Shin Taba Al'aura Yana Warware Alwala?

𝐓𝐀𝐌𝐁𝐀𝐘𝐀❓

Mallam Khamis Shin idan namiji ta taɓa Azzakarinsa ko mace ta taɓa farjinta sai sun sake alwala? Misali kaman mutum ya kammala wankan janaba sai ya taɓa Azzakarinsa sai ya sake yin alwala kafin yayi Sallah?

SHIN TAƁA AL'AURA YANA WARWARE ALWALA?

𝐀𝐌𝐒𝐀❗️

Idan namiji ya taɓa azzakarinsa ko mace ta taɓa farjinta kai tsaye ba tare da shamaki (tufa) ba, alwalarsu ta warware kuma wajibi ne su sake ta. Misali: Idan mutum ya kammala wankan janaba sannan ya taɓa azzakarinsa kafin sallah, dole ne ya sabunta alwalar sa. Haka zalika idan mace ta taɓa fatar farjinta (waje), alwalarta ta karye.

Wankan Janaba ya kan maye gurbin alwala ne kawai lokacin da mutum zai shiga yin sallah bayan ya kammala tsarki. Amma kuma, bayan an kammala wankan, idan wani abu ya faru da zai karya alwala (kamar fitsari, tusa, ko taɓa gaba tsirara), to sai an sake yin sabuwar alwala kafin a gabatar da sallah ko ya taɓa Alkur'ani.

Idan namiji ya taɓa Azzakarinsa ko mace ta taɓa farjinta ba tare da shamaki ba akwai zance biyu wanda suka fi ƙarfi na Maluma:

1. Idan mace ta shafi farjinta ko namiji ya taɓa Azzakarinsa ba tare da shamaki ba to alwalansa ya karye sai ya sabunta alwala. Wannan Shi ne Mazhabar Malikiyya da Shafi’iyya da Hanabila.

Dalilan su: sun kafa Hujja da Hadisin da aka rawaito daga Annabi (Tsira da Amincin Allah su tabbata a gare shi) Yace: Wanda ya shafi Azzakarinsa to yayi alwala. Abu dawud: 181. Tirmidhi: 83

Sannan sukace lokacin da mutum ya shafi azzakarinsa sha’awar sa zata iya motsawa wataƙila wani abu ya fito masa ba tare da ya sani ba. Sharhul Mumti’ Na Ibn Uthaymeen: 1/280

2. Idan namiji ya shafi Azzakarinsa ko mace ta shafi farjinta ba tare da Shamaki ba to alwalarsa bata karye ba. Wannan shi ne mazhabar Hanafiyya, da wasu daga cikin Ƴan Malikiyya Da wasu daga cikin Magabata. Hakanan wannan shi ne Ra’ayin Sheikhul Islami Ibnu Taimiyya da Sheikh Ibnu Uthaymeen.

Sheikhul Islam Ibnu Taimiyya yace: Abinda yafi bayyana shi ne Shafan Azzakari baya warare alwala, sai dai mustahabbi ne wanda ya shafi azzakarinsa ya sabunta alwala, amma wanda yayi sallah bai sabunta alwala ba Sallarsa tayi amma idan ya sabunta to hakan shi yafi. Majmu’u Fatawa: 21/222.

Dalilan wa’inda sukace Shafan Azzakari ko shafan farji baya warware alwala Shi ne Hadisin da aka rawaito daga ɗalk bin Ali (Allah ya ƙara masa yarda) yace: Munje wurin Annabi (Tsira da Amincin Allah su tabbata a gare shi mukayi masa mubaya’a, mukayi Sallah tare dashi. Lokacin da ya kammala sallah sai wani mutum yazo kaman mutumin ƙauye sai yace Ya Manzon Allah (Tsira da Amincin Allah su tabbata a gare shi) me kake gani game da Mutumin da ya shafi Azzakarinsa a Sallah? Sai Annabi (Tsira da Amincin Allah su tabbata a gare shi) Yace masa Shin Azzakarinka menene in ba Wani ɓangare ne na jikin ka ba? Abu dawud: 182. Annasa’i: 165.

Wannan Hadisi yana nuna cewa idan mace ta shafi farjinta ko namiji ya shafi Azzakarinsa da hannunsa to alwalar sa bai karye ba, domin Azzakarin sa kaman sauran gaɓɓan jikinsa ne. Kamar yadda Annabi (Tsira da Amincin Allah su tabbata a gare shi) yayi bayani a wannan hadisi.

Wurin haɗa wannan hadisi da wanda ya gabace shi wasu Maluman sun ɗauki umarni da Annabi (Tsira da Amincin Allah su tabbata a gare shi) yayi kan sabunta Alwala idan mutum ya shafi azzakarinsa a matsayin Mustahabbi ne ba wajibi ba saboda wannan hadisi na ƙarshe.

Wasu kuma sun banbance tsaƙanin shafan farji ko Azzakari, idan mutum ya shafa da Sha’awa to zai sake alwala idan kuma bai shafa da sha’awa ba, ba sai ya sake alwala ba. Wannan Hukunci da muka ambata ya shafi Ramin dubura. Duka Hukuncin su ɗaya.

A taƙaice abinda wannan Amsa ya ƙunsa shi ne: Wacce ta shafi farjinta ko Wanda ya shafi Azzakarinsa Da sha’awa To ya sake alwala, wanda kuma ya shafa ba da sha’awa ba to yana da kyau ya sake alwala. Idan kuma wacce ta shafi farjinta ko wanda ya shafi Azzakarinsa kuma akwai shamaki kaman ya shafa akan saman wandonsa to babu komai a kansa.

WALLAHU A'ALAM

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.