Damfarar Saka Hannun Jari a Kan Intanet (Investment Scams)

Daga

Abu-Ubaida Sani
Jibril Yusuf
Muhammad Sulaiman Abdullahi

Intanet ya zo da hanyoyin neman kuɗi daban-daban. Kamar yadda aka tattauna a babi na biyu na wannan littafin, akwai hanyoyi masu yawa na neman kuɗi a duniyar intanet. Wannan nau’in damfara yana fakewa a inuwar ire-iren kasuwancin neman kuɗi da ake da su a intanet domin ida baƙaƙen manufofinsa. Wannan yana nufin ‘yan damfara sukan fake da ƙarancin ilimin da mutane suke da shi game da yadda harkokin kasuwancin duniyar intanet suke gudana domin damfarar su.

Damfarar saka hannun jari ɗaya ne daga cikin nau’o’in damfarar da suka fi zama ruwan dare a kan intanet. Ya ƙara yaɗuwa musamman yanzu da harkokin kuɗaɗen duniyar intanet suke daɗa bunƙasa. Manazarta irin su Kuo & Tsang (2023) da Ramli et al. (2023) sun yi bincike dangane da wannan nau'in damfarar. Yana ɗaya daga cikin nau’o’in damfarar kan intanet wanda Hausawa masu yawa suka faɗa komarsu.[1]

Manyan makaman da masu wannan nau’in damfara suke amfani da su, su ne:

1. Sukan tsara kafar intanet mai kyau ɗauke da bayanai da hotuna da bidiyoyi masu jan hankali.

2. Sukan fito da tsarin kasuwancin da akan gina a kan biyan lada ga duk waɗanda suka yi gayyata (referrals). Bugu da ƙari, sukan saka bayanan riba mai kauri da za a samu a kasuwancin sannan su riƙa tura wannan ribar ga waɗanda suka yi rajista. Abin lura a nan shi ne, sukan yi amfani da kuɗaɗen rajistar sababbin mambobi ne wajen biyan waɗannan kuɗaɗe.

Ɗaya daga cikin ire-iren waɗannan kasuwancin damfara da yanzu haka ake yi shi ne 52U. Wani abin ban mamaki shi ne yadda har aka fassara kafarsu ta intanet zuwa Hausa. Hakan yana nuni ga yadda Hausawa da dama suke cikin harkar. A duba misali cikin hoton da aka kawo a ƙasa:

Hoto Na 3.8: Kafar intanet ta 52U cikin harshen Hausa

Madogara: Kafar 52U (https://www.52u.today/index.php)

Wani misalin damfarar saka hannun jari da aka yi a baya wanda ya ritsa da Hausawa masu yawa shi ne Dubai Gold Souk.[2] Ko bayan su akwai ire-iren waɗannan da aka yi da dama a baya. Dukkanninsu sun kafu ne a kan manufar ƙarya ta kasuwancin zamani wanda ake gudanarwa a duniyar intanet. Yawanci sukan fake da cewa, ana gudanar da kasuwancin ne da taimakon ƙirƙirarriyar basira.

---

[1] M.M. Manga (keɓantacciyar tattaunawa, 21 ga watan Agusta 2024) da A.M. Manga (keɓantacciyar tattaunawa, 21 ga watan Agusta 2024) da A. Sani (keɓantacciyar tattaunawa, 24 ga watan Agusta 2024).

[2] Y. Idris (keɓantacciyar tattaunawa, Janairu 2019) da A. Sulaiman (keɓantacciyar tattaunawa, 20 ga watan Agusta 2024) da A. Bello (keɓantacciyar tattaunawa, 20 ga watan Agusta 2024) da I.A. Isa (keɓantacciyar tattaunawa, 20 ga watan Agusta 2024).

Manazarta: 

Sani, A-U.,  Yusuf, J. & Abdullahi, M.S. (2025). Damfara a duniyar intanet. SAS Publishers. ISBN: 978-978-695-575-9. DOI: https://doi.org/10.5281/zenodo.19513307