Hadisin Da Ke Cewa "Ku Nemi Duniya Kamar Ba Za Ku Mutu Ba, Sannan Ku Nemi Lahira Kamar Za Ku Mutu Gobe"

𝐓𝐀𝐌𝐁𝐀𝐘𝐀❓

Assalamu alaikum, Malam. Ya fama da jama'a?

Na yi maka tambaya a baya, amma har yanzu ban samu amsa ba. Ga wata tambayar kuma, don Allah:

Mene ne hukuncin wanda ya raunana hadisin Annabi (SAW) alhali yana sane da hakan, amma ba da gangan ya yi hakan ba?

Haka kuma, Malam, a wurin malaman ilimin hadisi, mene ne matsayin hadisin da ake cewa: “Ku nemi duniya kamar ba za ku mutu ba, sannan ku nemi Lahira kamar za ku mutu gobe”?

Na gode, Malam. Allah ya saka maka da alheri.

𝐀𝐌𝐒𝐀❗️

Wa alaikumussalam warahmatullahi wabarakatuh.

A fannin ilimin hadisi, akwai banbanci babba tsakanin karyata hadisi (kin yarda dashi) da kuma raunata hadisi (wato bayyana cewa hadisin mai rauni ne / Da'ifi).

• Idan raunatawa kake nufi (Cewa hadisin ba shi da inganci): Idan mutum dalibi ne na ilimi ko masani, ya yi bincike kuma bisa kuskuren fahimta ko rashin zurfi a ilimin hadisi ya fadi cewa wani ingantaccen hadisi mai rauni ne (alhali yana sane da cewa hadisi ne amma bai yi hakan da gangan don wulakanta addini ba), wannan kuskure ne na ilimi, kuma babu zunubi ko laifin kafirci a kansa. Malamai da dama suna yin kuskure a cikin ijtihadi, muddin mutum bai yi da gangan ba don son zuciya ko gaba da Sunnah.

• Idan kuma karyatawa kake nufi (Kin yarda da hadisin gaba ɗaya): Idan mutum ya san cewa hadisi ya tabbata kuma ingantacce ne daga bakin Annabi (Sallallahu Alaihi Wasallam) sannan ya karyata shi da gangan saboda kin amincewa da shari'a, wannan yana fitarwa daga Musulunci. Amma tunda ka ambaci cewa "ba wai da gangan ya yi hakan ba", to hukuncinsa shi ne fadawa cikin kuskure na rashin sani, kuma abin da ake bukata a gare shi shi ne ya gyara kuskurensa bayan an nuna masa gaskiya.

A addinin Musulunci, malami mai ijtihadi idan ya yi daidai yana da lada biyu, idan kuma ya yi kuskure yana da lada ɗaya muddin ya yi iyakar ƙokarinsa. Abin da ake buƙata kawai shi ne idan wasu masana hadisin suka nuna masa kuskurensa da hujjoji, ya janye maganarsa ya gyara.

Idan mutum ba ɗalibin ilimin hadisi ba ne amma ya faɗi hakan saboda jahilci, to ya tafi akan laifin yin magana akan addini ba tare da ilimi ba, kuma ya kamata ya daina har sai ya tabbatar.

Maganar nan da ake cewa: "Ku nemi duniya kamar za ku rayu har abada, sannan ku nemi lahira kamar za ku mutu gobe"

اعْمَلْ لِدُنْيَاكَ كَأَنَّكَ تَعِيشُ أَبَدًا، وَاعْمَلْ لآخِرَتِكَ كَأَنَّكَ تَمُوتُ غَدًا

A gurin Malaman Hadisi: Wannan ba hadisin Annabi (Sallallahu Alaihi Wasallam) ba ne mai inganci. Malaman hadisi da yawa sun bayyana cewa ba shi da asali (wato La Asla Lahu) a matsayin hadisin Annabi (Sallallahu Alaihi Wasallam). Maimakon haka, zance ne da aka samo daga sahabi Abdullahi bin Amr bin al-As ko kuma Ali bin Abi Talib (Allah ya yarda da su).

Ko da yake ba hadisi ba ne, ma'anarsa tana da kyau idan aka fassara ta daidai: Idan za ka yi aikin duniya (kamar neman abinci ko gina sana'a), kada ka haukace masa; ka yi shi a hankali cikin natsuwa, domin idan bai kare yau ba, ai kana da lokaci mai tsawo (kamar mai rayuwa har abada). "Kamar ba za ka mutu ba" yana nufin kada ka garzaya ko ka yi hauka akan neman abun duniya; tunda akwai sauran lokaci na rayuwa gaba, zaka iya yin abun a hankali ba tare da ka takura kanka ba.

Shi kuma aikin lahira (kamar sallah, tuba, da ayyukan alkhairi), yi gaggawa kada ka jinkirta shi, domin mutuwa tana iya zuwa kowane lokaci (kamar mai mutuwa gobe). yana nufin ka gaggauta yin tuba, sallah, da ayyukan alkhairi yanzu-yanzu domin baka da tabbacin za ka kai gobe.

WALLAHU TA'ALA A'ALAM

Zauren Fatawoyi Bisa Alkur'ani Da Sunnah.

  ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.