Hoton Gurbin Saɓanin Ma’aurata a Cikin Karin Magana

Daga

Shafa'atu Salihu Labbo
Abu-Ubaida Sani

Zamantakewa da ke gudana yau da kullum tsakanin mutane ba abu ne mai yiwuwa ba a iya kauce wa saɓani da rashin jituwa, musamman tsakanin ma’aurata (miji da mata) waɗanda suka fi kusanci da juna koyaushe fiye da sauran mutane. Akwai jerin karin magana da dama waɗanda suka yi nuni da dalilan da suke sa dole ne a samu saɓani a zamantakewa a wasu lokuta. Ga wasu daga cikin karin maganan kamar haka:

1. Zo mu zauna, zo mu saɓa

Wannan karin maganar tana nuni ƙarara da cewa matuƙar aka samu zamantakewa tsakanin al’umma, to ba makawa wata rana za a ci karo da saɓanin ra’ayi da fahimta saboda cuɗanya da mu’amalar rayuwa da take gudana tsakaninsu a zaman tare na yau da kullum. Wannan karin magana tana nuna cewa, a ko’ina sai an sanya haƙuri ake cin ribar wasu abubuwa, don haka shi ma aure ko zamantakewa harkar cuɗe-ni-in-cuɗe-ka ne, dole ne wata rana sai an sami saɓani, don haka, Hausawa suka ce tsakanin harshe da haƙuri ma sai an saɓa, suna la’akari da kusanci da ke tsakanin harshe da haƙori, to in dai za a samu saɓani to ko ina fa za a iya samu, sai dai maganin saɓanin shi ne haƙuri, “Haƙuri maganin zaman duniya”.

2. Ido wa ka rena? Wanda nike gani kullum

Wannan karin magana tana nuna cewa, a zamantakewa an fi samun yawaitar saɓani tsakanin makusanta kasancewar koyaushe suna tare da juna, to wannan sabo yana taka rawa sosai wajen samar da saɓani. Wannan karin magana tana nuna cewa, a zamantakewa akwai juriya, saboda shi zaman aure an gina shi ne da niyar har sai mai rabawa ta raba (wato mutuwa), don haka ko a kowane irin lokaci ana tare, ke nan tsakanin kishiyoyi da maigidansu za a iya samun irin wannan rainin ya shiga tsakaninsu saboda zamansu a tare a koyaushe. Don haka ba abin mamaki ba ne a samu raini tsakanin maigida da matansa ko kishiya da kishiyoyi.

3. Tsakanin harshe da haƙori ma ana saɓawa

Wannan karin magana tana nuna cewa komai kusancin mutane da kuma duk tsananin so da ƙauna tare da tausayin da suke yi wa junansu, a kwana a tashi, wata rana sai an samu saɓani. Alaƙar miji da mata, za ta iya yiyuwa a wani lokaci a samu saɓani, saboda kusancinsu da zama a tare a kowane lokaci.

4. ‘Da sabon gini gara yaɓe’ da ginar rijiya gara yasa’

Wannan karin magana tana nuna cewa yin haƙuri da ci gaba da juriya game da saɓanin da yakan faru yau da kullum tsakanin abokan zamantakewa, musamman miji da mata ya fi zama alheri bisa ga yanke wannan zamantakewar da nufin ƙulla wata sabuwar zamantakewa. Haka kuma, wannan karin maganar tana iya kallon idan miji ya saki matarsa, tana can tana zawarci, sai kuma kwatsam ya zo da maganar wani aure, to sai a nuna masa cewa, da ya yi wani sabon aure, gwara ya dawo da tsohuwar matarsa, wadda ya saka, wata ƙila ma ƙaddara ce ta raba auren, shi ne Hausawa ke cewa, ‘da ginar rijiya gwara yasa’ da kawo wata wadda ma ba a san halinta ba dole sai an tsaya an karance shi, ko kuma halinta ba mai kyau ba ne, to gwara wadda aka saba da ita, aka san halinta na zahiri da baɗini, na ciki da na waje.

Manazarta

Labbo, S.S. & Sani, A-U. (2025). Aure a ƙunshiyar karin magana. Amsoshi Academic Publishers. ISBN: 978-1-257-07209-5. DOI: https://doi.org/10.5281/zenodo.19513449