Hukuncin Wanda Ya Aikata Zunubi Bisa Tilas

𝐓𝐀𝐌𝐁𝐀𝐘𝐀❓

Assalamu alaikum Allah yakarama malam lafiya da Nisan kwana me albarka. Tambayana malàm wanda ya yi zunubi babu niyya ko sha'awa, sannan a lokacin zuciyansa ya ki abun yana jin damuwa, mene ne hukuncinsa idan ya rasa mafita. Shin mene ne hukuncin Hakan? Allah ya saka da alkhairi 🙏

𝐀𝐌𝐒𝐀❗️

Wa alaikis salam wa rahmatulLahi wa barakatuhu.

Tambayar taki tana da harahen damo. Za ta iya nufin mutumin da aka tilastashi har ya aikata wani zunubi, ko kuma mutumin da halin matsatsin rayuwa ya kaishi zuwa ga aikata ayyukan saɓo. Allah shi ne masanin hali da rayuwar bayinsa, kuma yasan abin da suka aikata afili ko aɓoye da kuma dalilansu na yin hakan.

A Musulunci, hukuncin mutumin da ya fada cikin zunubi saboda matsin lamba, tursasawa, ko rashin mafita ya dogara ne akan irin yana yin da yake ciki da kuma nau'in zunubin.

Idan mutum ya tsinci kansa a yana yi na yunwa, rashin lafiya, ko hadari na mutuwa inda babu wata mafita face aikata wani abu da aka haramta (kamar cin mushe ko satar abinci don kar ya mutu) wannan babu laifi akansa. Halal ne gare shi ya aikata abin da zai tseratar da rayuwarsa, amma iya gwargwadon abin da zai tseratar da shi kawai, ba tare da ketare iyaka ba.

Idan dai halin rayuwa ko tilasci suka zamto sun kai mutum zuwa ga aikata wani aikin zunubi, to babu laifi ko zunubi akan abin da mutum ya aikata ba tare da niyya (ganganci), zaɓi, ko sha'awa ba, musamman idan zuciyarsa ta ki abun kuma yake jin damuwa. Wannan damuwar da mutum yake ji a zuciyarsa tana nuna alamun ingancin imaninsa.

Allah yana yafewa bawansa mutukar dai shi bawan bai ɗauki wannan amatsayin uzurinsa na yin zunubin a ko yaushe ba, wato wajibi ne mutum ya nemawa kansa mafita, kada ya zauna ahaka, kada ya saba da aikata wannan abun har ma ya dawo yana yinsa kuma da gangan.

A cikin Alkur'ani mai girma, Allah ya ce

 وَ لَيۡسَ عَلَيۡكُمۡ جُنَاحٌ فِيۡمَاۤ اَخۡطَاۡ تُمۡ بِهٖۙ وَلٰكِنۡ مَّا تَعَمَّدَتۡ قُلُوۡبُكُمۡ ؕ وَكَانَ اللّٰهُ غَفُوۡرًا رَّحِيۡمًا‏

Kuma babu laifi a gare ku ga abin da kuka yi kuskure da shi, kuma amma (akwai laifi) ga abin da zukatanku suka ganganta, kuma Allah Ya kasance Mai gafara, Mai jin ƙai.

Manzon Allah (Sallallahu Alaihi Wasallam) Ya ce "Hakika saboda Ni, Allah ya yafe wa al'ummata abin da suka aikatashi cikin kuskure, da wanda suka yishi cikin mantuwa, da kuma abin da aka tilastasu akansa". (Ibnu Maajah da Baihaƙiy suka ruwaitoshi).

Malamai da yawa sun yi magana game da ma'anoni da bayanan da wannan hadisin ke kunshe da shi. Daga cikin abin da suka faɗa sunce lallai duk wanda ya aikata wani aikin saɓon Allah bisa tilastawa daga waninsa, to babu laifi akansa. Sai dai laifin yana kan wannan da ya tilastashi ɗin.

Akwai wasu manyan zunubai da malamai suka ce babu halacci ko tursasawa a cikinsu, ko da rayuwar mutum tana cikin hatsari

1. KISAN KAI: Ba ya halatta mutum ya kashe wani domin a tseratar da tasa rayuwar. Wanda aka tilastashi domin ya kashe wani ko wasu, kuma ya aikata kisan kai ɗin, to lallai sai anyi masa haddi da shi da wanda ya tilasta masa ɗin. Saɓanin sauran laifuka.

2. ZINA: Malamai da dama sun tafi akan cewa tursasawa ba ta halatta maza su yi zina ba. Amma matar da wani ya tilasta mata ya yi zina da ita ta hanyar fyaɗe, to wannan babu laifin zina a kanta. Laifin yana kan wanda ya tilasta mata ɗin.

Abubuwan da ya kamata mutum ya yi idan ya faɗa cikin wannan yana yi

1. NEMAN GAFARA (ISTIGFARI): Ko da yana yin ya ba ka damar aikata hakan, yawaita istigfari yana wanke dukkan wani datti na zuciya.

2. TUBA NA GASKIYA: Kudiri niyyar cewa idan ka fita daga wannan matsin lambar ba za ka sake komawa ba.

3. KIYAYE HAKKIN WASU: Idan matsin lambar ya sa ka cutar da dukiyar wani (kamar sata don abinci), kana da alhakin biyan sa idan ka sami iko nan gaba.

WALLAHU A'ALAM.

Zauren Fatawoyi Bisa Alkur'ani Da Sunnah.

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.