata tantama,

                   Katsinawa har da zage-zagi,

                   A bi ku ba wata tantama,

                   Yarabawa har da Nufawa,

                   A bi ku ba wata tantama,

                   Gombe, Katagum har da Bauchi,

                   A bi ku ba wata tantama,

                   Shehun Barno da ba ya ya isa,

                   Sarkin musulmi shi ake son gano,

                   Kowa ya ga Shehu haƙiƙa ya gira,

Amshi:        Shugabannin sarkin duniya, Abubakar kashe gwangwanin maza.

          A wannan wurin ma ya zuga Abubakar inda ya kira garuruwa daban-daban a faɗin ƙasarnan, sannan ya nuna duk mutanen wannan yankin sarkin Musulmi suke son gani.

          Sannan idan muka dubi amshin waƙar kanta zuga ne ta fuskar fifiko inda yake cewa “Shugabannin Sarakin duniya, Abubakar kashe gwangwanin maza”. A nan ya nuna cewa duk faɗin duniya a cikin sarakai babu ya sarkin Musulmi. Wato shi ne ma sarkin sarakuna, sannan ya kira duk wani namiji da gwangwani in ba da sarkin Musulmi Abubakar na III.

          Wannan mazahaba ta tarken gargajiya tana la’akari da salo da nahawu da azancin da aka yi aikin adabi. To a wannan wuri za a yi nazarin salo da nahawu da azancin da suke cikin wannan waƙar na Sarkin Musulmi Abubakar na III.

          Wasu masana na ganin cewa harshen wani mutum shi ne salo. Salo wani abu ne wanda ya shafi wani mutum, wato ya bambanta daga wani zuwa wani. Don haka a wannan nazari nawa zan fito da waɗannan abubuwa na ga wane irin salo ne Jankiɗi ya yi amfani da shi a wanna waƙar, su ne kamar haka:

Ø Miƙaƙƙen salo: Wato salo ne kai tsaye, mai sauƙin ganewa

Ø Salo mai armashi: Shi ne salon da ya gamsar ta hanyar karsashi da burgewa

Ø Ragon salo: Shi ne salo mai kashe jiki kuma marar gamsarwa

Ø Tsoho/sabon salo: amfani da tsofaffin hanyoyi ko sabbi don isar da saƙo

Ø Salo mai sarƙaƙiya ko mai tsauri: Salo ne mai wahalar ganewa. d.s.

Saboda idan muka duba wannan mazahabar tana da wasu fitattun matakan yin tarke kamar haka:

 

i.                   Shin harshen miƙaƙƙe ne? (Babu harshen damo)

Za a iya cewa harshen da Jankiɗi ya yi amfani da shi ba kai tsaye ko mai sauƙin ganewa ba ne. Don haka za a iya cewa salon da ya yi amfani da shi ne, shi ne “Tsaka-tsaki” shi ba mai sauƙi ba ne, sannan shi ba mai wahala ba ne.

ii.                 Shin harshen fayyatacce ne?

Wannan harshe ba fayyatacce ba ne domin karin harshen Lahajojin yamma ya fi yawa a ciki irin su karin harshen Sakkwatanci, Zamfaranci, d.s.

iii.              Shin harshen mai sauƙi ne?

A gaskiya wannan harshen ba mai sauƙi ba ne akwai ƙaƙale a cikinsa.

iv.               Shin harshen ya yi daidai da yadda mai magana da masu sauraro ke fahimta?

A’a, domin ba da daidaitacciyar karin harshe ya yi amfani ba wajen yin wannan waƙar. Akwai kalmomi irin wagga, jegarai, kangarai, d.s.

v.                 Shin harshen mai zaburarwa da motsa rai ne?

A gaskiya a nan salon harshen da ya yi amfani da shi ba mai zaburaswa ba ne. za a iya cewa ya yi amfani da lami/ragon salo wajen isar da saƙonsa.

Bisa waɗannan matakai na yin tarke a wannan mazahabar zan iya dunƙule nazarin salo na wannan waƙar kamar haka:

Ø Zan iya cewa salonsa a wannan waƙa yana da salo na tsaka-tsaki.

Ø Sannan ya yi amfani da tsohon salo a waƙar. Ya yi amfani da kalmomi irin su:

-         Gwangwani

-         Warki

-         Fitila

-         Sabulu

-         Tsegumi

-         Tsidau

-         Rama

Duk a matsayin tsofaffin kalmomi.

          Dangane da nahawun harshe kuwa a wannan waƙa ya yi amfani da gajerun jumloli ne wajen isar da saƙonsa.

          Dangane da azanci kuwa an samu maganganun hikima kamar haka:

-         Fitila mai karewar duhu. A matsayin saye

-         Sabulu mai wanke dauɗa. A matsayin karin magana

-         Baƙauye babu lissafi. A matsayin baƙar magana

Sannan Jankiɗi ya fito da ƙarfin harshen Hausa a wannan aiki inda ya kawo karorin harshen Hausa a fakaice a waƙarsa kamar:

          Kananci, Dauranci, Haɗejiyanci, Katsinanci, Zazzaganci, Guddiranci, da Bausanci, d.s.

          Sannan dangane da ba da wasu shawarwari da wannan mazahaba ta nemi manazarci ya bayar ta yadda za a bunƙasa aikin idan akwai wata naƙasa da aka gano a gare shi.

          A matsayina na ɗalibi mai nazarin wannan waƙar na gano wasu naƙasoshi da dama dangane da yadda za a bunƙasa aiki. Su ne kamar haka:

-         Mawaƙin ya rinƙa amfani da salo na kai tsaye, mai sauƙin ganewa muddin ba zai amfani da daidaitaccen karin harshe ba.

-         Sannan mawaƙi a halin yanzu su daina amfani da tsofaffin kalmomi a waƙarsu domin shi ilmi a kullum yana tafiya ne da zamani.

-         Sannan mawaƙi in zai yi waƙa ya daina amfani da salon yarinta muddin saƙon da yake son isar wa ba a yara ƙanana ba ne.

A taƙaice waɗannan su ne irin shawarwarin da na bayar domin bunƙasa wannan fanni.

 

Manazarta

Ɗangambo, A. (2007) “Ɗaurayar Gadon Feɗe Waƙa”.

Gusau, S.M. (1993). Jagoran Nazarin Waƙar Baka: Kano Benchmark publishers limited.

Zulyadaini, B. & Abba, M. (2000). Nazarin Waƙar Baka Published: Gaskiya Corporation limited, Zaria.

Rataye

Waƙar Abubakar Kashe Gwangwanin Maza Na Salihu Jankiɗi Na Sarkin Musulmi Abubakar III

Jagora:        Shugabannin sarakin duniya, Abubakar Kashe gwangwanin maza

‘yan amshi:  Shugabannin sarakin duniya, Abubakar Kashe gwangwanin maza

Jagora:        Ka yi ba ya wargi ba, ya na Kangara,

                   Irin hali nai sai gagara tauri,

                   Mu je ga gidadin mu lafiya,

                   Irin halin morin buɗar jege rai.

‘yan amshi:  Shugabannin sarakin duniya, Abubakar Kashe gwangwanin maza

Jagora:        Fitila mai korewar duhu,

                   Sabulu mai wanke dauɗa,

                   Abubakar annurin duniya,

                   Farin ciki ya ƙaru ga komai,

                   Ya kyautata wa Musulmi hamdala.

‘yan amshi:  Shugabannin sarakin duniya, Abubakar Kashe gwangwanin maza

Jagora:        Ai idan masara tambutuƙa sai Yamal,

                   Sun sani abokai sarkin Musulmi,

                   Shehu da kansa kai shuka ya isa.

‘yan amshi:  Shugabannin sarakin duniya, Abubakar Kashe gwangwanin maza

Jagora:        Ka yi ba hassan ba karin sai wagga ka faɗa,

                   Ka san mutuncin sarki ya fi,

                   San sakar ruwa da kan shuka sai yau.

‘yan amshi:  Shugabannin sarakin duniya, Abubakar Kashe gwangwanin maza

Jagora:        Suna adawa tare da tsegumi,

                   Mahassada kun kwan da baƙin ciki,

                   Sun sake tsidau ya girma,

                   Abin da Allah ya yi ku hanƙuri,

                   Ku daina tsegumi ku bi gaskiya.

‘yan amshi:  Shugabannin sarakin duniya, Abubakar Kashe gwangwanin maza

Jagora:        Ai san ka ta rama sai ka hankali,

                   Kun san baƙauye ba zai gagarai ba,

                   Sama babu lissafi.

                   Ku gagarai haddasa a yi sarki mandamo.

‘yan amshi:  Shugabannin sarakin duniya, Abubakar Kashe gwangwanin maza

Jagora:        Birnin Kano, Daura da Haɗejiya,

                   Katsinawa har da Zage-zagi.

Amshi:        A bi ku ba wata tantama

Jagora:        Yarabawa har da Nufawa,

                   Gombe, Katagum har da Bauchi

Amshi:        A bi ku ba wata tantama/

Jagora:        Shehun Borno da ba ya isa,

                   An gwada ma da ainihin gaskiya,

                   Duniya har da ta ku tahukunta,

                   Sarkin Musulmi shi ake son gani,

                   Kowa ya ga Shehu haƙiƙan ya gira,

                   Gafara sosai ya tsira (duk ku taso ku shiga aljanna).

‘yan amshi:  Shugabannin sarakin duniya, Abubakar Kashe gwangwanin maza

Jagora:        Shugabannin sarakin duniya, Abubakar Kashe gwangwanin maza

‘yan amshi:  Shugabannin sarakin duniya, Abubakar Kashe gwangwanin maza