Yadda Ango Zai Kasance A Daren Farko

𝐓𝐀𝐌𝐁𝐀𝐘𝐀❓

Please Da Allah mlm yaya kamata namiji ya kasance a daren farko na auransa domin na ji maganganu da yawa wasu since zai iya kusantar ilisa wasu sun ce ya bari sai bayan wasu kwanaki

𝐀𝐌𝐒𝐀❗️

A daren farko na aure, ana son namiji ya kasance mai nutsuwa, mai tausayi, da kuma fahimta. Maimakon gaggawar biyan bukata, ya kamata ya mayar da hankali wajen kwantar da hankalin amarya, gina jituwa, da kuma nuna ƙauna don samar da yanayi mai nishaɗi da kwanciyar hankali. Babban manufarka a wannan dare ba kawai sha'awa ba ce, illa gina kyakkyawar dangantaka da kwantar da hankalin matarka.

Ga wasu muhimman matakai da ya kamata ka bi don ganin daren ya kasance mai albarka da kwanciyar hankali:

Ka Kasance cikin shiri na musamman ta wajen yin wanka, saka tufafi masu kyau, da kuma sanya turare mai kanshi.

Bayan an watse an bar ku, ku biyu, abu na farko da ya kamata kuyi shi ne: shiga dakin da alwala sannan ku yi sallah raka'a biyu tare don godewa Allah (SWT) bisa ni'imar cika burinku.

Bayan sallah, zaka dafa goshin amaryarka a kanta ka karanta addu'ar da Manzon Allah (Sallallahu Alaihi Wasallam) ya koyar:

اللَّهُمَّ إِنِّي أَسْأَلُكَ خَيْرَهَا وَخَيْرَ مَا جَبَلْتَهَا عَلَيْهِ، وَأَعُوذُ بِكَ مِنْ شَرِّهَا وَشَرِّ مَا جَبَلْتَهَا عَلَيْهِ

"Ya Allah! Hakika ina roƙonka alherin wannan (mace) da kuma alherin abin da ka halicce ta da shi (na dabi'a), kuma ina neman tsarinka daga sharrinta da sharrin abin da ka halicce ta da shi. "

Yana da kyau ku dan ci wani abinci mai sauki kamar madara, kaza ko tsire da ka shigo da shi domin samun kuzari. Ku ci abinci tare da shayar da juna.

Yawancin sababbin amarya na zuwa da tsananin kunya, wanda hakan na iya sa su kasa sakewa da kai a daren farko. Kada ka nuna fushi ko gaggawa idan abubuwa ba su tafi yadda kake so ba. Ka tallafa mata, ka kuma ba ta lokaci har ta saki jikinta. Wajibi ne ka sani cewa daren farko na iya zuwa da gajiya ko fargaba. Dole ne ango ya kasance mai hakuri. Kada ka nuna gaggawa, domin hakan na iya kara tsorata ta. Kayi amfani da hikima da dabara wajen cire mata kunya a hankali. Mata sukan buƙaci lokaci don saba wa sabon yanayi.

Ku taɓa hira mai daɗi wacce za ta rage mata nauyi da tsoro. Hakan zai sa ta ji tana tare da amintaccen mutum. Ka nuna mata tsantsar soyayya, ka nuna mata kyakkyawar fuska da murmushi. Ka yabe ta, tare da debe mata kunya a hankali.

Idan har kun shirya fara saduwa, ya zama dole a kiyaye ladubban addini: Ku fara da addu'ar kusantar iyali:

اللَّهُمَّ جَنِّبْنَا الشَّيْطَانَ، وَجَنِّبِ الشَّيْطَانَ مَا رَزَقْتَنَا

"Ya Allah, Ka nishantar da mu da Shaidan, Kuma Ka nishantar da Shaidan da abin da Za Ka arzuta mu da shi (wato danyen jinjiri). "

An karbo wannan addu'a daga Manzon Allah (Sallallahu Alaihi Wasallam), kuma ana son ma'aurata su karanta ta kafin saduwa (jima'i), domin neman tsarin Allah ga zuri'ar da za ta iya kasancewa tsakanin ma'auratan a wannan lokaci.

Idan budurwa ce, ka fara da wasanni domin ta saki jikinta da kunya ta kau. Idan ta nuna alamun gajiya ko tsananin tsoro, ka ba ta dama. Zaku iya jinkirta saduwa har sai ta samu natsuwa sosai.

A irin wannan lokaci, tsananta tausayawa da yin a hankali shi ne babban makullin jin dadi na kwarai ga ku duka biyu.

WALLAHU A'ALAM

Zauren Fatawoyi Bisa Alkur'ani Da Sunnah. Ku kasance damu cikin wannan group domin Fadakarwa. . .

  ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.