Tarkon Batsa a Soyayya Domin Damfara a Kan Intanet (Online Dating Extortion (Sextortion)

Daga

Abu-Ubaida Sani
Jibril Yusuf
Muhammad Sulaiman Abdullahi

Wannan yana kama da ‘damfarar soyayya’ wanda aka tattauna a ƙarƙashin 3.3.9 a sama. Babban bambancinsu shi ne, a wannan nau’in damfarar, ‘yan damfaran suna mayar da hankali ne kan tattauna batutuwan batsa tare da tura bidiyoyi da hotunan batsa. Za su ja hankalin wanda suke shirin damfara ta yadda za a amince da su har a fara irin wannan alfasha a kan intanet.

Idan mace ake ƙoƙarin damfara, waɗanda suka tuntuɓe ta a matsayin za su bayyana mata a matsayin kyakkyawan saurayi mai dukiya. Sannu a hankali zai riƙa tura mata hotunan tsiraici, sannan ya buƙaci ita ma ta yi hakan. Idan namiji ne ake shirin damfara, za a tuntuɓe shi a matsayin mace kyakkyawa. Shi ma za ta riƙa tura masa hotuna sannan ta buƙaci nasa hotunan. Sannan a hankali har a haɗa da bidiyoyi.

Tsiyar Nasara sai za shi gida! Za su adana dukkannin waɗannan hotuna da bidiyoyi da aka tura musu. Su kuwa ta ɓangarensu, da ma hotuna da bidiyoyin wata shashasha a uwa duniya za su tattaro su riƙa tura wa mutum a hankali. Kwatsam za su buƙaci a tura musu maƙudan kuɗi ko kuma su saki hotuna da bidiyoyin a duniya.

A watan Satumban shekarar 2024, sai da aka kama tare da kulle wasu ‘yan Nijeriya guda biyu masu suna Samuel da Samson Ogoshi a kurkuku. An kulle su ne a Amurka biyo bayan damfarar batsa a soyayya da suka yi wa wani ɗan Amurka. Matashin da suka damfara ya shiga halin ƙaƙa-ni-ka-yi wanda har ya kai ga kashe kansa. Binciken ya nuna cewa sun yi irin wannan damfarar a sama da mutane ɗari a duniya. Hakan yana nuni da yawaitar wannan nau’in damfarar. Domin samun ƙarin bayani game da wannan labari, ana iya duba Brenner (2024) da Luscombe (2024) da Tidy (2024).

Manazarta: 

Sani, A-U.,  Yusuf, J. & Abdullahi, M.S. (2025). Damfara a duniyar intanet. SAS Publishers. ISBN: 978-978-695-575-9. DOI: https://doi.org/10.5281/zenodo.19513307