Hukuncin Hadin Baki Da Likita Don Yaudarar Miji

𝐓𝐀𝐌𝐁𝐀𝐘𝐀❓

Assalamu Alaikum malam. Ina kwana. Don Allah ina tambaya ne 'yar uwata ce ta kasance mijinta na wadata amma gaskiya ba komai yake dauke mata ba to shi ne ta yanke shawara zuwa asibiti su hada baki da likitan akan ba ta da lafiya domin ya tura kudin idan ya tura kudin sai ta yi bukatunta na rayuwa da shi. Na gode

HAƊIN BAKI DA LIKITA DON YAUDARAR MIJI:

𝐀𝐌𝐒𝐀❗️

Wa alaikumussalam warahmatullahi wabarakatuhu

Fitar da kudi ko dukiyar iyali ta hanyar yaudara ko haɗin baki da likita don a amfana ba bisa ka'ida ba, ya saɓa wa koyarwar addini da kuma da'a ta likitanci.

Hanyar ta fi dacewa ita ce ta tattaunawa da mijin cikin gaskiya da hikima domin samun biyan bukata a buɗe.

Ki zauna da mijinki ki bayyana masa hakikanin bukatun da kike da su cikin lumana. Ko ki nemi taimako a wurin iyaye ko manyan 'yan uwa amintattu don su shiga tsakani su yi masa bayani zai iya haifar da da mai ido.

A addinance, yaudarar miji ko amfani da kudaden da aka samu ta hanyar karya haramun ne. Dukiyar da aka samu ta wannan hanya ba ta da albarka kuma tana iya jefa rayuwa cikin tsaka mai wuya.

Haɗin baki da likita don rubuta karya ko jirkita gaskiya game da lafiyar mutum babban laifi ne dake karya ka'idojin aikin likita (Medical Ethics). Idan aka gano wannan haɗin baki, likitan na iya rasa lasisinsa na aiki, yayin da ke iya jawo babban rashin jituwa ko ma shari'a tsakanin ma'aurata.

Wannan dabi'a na iya zama dalilin da zai sa zaman auren ya gagara, har ta kai ga neman a raba auren saboda rashin amana da rashin gaskiya.

Maimakon amfani da dabaru ko yaudara, yana da kyau ki bi hanyoyin gaskiya wajen neman hakki ko bukata a gidan aure, domin samun kwanciyar hankali da albarka.

Idan har yaudarar ta samo asali ne saboda mijinki yaƙi ciyar da ke da 'ya'yanki yadda ya kamata duk da yana da hali, to kina da izinin ki ɗauki gwargwadon abin da zai ishe ki da 'ya'yanki ta hanyar adalci ba tare da wuce gona da iri ba saboda Nana A'isha Allah ya qara mata yarda ta ruwaito hadisi cewa: Lallai Hindu ƴar Utbata ta ce: Ya Manzon Allah (Sallallahu Alaihi Wasallam) lallai Abu Sufyana ya kasance mutum ne maqeqe, ba ya ba ni abin da zai ishe ni da ƴaƴana, face sai abin da na ɗauka daga wurinsa bai sani ba, sai Manzon Allah Sallallahu Alaihi Wasallam ya ce: "Ki ɗauki abin da zai ishe ki da ƴaƴanki tare da kyautatawa". Bukhariy 5364.

Wannan hukuncin ya keɓanta ne kaɗai ga matar da mijinta ba ya ciyar da su yadda ya dace saboda maqo alhali yana da hali. Amma duk matar da mijinta ke ba su haqqoqin ciyarwa gwargwadon hali, to idan ta ɗebi kuɗin mijinta bai sani ba ta yi amfani da su, tabbas ta ci haramun, sai ta biya shi gobe Alqiyama, kuma abin da ta yi sunansa ha'inci, ko zamba cikin aminci.

Duk matar da ta saci kudin mijinta, ko ta yaudare shi ta hanyar karya don ta karbi kudinsa don wani dalili na daban, ana yi mata hukuncin barauniya ne kuma ta ci amanar aure. Dole ne ta tuba ta hanyar neman gafarar Allah da kuma maida kudin ga mijinta. Idan mijin bai san da batun ba, dole ta nemo hanyar da kudin zasu koma hannunsa ba tare da ta haifar da wata babbar fitina ba.

WALLAHU A'ALAM

Zauren Fatawoyi Bisa Alkur'ani Da Sunnah. Ku kasance damu cikin wannan group domin Fadakarwa... 

  ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.