Tsohuwar Gida Da Kakan Wajen Uba a Karin Magana

Daga

Shafa'atu Salihu Labbo
Abu-Ubaida Sani

Tsohuwar Gida

Akan samu dattawa mata da suke rayuwa a wasu gidaje. Yawanci akan ware musu balbalinsu (yankinsu/ƙofarsu) na musamman sannan a riƙa kai musu abinci a duk lokacin da aka ƙare. Ire-irensu suna kan gaba musamman fannin aiwatar da tatsuniyoyi musamman a da. Tara yara domin yi musu tatsuniya yana sa yaran su taya su hira tare da ɗebe musu kewa. Ga misalin tsokacin karin magana game da tsohuwar gida:

1. Tsohuwar Gida hana Walwalar Iyali

Wannan karin magana (kirari) na bayyana irin yadda wasu tsofaffin gida suke yin kane-kane ga lamuran gidan ‘ya’yansu, su hana surukansu da jikokinsu da sauran mutanen gida rawar gaban-hantsi saboda matsi da faɗace- faɗacensu. Shi ya sa sau da yawa matan zamani ba su faye son su auri mijin da yake zaune da iyayensa a gida guda ba. Saboda haka, irin wannan zamantakewa na buƙatar gyara domin samun kyakkyawar zamantakewa ta girmama juna.

Ana amfani da ita ne domin a yi shaguɓe ga wani mutum da yake amfani da matsayinsa wajen takura wa na ƙasansa.

Kakar Wajen Uba

Kakar wajen uba ita ce mahaifiyar mahaifi – wato kamar yadda mahaifiyar mahaifiya take matsayin kakar wajen uwa. Akwai karin maganar da take ɗauke da amon kakar wajen uba, kamar haka:

1. Ta fi babu kakar wajen uba

Wannan karin maganar tana nuna irin yadda mafi yawancin kakanni na wajen uba ba su cika shagwaɓa jikansu, ko nuna masa matsananciyar ƙauna, ta hanyar yi masa duk abin da yake so ba, kamar yadda dangin uwa suke nuna masa tausayi da kulawa.

Ana amfani da wannan karin magana ne a bayyana cewa mutum yana da wani abu mai matuƙar amfani a gare sa, amma amfanin da yake samu daga gare sa ya yi kaɗan kwarai.

Manazarta

Labbo, S.S. & Sani, A-U. (2025). Aure a ƙunshiyar karin magana. Amsoshi Academic Publishers. ISBN: 978-1-257-07209-5. DOI: https://doi.org/10.5281/zenodo.19513449