Adalci Tsakanin Mata Biyu Da Ba Sa Gari Daya

𝐓𝐀𝐌𝐁𝐀𝐘𝐀❓

Assalamu Alaikum warahmatullahi ta’ala wa bara ka tuhu Malam Ina wuni? Ya ƙoƙari? Allah ubangiji ya saka muku da alkhairi ya ƙara lafiya Allahumma Amin. Malam Daman dan Allah Ina tambaya ne a kan mutumin da ya yi aure yana zaune da matarshi a gari amma ya kasance shi me tafiya ne zuwa wani Gari don kasuwanci. Yaje ya dawo gurinta haka yake yi, to se yake so ya ƙara aure, to wadda ze ƙara aura yake so ya tafi da ita garin da yake kasuwancin ta zauna a chan Ita kuma uwargidan ya barta a nan yaje ya dinga dawowa kamar yadda ya Saba. To shi ne yake son ƙarin bayani ya ji kuma in hakan ba laifi ba ne Na gode sosai Allah ya ƙara lafiya

ADALCI TSAKANIN MATA BIYU DA BA SA GARI ƊAYA

𝐀𝐌𝐒𝐀❗️

Wa alaikumussalam warahmatullahi wabarakatuh.

Da farko wajibi ne a Shari’a kafin miji ya ƙara auren mace ta biyu sai in ya san cewa zai iya yin adalci a tsakaninsu. Allah Yana cewa:

 فَانْكِحُوا مَا طَابَ لَكُمْ مِنَ النِّسَاءِ مَثْنَىٰ وَثُلَاثَ وَرُبَاعَ ۖ فَإِنْ خِفْتُمْ أَلَّا تَعْدِلُوا فَوَاحِدَةً أَوْ مَا مَلَكَتْ أَيْمَانُكُمْ ۚ ذَٰلِكَ أَدْنَىٰ أَلَّا تَعُولُوا

Ku auri abin da ya yi muku daɗi daga mata; biyu-biyu, da uku-uku, da huɗu-huɗu. Sa'annan idan kun ji tsoron ba za ku yi adalci ba, to, (ku auri) guda ko kuwa abin da hannayenku na dama suka mallaka (baiwa). Wannan shi ne mafi kusantar zama ba ku wuce haddi ba. (Suratun-Nisa'i 3).

Ba laifi ba ne a shari'a mutum ya ƙara aure ya kuma ajiye sabuwar matar a wani gari daban da wanda uwargida take ciki, muddin zai iya yin adalci a tsakaninsu.

Dole ne mijin ya raba lokaci da kwanaki daidai tsakanin su, ko da kuwa wani gari ne da nisa. Idan ya tsara kwana biyu ko uku a wajen wata, dole ya ba ɗaya ma irin hakan idan ya dawo, ko kuma ya biya ta hakinta na lokaci gwargwadon iko. Dole ne mijin ya raba lokacinsa daidai gwargwado tsakanin matan biyu. Kasancewarsa mai yawan tafiya kasuwanci ba zai hana shi ba da hakkin kowace mace ba; dole ya ajiye tsari mai kyau na kwanakin da zai yi tare da uwargida da kuma wanda zai yi tare da amarya a garinsu. Dole ne ya samar wa kowace mace gidan zama na kwarai da abinci da sutura gwargwado da karfinsa, ba tare da ya cuci wata ba saboda nisan gari. Idan ya ba uwargida kwanaki kaza a garinsu, to itama amarya zai bata irin wannan lokacin ba tare da nuna son zuciya ba. Ba zai yiwu ya zauna tare da amarya a garin kasuwanci kullum ba, alhali kuwa ya bar uwargida tana zama babu mai kula da ita ko kuma ya tauye mata hakkinta na kwana tare da shi ba.

An karɓo daga Abu Hurairata Allah Ya yarda da shi ya ce: Manzon Allah (Sallallahu Alaihi Wasallam) ya ce: “Duk wanda yake da mata biyu, ya kuma karkata zuwa ga ɗaya daga cikinsu (a kan ɗaya), zai zo ranar kiyama rabin jikinsa ya jingine (ya shanye)”. (Abu Dawud ne ya rawaito shi, 2/242; al-Tirmizi, 3/447; al-Nasaa’i, 7/64; Ibn Maajah, 1/633; al-Haafiz ya inganta shi a cikin Buloogh al-Maraam, 3). 310, da al-Albaani a cikin Irwaa' al-Ghaleel, 7/80).

Allah yana cewa:

وَلَنْ تَسْتَطِيْعُوْۤا اَنْ تَعْدِلُوْا بَيْنَ النِّسَاۤءِ وَلَوْ حَرَصْتُمْ فَلَا تَمِيْلُوْا كُلَّ الْمَيْلِ فَتَذَرُوْهَا كَالْمُعَلَّقَةِۗوَاِنْ تُصْلِحُوْا وَتَتَّقُوْا فَاِنَّ اللّٰهَ كَانَ غَفُوْرًا رَّحِيْمًا

Kuma ba za ku iya yin adalci ba a tsakanin mata ko da kun yi kwaɗayin yi. Saboda haka kada ku karkata ga ɗaya daga cikinsu, har ku bar ta kamar wadda aka rataye... [Suratul Nisa’i 4:129]

Dole ne ya zama yana ciyar da kowacce, yana shayar da ita, kuma yana tufatar da ita tare da samar mata da masauki na kwarai a inda take zaune.

A Musulunci, miji yana da ikon ya sa matarsa a gidan da ya zaba, muddin gidan amintacce ne kuma yana da kayan da zai rayu da su. Amma bai zama dole uwargida ta yarda ta zauna da kishiya a gida ɗaya ba; saboda haka, sanya kowacce a daban (wani gari da wani gari) yana rage fitina. Ko da yake uwargida ba ta da ikon hana shi ƙarin aure, amma yana da kyau a samu fahimta da ita a kan tsarin da zai yi, domin hakan zai kawo zaman lafiya da kwanciyar hankali a gidajensa biyu. Yana da kyau ya nemi amincewar uwargida ko kuma ya sanar da ita ta yadda za a fahimci juna, domin hakan zai kawo zaman lafiya da kwanciyar hankali a tsakanin iyalan.

Lokacin da yake zuwa kasuwanci, yana da kyau ya lura da yadda zai rike amana da lura da duk wani sauyi na lokaci don kada wata ta zama kamar wacce aka watsar. Matsalar da ka iya tasowa ita ce ta rashin cika adalci a lokaci da kula idan tafiye-tafiye sun yi yawa. Idan har zai iya zuwa ya zauna tare da kowace mace a lokacin da ya dace da ita ba tare da ya zalunci ɗaya ba, to hakan ya halatta.

WALLAHU A'ALAM

Zauren Fatawoyi Bisa Alkur'ani Da Sunnah.

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.