Takaitaccen Tarihin Samuwar Intanet

Daga

Abu-Ubaida Sani
Jibril Yusuf
Muhammad Sulaiman Abdullahi

Intanet fage ne mai matuƙar jan hankali sakamakon tasirinsa a duniya. Masana da manzarta sun gudanar da rubuce-rubuce masu yawa dangane da tarihin samuwar intanet da bunƙasarsa cikin harsuna mabambanta. Daga cikin rubuce-rubucen da suka kawo tarihin intanet akwai Leiner et al. (1997) da Romualdo & Alessandro (2007) da Jonathan (2008) da Mukoshy (2015). Sake bibiyar tarihin tiryan-tiryan zai kasance tamkar maimaici ne ga ayyukan baya kawai ba tare da gabatar da wani sabon al’amari ko ilimi ba. Lura da haka, a nan za a fi mayar da hankali wajen zaƙulo sauye-sauye da cigaba da aka samu a harkar intanet tun bayan ƙirƙirarta.

Bincike da dama da suka gabata sun danganta tarihin intanet da yunƙurin wata hukumar tsaro da take Amurka. Binciken Gerf (2004 p. 1360) ya bayyana cewa, a shekarun 1970s ne aka samu hoɓɓasa na kafar intanet na farko mai suna ARPANET. Wannan bayani ya yi daidai da wanda Mukoshy, (2015 p. 21) ya rawaito daga Deitel da Deitel, (2009). Mukoshy ya yi ƙarin bayani da cewa, kafar intanet ta ARFA ta samu ne bayan hukumar da aka fi sani da The Advanced Research Project Agency (ARPA) ta gudanar da taro a shekarar 1969. Wannan hukumar ta kasance ƙarƙashin Department of Defense in United States. A ƙasar Hausa kuwa, intanet ya fara shigowa a wajejen 1990 kamar yadda Mukoshy (2016 p. 27) ya rawaito daga Almajir (2009). Duk da haka, bai bunƙasa ba sai a wajejen 1998.

Manazarta: 

Sani, A-U.,  Yusuf, J. & Abdullahi, M.S. (2025). Damfara a duniyar intanet. SAS Publishers. ISBN: 978-978-695-575-9. DOI: https://doi.org/10.5281/zenodo.19513307