Kasuwannin Hadahadar Kudin Intanet

 An ciro daga littafin:

BIƊA DA TANADI A DUNIYAR INTANET
(Sana’o’i, Kasuwanci, Ƙwadago)

Na

Abu-Ubaida SANI
Abdulrahman ALIYU

Manazartar Littafi: Sani, A-U. & Aliyu, A. (2026). Biɗa Da Tanadi a Duniyar Intanet (Sana'o'i, Kasuwanci, Ƙwadago). Amsoshi Academic Publishers. ISBN: 978-978-62480-1-1. DOI: https://doi.org/10.5281/zenodo.21361768

Tuntuɓa Domin Samun Littafi: 

Dr. Abu-Ubaida Sani: Imel - abuubaidasani5@gmail.com | WhatsApp - 08133529736

Dr. Abdulrahman Aliyu: WhatsApp - 08036954354

4.4.1 Kasuwannin Hadahadar Kuɗin Intanet

Kamar yadda ake da kasuwannin hadahadar nau’o’in kayayyaki daban-daban a duniyar zahiri, haka abin yake a duniyar intanet. A intanet, akwai manyan kasuwannin hadahadar kuɗin intanet. Kasuwannin suna da tsarinsu da ƙa’idojinsu. Sukan kasance cikin na’urori a tsarin kafafen intanet da manhajoji.

Yawanci akan gina su a tsarin da ake kira “mutum zuwa mutum” (Peer-to-peer (P2P)). Wannan tsari ne da yake ba wa masu kasuwanci damar gudanar da cinikayya kai tsaye a tsakaninsu. Bugu da ƙari, ana killacewa da adana kuɗaɗe da kadarorin ‘yan kasuwa tare da ba su cikakken tsaro ta hanyar amfani da fasahar da ake kira bulokcen (blockchain).

Fasahar Bulokcen tana taka rawa sosai a fannin gudanar da harƙallolin kuɗi cikin tsaro tare da adana tarihinsu. Tsari ne wanda ya kauce wa takunkumin bi ta hannun wasu (misali bankuna) wanda yake gudana cikin sigar ƙeƙe-da-ƙeƙe tsakanin ‘yan kasuwa da kwastomomi. Ya kuma kasance ƙashin bayan hadahadar kuɗaɗen intenet, waɗanda su ma alƙibla ce da kasuwancin duniya ta dosa a yau.[1]

Fitattun kasuwannin hadahadar kuɗaɗen intanet sun haɗa da:

a. Binance – (https://www.binance.com/)

b. Crypto – (https://crypto.com/)

c. Gate – (https://www.gate.io/)

d. KUCOIN – (https://www.kucoin.com/)

e. OKX – (https://www.okx.com/)

f.       Paxful – (https://www.paxful.com)

4.4.2 Nau’o’in Hadahadar Kuɗin Intanet

Akwai manyan nau’o’in hadahadar kuɗaɗen intanet guda biyu waɗanda Hausawa sukan shiga. Su ne (a) masu uwar kuɗi da (b) marasa uwar kuɗi. An samar da waɗannan rabe-rabe ta la’akari da amfani ko rashin amfani da uwar kuɗi a cikin kasuwancin. A taƙaice ke nan, akwai waɗanda suke buƙatar uwar kuɗi kafin gudanar da su. Akwai kuma waɗanda ba sa buƙata. A ƙasa an kawo bayanai game da waɗannan nau’o’in hadahadar kuɗaɗen intanet.

4.4.2.1 Masu Uwar Kuɗi

Wannan nau’i ne na hadahadar kuɗin intanet wanda yake buƙatar uwar kuɗi kafin gudanarwa. Yana matuƙar buƙatar ƙwarewa da naƙaltar yanayin kasuwa. Yana iya zuwa da babbar hasara yayin da aka yi sake ko aka saɓa ƙa’idojin hadahadar. Wani abu kuma shi ne, dole ne mai gudanar da irin wannan nau’in hadahadar kuɗin intanet ya kasance yana bibiyar sauye-sauyen da suke faruwa a kasuwanni. Dole ne kuma ya riƙa sabunta iliminsa game da sababbin ƙa’idoji da matakan hadahadar, wanda hakan yakan kasance ƙalubale ga Hausawa masu yawa.[2]

Shi ma wannan nau’in hadahadar kuɗaɗen intanet ya rabu zuwa gida biyu kamar haka:

(a) Kasuwanci (Trading) (Proof of Work (PoW)

(b) Kulle Kuɗi (Farming/Yield Farming/Liquidity Farming/staking (proof of stake PoS))

4.4.2.1.1 Kasuwanci (Trading)

An tattauna ma’anar kasuwanci a ƙarƙashin 2.1 a babi na biyu. Ta la’akari da bayanan Tanko (2000 sh. 35) da Gummi (2014 sh. 77) da Abdullahi (2021 sh. 2), ana iya cewa kasuwancin kuɗin intanet fasaha ne na saye da sayarwa ko musanyen kuɗaɗen intanet domin samun riba, ta hanyar bin matakai da dabarun da suka haɗa da gano wurin sayen kaya cikin sauƙin farashi da amfani da dabaru da ilimin sanin kasuwa da lokacin da sayar da hajar zai fi kawo riba.

Kasuwancin kuɗaɗen intanet ya shafi saye da sayar da kuɗaɗen tamkar dai yadda Hausawa da sauran al’ummomi suke gudanar da kasuwancin canjin kuɗaɗen ƙasashe a duniyar zahiri. Wani abin burgewa shi ne, ya zuwa yanzu, kuɗaɗen intanet an yi su ne kawai domin su kasance a duniyar intanet. Ba a kallon su ko a taɓa su. Haka kuma, kasuwannin da ake kasuwancinsu duk a kafafen intanet suke. Babu buƙatar a je kasuwa a duniyar zahiri domin gudanar da kasuwancin.

A irin wannan kasuwancin ne za a samu Bahaushe ya je kasuwar da ba a kallon ta a zahiri (kasuwar kan intanet), ya yi ciniki tare da mutumin da bai san shi ba, kuma bai san a inda yake ba a duniya, sannan ya sayi abin da ba zai taɓa kallon sa a duniyar zahiri ba ballantana ya taɓa shi (kuɗi ko kadarar intanet).

4.4.2.1.1.1 Ire-Iren Kasuwancin Kuɗin Intanet

Kasuwancin kuɗin intanet bai kasance cikin salo ku siga ɗaya ba. Yana da bambance-bambance masu yawa. Waɗansu daga cikin bambance-bambancen sun samu ne sakamakon nau’in jarin da ‘yan kasuwan suke amfani da su. Wasu kuwa sun samu ne sakamakon bambanci tsakanin kasuwannin. Haka kuma, akan samu bambanci ta fuskar dabarar gudanar da kasuwancin, kamar abin da ya shafi lokacin sayen kaya da lokacin sayarwa.

Ana iya raba kasuwancin kuɗin intanet waɗanda Hausawa sukan shiga zuwa manyan rukunoni guda huɗu kamar haka:

a. Kasuwancin kuɗi-hannu

b. Bashi mai ‘yanci

c. Bashi mai takunkumi

d. Dauwamammiyar kadarar intanet

Kowanne daga cikin waɗannan yana da tsarinsa da ƙa’idojin gudanar da shi. Haka kuma, Bahaushe ɗankasuwa yana iya gudanar da nau’o’in kasuwanci sama da ɗaya. Hasali ma, a rana ɗaya mutum yana iya ziyartar kasuwannin hadahadar kuɗin intanet daban-daban domin gudanar da kasuwanci.

A ƙasa an kawo bayanan waɗannan nau’o’in kasuwancin kuɗin intanet.

4.4.2.1.1.1.1 Kasuwancin Kuɗi-Hanu (Spot Trading)

Kamar yadda sunan ya nuna, wannan nau’in kasuwancin kuɗin intanet ne wanda yake buƙatar jari a hannu yayin gudanarwa. Yana da tsari irin wanda Hausawa suke yi wa kirari da: “Hannun kuturu da makaho.” Zubinsa yana da matuƙar kama da na saye da sayar da hajoji a duniyar zahiri.

Wani ƙarin abin sha’awa dangane da kasuwancin kuɗin intanet na kuɗi-hannu shi ne, mai sayarwa yana da damarmakin saita akawun ɗinsa ta yadda akawun ɗin zai gudanar da abubuwa da dama ko da mai shi ba ya kan intanet a wannan lokaci. Misalan abubuwan da zai iya saitawa sun haɗa da:

1. Saita Farashin Saye: Ɗankasuwa yana iya sanya kuɗi a lalitar akawun ɗinsa sannan ya saita akawun ɗin da cewa, da zarar nau’in kuɗin intanet kaza (misali Bitcoin) ya sauƙo zuwa farashi kaza (misali naira miliyan ashirin da tara), to ya saya masa. Yayin da aka yi wannan saitin, da zarar farashin Bitcoin ya sauƙo zuwa wannan farashi, to kwamfuta za ta saya wa ɗankasuwan adadin Bitcoin da ya saita.

2. Saita Farashin Sayarwa: Ɗankasuwa yana iya saita cewa, da zarar farashin kuɗin abu kaza (misali Tether) ya kai kaza (misali miliyan uku) to kwamfuta ta sayar masa kai tsaye. Ko da ba ya kan intanet a wannan lokaci, kwamfuta za ta sayar idan aka cimma wannan farashi.

Bambancin wannan nau’in kasuwancin kuɗin intanet da sauran shi ne, kuɗin da ɗankasuwa yake da shi, shi ne kaɗai adadin kadarar intanet da zai iya saya. A ɓangare ɗaya kuwa, iya kaɗarar intanet da yake da ita, ita kaɗai zai iya sayarwa.

Yana da kyau a fahimci cewa, kasuwannin hadahadar kuɗaɗen intanet akan samar musu tsaro mai aminci domin bayar da kariya ga ‘yankasuwa. Duk Bahaushen da aka damfara ko aka yi wa sata, to haƙiƙa ya yi sakaci ne, ko kuma ya shiga harkar ba tare da wadataccen ilimi ba. A ƙasa an kawo misalan matakan da za a iya cin karo da su yayin gudanar da wata harƙallar kasuwancin kuɗin intanet a kasuwar duniyar baɗini:

1. Mai sayar da kuɗin intanet zai baje hajarsa tare da zayyana farashin hajar. A ɓangare ɗaya kuwa, zai zayyana nau’o’in hanyoyin da za a iya biyansa.[3]

2. Mai sayen kuɗin intanet zai duba farashin da ya gamsu da shi, sannan ya tura buƙatar ƙulla harƙallar kasuwanci.

3. Da zarar ya tura adadin kaya da yake so, sannan su biyun suka nuna cewa ciniki ya faɗa, to na’urar kasuwar za ta kulle adadin hajar da ake buƙata daga akawun ɗin mai hajar tun kafin a tura masa kuɗin kayan.[4]

4. Mai sayen kaya zai tura kuɗi tare da shaidar biya cikin hanyoyi da matakan da suka keɓanta ga kasuwar. Daga nan zai danna alamar cewa ya biya kuɗin kaya a jikin harƙallar da suka ƙulla.

5. Mai sayar da kaya zai duba ya tabbatar da kuɗi sun cika, sannan ya danna alamar bayar da tabbacin cewa lallai an biya shi.

6. Masu kasuwar za su tura kaya (wanda suka riga suka kulle kamar yadda aka zayyana a sama a lamba ta 3) zuwa ga akawun ɗin wanda ya saya bayan sun cire kuɗin aikinsu (wanda yake daidai da kuɗin kasuwa a duniyar zahiri).

Idan wata jayayya ta shigo dangane da wannan harƙallar kasuwanci, to jami’in kasuwar zai buɗe tattaunawa ta musamman. Zauren zai haɗa jami’in da kuma masu taƙaddamar, a inda kowa zai gabatar da hujjojinsa. Aikata rashin gaskiya a kasuwannin hadahadar kuɗaɗen intanet yana kai ga an kulle akawun ɗin mutum (mai aikata rashin gaskiyar). Hakan zai iya janyo masa babbar hasara. Wannan ma ƙalubale ne ga Hausawa kasancewar cikin harshen Ingilishi ake gudanarwa.

4.4.2.1.1.1.2 Kasuwancin Bashi Mai ‘Yanci (Margin Trading)

Wannan ɗaya ne daga nau’o’in kasuwancin kuɗin intanet da Hausawa sukan shiga wanda yake buƙatar uwar kuɗi. Bugu da ƙari, ɗan kasuwa yana da damar samun bashin kuɗi domin gudanar da kasuwanci. Wannan nau’in bashi ya kasance mai ‘yanci ne saboda wanda ya karɓe shi yana da ‘yancin gudanar da kasuwancin da ya ga dama, kuma a lokacin da ya ga dama.

Kasuwa ce take ba da wannan bashi. Kowace kasuwar hadahadar kuɗin intanet tana da tsarinta da ƙa’idojinta na bayar da irin wannan bashin.[5] Wata muhimmiyar ƙa’ida ita ce, dole ne ya kasance ɗankasuwa yana da waɗansu kuɗaɗe a cikin lalitar akawun ɗinsa kafin a ba shi bashi. Bayan wannan, akan yi la’akari da tarihin yanayin hulɗar kasuwancin ɗankasuwa wajen ba shi bashi. A kasuwar Binance, ɗankasuwa yana iya samun aron kuɗin da ya kai kaso ɗari da ashirin da biyar (125%) na uwar kuɗin da yake da shi.

Da farko ɗankasuwa zai sanya kuɗaɗensa a matsayin kafin alƙalami (security deposit). Daga nan za a ara masa kuɗin da zai iya kasuwanci da shi a cikin kasuwar. Wannan zai ba shi damar samun riba mai kauri. Misali, wanda ya shiga da naira dubu ɗari (N100,000) kaɗai, idan ya ci ribar 10%, to ribar za ta kasance dubu goma (N10,000) kawai. Idan kuwa ya shiga da dubu ɗari biyu da ashirin da biyar (N225,000)[6] ne, to ribar 10% ɗinsa za ta kasance dubu ashirin da biyu da ɗari biyar (N22,500).

Ɗankasuwan da ya karɓi wannan nau’in bashin kuɗi yana da damar gudanar da kasuwanci iri biyu. Sun kasance kamar haka:

A. Saya (Long Position (Buying)): Yayin da mutum ya sayi kadarar intanet da kuɗin da aka ba shi rance, sai darajar kaya ya tashi, to zai sayar ya samu riba. Ɗankasuwa yana iya karɓar bashi a daidai lokacin da alƙaluma suka nuna cewa kayan da zai saya ya gama araha, sannan zai fara tashi ba da jimawa ba.[7]

B. Sayarwa (Short Position (Selling)): Ana irin wannan tsarin ne yayin da ake tunanin farashi zai yi ƙasa. Yayin da aka ba wa ɗankasuwa kuɗin intanet (misali Dogs biyu (2)), to zai sayar. Da zarar farashi ya yi ƙasa (kamar yadda ya yi hasashe), hakan na nufin zai iya sayen kuɗin intanet ɗin da suka fi adadin waɗanda aka ba shi bashi. Da zarar ya saye su, zai mayar da waɗanda ya karɓi bashi, shi kuma ya riƙe sauran.[8]

Babban ƙalubalen wannan wannan nau’in kasuwanci shi ne, da zarar hasara ta samu wanda ya karɓi bashi yadda har ta kai abin da aka yi hasarar ya kai adadin kafin alƙalamin da ya sanya, to kai tsaye na’urar masu kasuwar za ta sayar da wannan kadara ta mayar da kuɗinta. Shi kuwa zai tashi ba shi da tsuntsu ba shi da tarko. Misali a nan shi ne, idan ɗan kasuwa ya sanya kafin alƙalami na naira ɗari (₦100), sai aka ba shi kashi ɗari da ashirin da biyar (125%), to zai shiga kasuwa da naira ɗari biyu da ashirin da biyar ke nan (₦225). Idan har farashin abin da ya saya ya faɗi da darajar da ta kai ta naira ɗari (₦100), to hakan yana nufin kafin alƙalamin da ya sanya ya tafi, saura bashin da aka ba shi kawai. A daidai wannan lokaci, na’ura za ta sayar da kayan nan take. Kuɗin da za a sayar ke nan zai kama naira ɗari da ashirin da biyar (₦125), wanda shi ne daidai kuɗin da aka ba shi bashi. Don haka masu kasuwa za su ɗauki abinsu. Shi kuma ya tashi a tutar babu ke nan.

Ɗaukar bashi da yawa yana tafe da riba da kuma haɗari. Idan aka samu riba, to za a sha romo. Yayin da faɗuwa ta auku kuwa, tana iya kai ga laƙume kafin alƙalami da mutum ya sanya. Ya kasance tamkar nau’o’in kasuwancin da Hausawa suke yi wa laƙabi da “gwari.”

4.4.2.1.1.1.3 Kasuwancin Bashi Mai Takunkumi (Futures Trading)

Wannan ma nau’in kasuwanci ne da ya ƙunshi karɓar bashi. Yana matuƙar kama da wanda aka tattauna a baya a ƙarƙashin 4.4.2.1.1.1.2, wato Bashi Mai ‘Yanci. Babban bambancinsu shi ne, ɗankasuwar da ya karɓi nau’in wancan bashin yana da damar gudanar da kasuwanci a duk lokacin da ya so. Shi kuwa wannan nau’in bashi, akwai ƙa’idar lokacin da za a iya gudanar da kasuwancin.

Bashi Mai Takunkumi nau’in bashi ne da ake karɓa domin a aiwatar da wani taƙamaiman kasuwanci a wani takamaimai lokaci. Ɗankasuwa zai yi hasashe ne bisa ilimin sauyin farashin kasuwa. Idan sayen kaya zai yi ya ajiye domin sayarwa a nan gaba, zai saita wani lokaci a wata rana da yake hasashen zuwa lokacin farashin zai yi daraja sosai. Da zarar lokacin ya yi, na’ura za ta sayar da kayan ko da ɗankasuwan ba ya kan intanet. Idan sayan kaya zai yi kuwa, yana iya saita lokacin da yake hasashen farashi zai sauƙa sosai. Da zarar lokaci ya yi, to na’ura za ta saya masa. Daga nan sai batun sayarwa a lokacin da farashi ya sake tashi.[9]

Wannan ma babban ƙalubale ne ga Hausawa. Za a iya lura da cewa, akwai kasada sosai a cikin wannan nau’in bashi. Waɗanda za su iya cin gajiyarsa kawai su ne waɗanda suka naƙalci alƙaluman da suke haifar da hawa da sauƙar farashin kayayyaki a kasuwannin duniyar kuɗin intanet.

4.4.2.1.1.1.4 Kasuwancin Dauwamammiyar Kadarar Intanet (NFT Trading)

NFT[10] nau’in kadarar kan intanet ce da ta bambanta da sauran kadarorin ko kuɗaɗen kan intanet. Tsarinta daban ne kasancewar kowace guda tana cin gashin kanta ne. Ba a iya sauya ta da wani nau’in kuɗin intanet ko kadarar intanet. Wani abu kuma da NFT shi ne, kowanne nau’in kadara guda ɗaya ake samu. Ba kamar sauran nau’o’in kadarorin intanet ba ne da ake iya samun nau’i ɗaya cikin adadi mai yawa. Misali, binciken Lee (2024) ya tabbatar da cewa, an tanadi kimanin Pi da suka kai biliyan ɗari (biliyan 100).

Dauwamammiyar Kadarar Intanet tana zuwa cikin sigogin da suka haɗa da:

a. Zane

b. Tsofaffin kayayyaki

c. Gidajen duniyar intanet

d. Kayayykin cikin wasannin kan intanet

e. Abubuwan duniyar zahiri da duniyar intanet

Ana amfani da kuɗin intanet wajen saye da sayar da su. Hausawa ba su cika gudanar da wannan nau’in kasuwanci ba. Bugu da ƙari, ya fara zama tsohon yayi kasancewar hadahadar kuɗaɗen intanet ta fara ɓoye shi. Duk da haka, dama ce ga Hausawa wacce za su iya shiga a dama da su.[11] Ya sayar da shi a cikin watan Maris na shekarar 2021.[12]

Hoto Na 4.15: Dauwamammiyar Kadarar Intanet

Madogara: Conti & John (2023)

Za a iya lura da cewa, hoto na 4.15 da aka kawo a sama, zane ne kawai na wani abu da yake kama da biri. Wani abin burgewa da mamaki shi ne yadda kadarorin NFT suke da tsada. Akwai wanda ya sayar da hoton kakansa a kan kuɗin intanet da darajarsa ta kai miliyan ɗaya da dubu ɗari biyar a kuɗin Nijeriya (₦1,500,000).[13] Jack Dorsey wanda ya kasance shugaban kamfanin Twitter (Twitter, Inc) daga shekara ta 2015 zuwa 2021, ya sayar da rubutunsa na farko a kan kafar Twitter a matsayin Dauwamammiyar Kadarar Intanet. Ya sayar a kan farashin dalar Amurka miliyan biyu da dubu ɗari tara ($2,900,000).[14]

Hoto Na 4.16: Dauwamammiyar Kadarar Intanet Daga Rubutun Jack Dorsey a Kan Kafar Twitter

Madogara: Locke (2021)

4.4.2.1.1.2 Dabarun Kasuwanci

Kamar dai kasuwancin duniyar zahiri, akwai buƙatar Hausawa su naƙalci dabarun kasuwanci yayin fara gudanar da hadahadar kuɗaɗen duniyar intanet. Hasali ma, ana buƙatar bincike da karance-karance dangane da hadahadar kuɗaɗen duniyar intanet sama da yadda ake buƙata a kasuwannin duniyar zahiri. Hakan ya zama wajibi kasancewar yadda a kullum ake samun sauye-sauyen ƙa’idojin gudanar da kasuwancin kuɗaɗen intanet.

Yana da matuƙar fa’ida Bahaushe ya nazarci ciki da wajen hulɗar, ba wai ya faɗa mata ido rufe ba. Yawancin Hausawa waɗanda suke kukan tafka hasara sun shiga ne ba tare da wani ilimi ba, wato abin da Hausawa sukan ce “kama ra’aitan nasa.” A koyaushe masu hadahadar kuɗin intanet sukan amsa tambayoyi makamantan waɗannan kafin su faɗa kasuwanci:

a. Shin wane nau’in kaya zan saya?

b. Shin yanzu ne ya dace in sayi kaya la’akari da alƙaluman kasuwa?

c. Shin yanzu ne ya dace in sayar da kaya la’akari da alƙaluman kasuwa?

d. Shin wane nau’in kasuwanci ya kamata in yi?

e. Shin a wace kasuwa ya kamata in yi hulɗar kasuwancin?

f. Shin wane farashi zan saka ko a kan wane farashi zan nemi kaya?

g. Shin ta wace hanyar biyan kuɗi za a biya ni, ko kuma ta wace hanyar biyan kuɗi zan biya?

Akwai wasu muhimman dabarun hadahadar kuɗaɗen intanet. Su ne kamar haka:

1. Kasuwancin Fakafaka (Scalping)

Wannan dabarar kasuwancin kuɗin intanet ce a inda ɗan kasuwa yake sayen kaya sannan ya sayar cikin ƙanƙanin lokaci. Nau’in kasuwanci ne da Hausawa suke yi wa kirari da “sha yanzu, magani yanzu.” Mai gudanar da wannan nau’in kasuwanci yana bin ƙaramar riba tare da guje wa yin hasara. Kwatakwata wannan nau’in kasuwancin ba ya haura mintuna kafin a kammala shi. Ma’ana dai, ana farawa ne sannan a kammala shi cikin mintuna ƙalilan.[15]

2. Kasuwancin Rana (Day Trading)

Kamar yadda sunan ya nuna, dabarar kasuwancin kuɗin intanet ce da ake farawa sannan a kammala cikin rana ɗaya. Ɗankasuwa yana iya sayen kaya da safe, sannan ya yi ta bibiyar tashin farashi. Zuwa dare (ko kafin nan) zai iya sayarwa musamman saboda tsoron kada kasuwa ta juye cikin dare ya samu hasara alhali ba ya kusa (yana bacci). Yawanci ana farawa da kammala wannan nau’in kasuwanci cikin mintuna zuwa awowi kaɗan.

3. Kasuwancin Bin Hawa Da Sauƙar Farashi (Swing Trading)

Wannan dabarar kasuwanci ce da ake amfani da ƙididdigar sauƙa da tashin farashi a kasuwanni daga kwamfuta. Akan gano lokacin da ya fi dacewa a shiga kasuwa ko a fita ta la’akari da alƙaluman giraf daga kwamfutar da take karantar motsin hawa da sauƙan farashin kayayyaki. Yawanci akan ɗauki ‘yan kwanaki kafin a kammala wannan nau’in kasuwanci (daga lokacin da aka sayi kaya zuwa lokacin da za a sayar).

Hoto Na 4.17: Giraf Ɗin Hawa Da Sauƙar Farashi a Kasuwannin Kuɗaɗen Intanet

Madogara: Mitchell (2024)

A hoto na 4.17 da yake sama, za a iya lura da alamar hawa da sauƙar farashi. Wannan shi ne yake nuna Koriyar Kasuwa da kuma Jar Kasuwa (kamar yadda aka bayyana a ƙarƙashin 4.4.2.1.1.1.2). Fahimtar yadda ake amfani da alamomi da alƙaluman yana buƙatar ilimi na musamman.

4. Kasuwancin Doguwar Ajiya (Position Trading)

Wannan dabara ce ta kasuwancin kuɗin intanet inda ɗankasuwa yake ajiye kadarar da ya saya na wani lokaci mai tsawo (misali watanni ko shekaru) kafin sayarwa. Lamarin yana kama da yadda Hausawa sukan sayi wata kadara su ajiye ta na tsawon lokaci a duniyar zahiri.

5. Kasuwancin Bin Kasuwanni (Arbitrage Trading)

Wannan nau’i ne na dabarar kasuwancin kuɗin intanet wadda ta shafi sayen kadara a wata kasuwa tare da sayar da ita a wata kasuwa ta daban domin samun riba. Lamarin yana kama da yadda Hausawa sukan yi fatauci ko gudanar da kasuwancin bin kasuwanni a duniyar zahiri. Mai gudanar da wannan nau’in kasuwanci zai yi la’akari da bambancin farashin da yake tsakanin kasuwanni. Daga nan sai ya sayi kadara a kasuwar da take da sauƙin farashi sannan ya yi saurin kai ta kasuwar da take da tsada domin sayar da ita. Masu kasuwancin kuɗi a hannu (spot trading) sun fi amfani da wannan dabarar kasuwanci.

4.4.2.1.2 Noman Kuɗi (Farming)[16]

Ana yi wa wannan nau’in hadahadar kuɗin intanet taken “Shaidar Bayar Da Gudummawa” wato “Proof of Stake (PoS)” a Ingilishi. Kalmar ‘farming’ tana da fassarar ‘noma’ a harshen Hausa. Abin da yake faruwa a irin wannan hadahadar kuɗin intanet makamancin wanda yake faruwa ne a harkar noma a duniyar zahiri. Masu noman kuɗi a kan intanet sukan kulle waɗansu kuɗaɗe na tsawon wani lokaci tare da hasashen cewa zuwa lokacin za su samu riba a kan kuɗaɗen da suka kulle. Abin ya yi kama da yadda Hausawa suke shuka amfanin gona kaɗan sannan su girbi amfani mai yawa. A. Sani (keɓantacciyar tattaunawa, 7 ga watan Nuwamba 2024) ya bayar da misalan noman kuɗi aka dama da Hausawa kamar haka:

a. Cetus (https://www.cetus.zone)

b. OKX Yield Aggregator (https://www.okx.com)

c. PancakeSwap (https://pancakeswap.finance)

d. Raydium (https://raydium.io)

e. SUN.io (https://sun.io)

f. Uniswap (https://uniswap.org)

---

[1] Domin samun cikakkun bayanai game da bulokcen (blockchain), ana iya duba Xu et al. (2019).

[2] M.M. Manga (keɓantacciyar tattaunawa, 18 ga watan Satumba 2024)

[3] Wannan ya shafi bankuna ko waɗansu hanyoyin biyan kuɗi na kan intanet da za su bayar da dama ga mai sayen kaya ya tura kuɗi zuwa ga mai sayarwa.

[4] Hikimar yin hakan ita ce, babu yadda za a yi mai sayar da kaya ya damfari mai saye. Misali, idan ba a kulle hajar ba, mai sayar da kaya yana iya tunanin ƙin tura kayan bayan an tura masa kuɗi.

[5] Wannan yana ɗaya daga cikin ƙalubalen hadahadar kadarorin intanet. Dole ne ɗankasuwa ya riƙa karantawa da bibiyar sauye-sauyen da ake samu a tsakanin kasuwanni. Ba zai iya dogaro da bayanan wata kasuwa domin ya gudanar da kasuwanci a wata kasuwar ta daban ba.

[6] Bayan an ba shi bashin kaso ɗari da ashirin da biyar (125%) na uwar kuɗinsa

[7] Tashin kayayyaki a kasuwannin kuɗin intanet shi ake kira da Koriyar Kasuwa (Green Market). Yayin da farashin kayayyaki suka yi ƙasa kuwa, shi ake kira Jar Kasuwa (Red Market).

[8] Sake sayen kaya da ɗankasuwa yake yi bayan ya sayar, shi ake kira buy back a Ingilishi (wato dai sake saye).

[9] Domin ƙarin bayani, ana iya duba Bajpai (2024).

[10] NFT yana nufin Non-Fungible Token, wato kadarorin da ba za a iya maimaita su ko maye gurbinsu ba.

[11] Domin samun ƙarin bayani, ana iya duba Cuban (2024) da Sharma (2024).

[12] Domin samun cikakken bayani, ana iya duba Locke (2021).

[13] An samu wannan bayani daga F. M. Bande, (keɓantacciyar tattaunawa, 10 ga watan Maris 2024). An tantance shi ta hanyar kallon makamantan labaran a kan intanet.

[14] A kuɗin Nijeriya a watan Oktobar shekarar 2024 (lokacin da dala ɗaya ta kai naira dubu ɗaya da ɗari bakwai), wannan adadin kuɗi a cikin naira zai kama biliyan huɗu da miliyan ɗari tara da da talatin (₦4,930,000,000).

[15] An kawo cikakken bayanin wannan dabarar kasuwanci a kasuwar FXOpen. A duba FXOpen (2024).

[16] Bayan Farming, wannan nau’in kasuwanci yana da sunaye da suka haɗa da “Yield Farming” da “Liquidity Farming” da “Staking.”