Yadda Ake Wankan Gawa (Jana'iza)

𝐓𝐀𝐌𝐁𝐀𝐘𝐀❓

Assalamu Alaikum Warahmatallahi Wabarkatahu

Malam yaya ake yin wankan gawa (jana'iza)

𝐀𝐌𝐒𝐀❗

Wa'alaikumus salam Warahmatallahi Wabarkatahu

An so duk wani Musulmi yasan yadda ake wankan gawa, abin da zai ba mu mamaki shi ne, Musulmai da yawa wallahi basu san yadda ake wankan gawa ba. Kuma abin baƙin cikin harda ɗaliban ilimi akwai wanda basu iya ba.

Wanda zai yi wankan gawa an fi so ya zama mutun baligi, kuma mai amana, ba wanda zai je ya dinga surutu akan wani abu daya gani a jikin mamacin ba, ya kasance mai kame bakin sa akan wannan gawa da ya yi wa wanka, sannan anso a ce idan namiji ne ya mutu to maza su wanke shi, kamar yadda shari’a ta tanada, in mace ce ya zama mata, kuma anfi so makusantan mutun suyi ma gawarsa/ta wanka. A wankan gawa ana buƙatar mutane 3 ko 4 su wanke ta.

Ana yin wankan gawa mara-mara ne misali:

Sau 3 ko 5 ko 7 ko 9. Waɗanda za su yi wa mamaci wanka su za suyi la’akari suga wanka nawa yadace suyi masa.

Da farko dai kafin a fara wankan da akwai abubuwa guda 3 da za a fara yi wa mamacin. Sune kamar haka:

1. za a cire masa suturar da take jikinsa, amma za a sami dan kyalle a rufe masa al’aurarsa.

2. Sai kuma a yi masa tsarki, na ɓangaren mafuta biyu. (Bawali da Gayadi).

3. Idan macece, za a tsefe kitson da yake kanta, a wanke kan, sannan a yi Lallabi 3 a kan ( wato Kalba guda 3). Sai a kwantar da Kalbar ta yi bayan kan nata. Idan namiji mai kitso ne sai a warware kitson gaba ɗaya.

Idan masu yi wa mamaci wanka sun zaɓi suyi masa wanka sau 3, to bayan sun gama abubuwan da suke sama saisu fara wankan.

Da farko dai za su tanadi ruwa kashi 3, kowanne ruwa za'ayi wanka ɗaya da shi.

1. RUWAN FARKO: Wannan wankan za'ayi wa mamacine wanka irin Wankan Janaba. Da farko za a fara yi wa mamaci alwalane, kamar irin alwalar Sallah, sai dai wajen kuskurar baki da shakar hanci za a shafa masa ruwane kawai a bakin da hancin. Bayan an yi masa alwala, sai kuma azuba ruwa a kansa a wanke masa har sau uku, sannan. kuma a wanke tsagin jikinsa na dama sannan na hagu.

2. RUWA NA BIYU: Bayan an yi masa wanka na sama wato na Janaba, sai kuma asami Sabulu ko Magarya ko Kanwa, a wanke mamacin da shi. Wato za a sami Soso da Sabulu a cuda jikinsa sosai (Kamar dai yadda ake wanka irin na Soso da Sabulu, sai dai za a iya amfani da Magarya ko Kanwa a maimakon Sabulun). Bayan angama cuda shi sai a dauraye Kumfar da wannan ruwan.

3. RUWA NA UKU: Bayan an yi masa wanka na sama, wato na Soso da Sabulu, to sai kuma a sami ruwa na karshe wato na Uku a zuba Turare mai kamshi (Sosai) a ciki, sannan sai a wanke mamaci da shi. Amfi son a yi amfani da Turaren Kafur, to amma idan ba a same shiba to za a iya amfani da duk wani Turare mai kamshi sosai. Bayan angama wankan Turaren, sai a tsane jikin mamacin asa masa Likkafani.

Idan masu yi wa mamaci wanka sun zaɓi su yi masa wanka 5, ko 7, ko 9. To wanka na biyu(2) wato na soso da sabulu shi za su yi ta maimaitawa. Amma dolene na Janaba shi ne a Farko, sannan na Turare shi ne a karshe.

misalin yadda za a yi wankan sau biyar (5).

1. Na farko shi ne na Janaba

2. Na biyu shi ne na soso da sabulu

3. Na uku shi ne na soso da sabulu

4. Na Huɗu shi ne na Soso da Sabulu

5. Na Biyar shi ne na Turare.

FALALAR WANKAN GAWA:

Al-Imam Hakim ya rawaito hadisi wanda Manzon Allah (Sallallahu Alaihi Wasallam) yake cewa: ‘’Duk wanda ya wanke mamaci, kuma ya rufa masa asiri, Allah Zai gafarta masa sau arba’in.’’

A wani hadisin kuma Manzon Allah (Sallallahu Alaihi Wasallam) Yace: ”Duk wanda ya wanke mamaci kuma yarufa masa asiri, to Allah zai tufatar da shi daga cikin tufafin Gidan Aljannah Kwarra, (wato Launin Tufafin).

YA UBANGIJI KASA MU CIKA DA IMANI AMIN.

Zauren Fatawoyi Bisa Alkur'ani Da Sunnah. Ku kasance damu cikin wannan group domin Fadakarwa...

CIKAKKEN BAYANI KAN YADDA AKE WANKAN GAWA (JANA'IZA) DA LADABANSA

𝐓𝐀𝐌𝐁𝐀𝐘𝐀❓

Assalamu Alaikum. Malam don Allah a fadaɗa mana bayani kan yadda ake wankan gawa daki-daki. Menene shari'a ta tanada game da adadin ruwan da za a yi amfani da shi, da kuma wane irin turare ne ya kamata a sanya? Sannan mene ne ladan wanda ya wanke dan uwansa Musulmi?

𝐀𝐌𝐒𝐀❗

Wa alaikumus salam wa rahmatullahi wa barakatuhu.

Wanke mamaci (Ghuslul Mayyit) farali ne na kifaya (Fardul Kifayah) a kan Musulmai. Wannan aiki ne na ban girma da karramawa ga dan Adam wanda Allah Ya girmama shi. Yana da matukar muhimmanci kowane Musulmi ya san yadda ake yin sa, domin hakan yana tabbatar da cewa an sallami dan uwa zuwa ga Mahaliccinsa cikin tsafta da mutunci.

1. Sharuɗɗan Masu Yin Wankan

Ba kowa ne ya kamata ya shiga dakin wankan gawa ba. Akwai wasu siffofi da shari'a ta fi so ga mai wankan:

• Kasancewa Amintacce: Dole ne ya zama mai tsoron Allah, wanda ba zai fito yana fadin aibin da ya gani a jikin gawar ba (kamar canjin launi ko wari).

• Sanin Hukunci: Ya kasance ya san yadda ake wankan a Musulance.

• Mafi Kusanci: In zai yiwu, makusantan mamaci (kamar dansa, mahaifinsa, ko dan uwansa) su ne suka fi dacewa.

• Jinsi: Namiji ya wanke namiji, mace ta wanke mace. Ban da miji da mata, kowannensu na iya wanke dan uwansa domin Annabi (SAW) ya gaya wa Aisha (R.A) cewa da ita ta riga shi mutuwa shi zai wanke ta.

2. Matakan Farko Kafin Fara Wankan

Kafin a fara zuba ruwa, akwai wasu abubuwa da ya kamata a yi:

1. Sanya Sutura: Za a cire masa tufafin da ya mutu da su, amma a sanya wani kyalle (Satarul Awrah) wanda zai rufe daga cibiya zuwa gwiwa ga maza, ko kuma dukkan jiki ga mata ban da wurin da ake bukatar wankewa.

2. Lankwasa Gabobi: Idan har yanzu gabobin a lankwashe suke, a hankali za a lankwasa su domin samun saukin wankan.

3. Tsefe Gashi: Idan mace ce, za a tsefe kitson kanta a raba shi gida uku (kamar yadda aka yi wa 'yar Manzon Allah SAW lokacin da ta rasu).

3. Tsarin Wankan Daki-daki

Ana son a yi wankan gawa mara-mara (sau 3, 5, ko 7) gwargwadon bukata. Ga tsarin wankan:

A. Matakin Tsarki (Istinja'i): Za a dan daukaka kirjin mamacin kadan, a matsa cikinsa a hankali domin idan akwai sauran bayan gida ko fitsari ya fito. Daga nan, mai wankan zai sanya safar hannu (gloves) ko kyalle, ya wanke masa mafitunsa guda biyu (gaba da baya) da ruwa sosai.

B. Alwalar Jana'iza: Za a yi wa mamaci alwala irin ta sallah, amma ba a shigar da ruwa cikin baki ko hanci. Maimakon haka, za a jika kyalle a shafa masa a cikin bakin da hancinsa. Daga nan sai a karasa alwalar gaba daya.

C. Wanka na Daya (Ruwa da Magarya/Sabulu): Za a fara wanke kan mamacin da gemunsa da kumfar sabulu ko magarya. Daga nan sai a fara wanke barinsa na dama (bangaren kirji, ciki, da kafa), sannan a juya shi ya kwanta da barin hagu domin wanke bayansa na dama. Haka za a yi wa barin hagu ma.

• Hujja: Manzon Allah (SAW) ya ce wa mata lokacin da suke wankan 'yarsa:

 ابْدَأْنَ بِمَيَامِنِهَا وَمَوَاضِعِ الْوُضُوءِ مِنْهَا

"Ku fara da bangarenta na dama, da kuma wuraren alwala na jikinta." (Sahihul Bukhari: 1255).

D. Maimaita Wankan (Idan Akwai Bukata): Idan gawar tana da bukatar karin tsafta, za a sake wanke ta sau biyu ko uku da ruwan sabulu ko magarya.

E. Wanka na Karshe (Ruwa da Kafur/Turare): Wankan karshe ya kasance ruwa ne tsantsa wanda aka sanya masa turaren Kafur (Camphor). Shi Kafur yana sa jikin gawa ya yi tauri, ya yi kamshi, kuma yana korar kwari.

• Hujja: Annabi (SAW) ya ce:

 وَاجْعَلْنَ فِي الْآخِرَةِ كَافُورًا أَوْ شَيْئًا مِنْ كَافُورٍ

"Kuma ku sanya a (wankan) karshe kafur, ko wani abu na kafur." (Sahih Muslim: 939).

4. Falalar Wanke Gawa da Rufa Mata Asiri

Wanke gawa yana da lada mai tarin yawa muddin mai yin sa ya yi don Allah kuma ya rufa wa mamacin asiri.

عَنْ أَبِي رَافِعٍ رَضِيَ اللَّهُ عَنْهُ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: مَنْ غَسَّلَ مَيِّتًا فَكَتَمَ عَلَيْهِ غَفَرَ اللَّهُ لَهُ أَرْبَعِينَ مَرَّةً

Daga Abu Rafi' (R.A) ya ce: Manzon Allah (SAW) ya ce: "Duk wanda ya wanke mamaci, sannan ya boye (asirinsa/abin da ya gani na aibi), Allah zai gafarta masa sau arba'in." (Al-Hakim ya ruwaito shi kuma ya inganta shi).

Wannan gafara tana tattare ne da sharadin cewa mai wankan ba zai tafi yana fadin cewa: "Naga gawar wane ta baki" ko "Ta yi wari" ba.

5. Muhimman Abubuwan Lura

• Rashin Ruwa: Idan babu ruwa kwata-kwata, za a yi wa gawar Taimama.

• Gawar da Ta Lalace: Idan gawar ta rube ko ta kone ta yadda wankewa zai ruguza jikinta, za a dan zuba mata ruwa ne kawai idan zai yiwu, in ba haka ba a yi mata Taimama.

• Shahidi: Wanda ya rasu a fagen yaki (Shahidul Ma'arakah) ba a yi masa wanka kuma ba a yi masa sallah a mazhabobi da dama; ana binne shi ne da jininsa da tufafinsa.

𝐊𝐚𝐦𝐦𝐚𝐥𝐚𝐰𝐚

Bayan an kammala wankan, za a tsane jikin mamacin da kyalle mai tsafta kafin a sanya masa likkafani. Ya Ubangiji, Ka sa mu cika da imani, kuma Ka sanya mu cikin wadanda za a yi wa kyakkyawan wanka da sallah lokacin da kwananmu ya kare.

WALLAHU A'ALAM

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.