Shin Alkunuti A Bayyane Ake Yi Ko A Asirce?

𝐓𝐀𝐌𝐁𝐀𝐘𝐀❓

Assalamu alaikum Warahmatullah wabarkatuhu, malam barka da wuni. Allah ya kara ilimi da basira. Malam tambaya mine ne zance mafi inganci a kan alƙunut bayyanawa ake yi ko asirtawa?

𝐀𝐌𝐒𝐀❗

Wa'alaikumus Salámu Wa Rahmatullah. Amin na gode 'yar uwa, Allah ya ba da lada. A game da al'amarin alƙunuti tabbas ya tabbata daga cikin shiryarwar Manzon Allah Sallallahu Alaihi Wasallam cewa ya yi alƙunuti a bayyane, kuma ya yi a asirce. Amma asirtawarsa ta fi bayyanarwarsa yawa, kamar yadda ma rashin yin Alƙunutinsa a sallah ya fi yinsa yawa kamar yadda Ibnul Ƙayyim ya bayyana a cikin littafinsa Zaadul Ma'aad (1/264).

Saboda haka, 'yar uwa duk wanda mutum ya ɗauka ya aikata ba za a ce masa ya yi kuskure ba ke nan a zance mafi inganci, tun da an tabbatar da cewa an taɓa kiyaye duka kaifiyyoyi guda biyun daga Manzon Allah Sallallahu Alaihi Wasallam, sai dai yawan asirtawarsa ta fi yawan bayyanarwarsa, kuma rashin yin alƙunut ɗin nasa ma ya fi yinsa yawa, saboda haka ke nan ba maganar a ce a doge a yi ta yin alƙunuti din-din-din, sai dai a yi na zuwa wasu lokuta a dakata.

Allah Ta'ála ne mafi sanin dai-dai.

Jamilu Ibrahim, Zaria.

Zauren Fatawoyi Bisa Alkur'ani Da Sunnah. Ku kasance damu cikin wannan group domin Fadakarwa...

ƘARIN BAYANI

SHIN ALƘUNUTI A BAYYANE AKE YI KO A ASIRCE A CIKIN SALLAH?

𝐓𝐀𝐌𝐁𝐀𝐘𝐀❓

Assalamu Alaikum wa Rahmatullahi wa Barakatuh malam. Allah Ya ƙara maka ilimi da basira. Ina da tambaya dangane da alƙunuti a cikin sallah: shin ya fi dacewa liman ko mai sallah ya yi addu’ar alƙunuti a bayyane (da ɗaga murya) ne ko kuma a asirce (a hankali)? Wanne ne ya fi inganci a cikin koyarwar Sunnah?

𝐀𝐌𝐒𝐀❗️

Wa Alaikumus Salam wa Rahmatullahi wa Barakatuh. Allah Ya saka da alheri, kuma Ya ƙara mana fahimtar addini.

Game da al’amarin alƙunuti a cikin sallah, malamai sun bayyana cewa duka hanyoyi biyu — wato yin sa a bayyane ko kuma a asirce — sun zo daga Sunnah ta Manzon Allah ﷺ. Saboda haka, idan mutum ya yi alƙunuti a bayyane ko a asirce, ba za a ce ya yi kuskure ba, domin dukkaninsu suna da asali a koyarwar Annabi ﷺ.

A wasu hadisai an rawaito cewa Annabi ﷺ ya kasance yana yin alƙunuti yana addu’a a bayyane musamman a lokutan Alƙunutun Nazilah, wato lokacin da wata musiba ko wata matsala ta sami Musulmi. An rawaito daga Abu Hurairah (Radiyallahu Anhu) cewa:

« كَانَ رَسُولُ اللَّهِ ﷺ إِذَا أَرَادَ أَنْ يَدْعُوَ عَلَى أَحَدٍ أَوْ يَدْعُوَ لِأَحَدٍ قَنَتَ بَعْدَ الرُّكُوعِ »

Ma’ana:

“Manzon Allah ﷺ idan yana son yin addu’a a kan wasu ko kuma yi wa wasu addu’a, yakan yi alƙunuti bayan ruku’u.”

(Sahih Al-Bukhari da Sahih Muslim)

A irin wannan yanayi sau da yawa liman yana yin addu’ar alƙunuti da ɗaga murya domin jama’a su ji kuma su ce “Amin”.

Sai dai kuma malamai sun bayyana cewa a wasu lokuta Annabi ﷺ yana yin addu’o’in sallah cikin sirri, musamman idan mutum yana yin sallah shi kaɗai. Allah Maɗaukakin Sarki ma Ya koyar da cewa:

ادْعُوا رَبَّكُمْ تَضَرُّعًا وَخُفْيَةً

Ma’ana:

“Ku roƙi Ubangijinku cikin ƙasƙantar da kai da kuma a ɓoye.”

(Suratul A’raf: 55)

Saboda haka, yin addu’a a asirce ma yana da asali a cikin koyarwar addini.

Malamai kamar Ibnul Qayyim a cikin littafinsa Zaadul Ma’aad sun bayyana cewa Annabi ﷺ ya yi alƙunuti a wasu lokuta, amma ba ya yin sa a kowane lokaci. Wannan yana nuna cewa alƙunuti ba wajibi ba ne a kowace sallah, sai dai ana yin sa a wasu lokuta kamar lokacin bala’i ko wani yanayi na musamman, ko kuma a wasu sallah kamar Witr kamar yadda wasu malamai suka karɓa.

Saboda haka, mafi ingancin fahimta ita ce:

Idan liman yana jagorantar jama’a, yana iya yin alƙunuti a bayyane domin jama’a su amsa da “Amin”. Amma idan mutum yana sallah shi kaɗai, yana iya yin sa a hankali a asirce. Duka biyun sun halatta kuma suna da asali daga Sunnah.

Saboda haka bai kamata Musulmi su yi sabani mai tsanani a kan wannan al’amari ba, domin duka hanyoyin sun tabbata a cikin koyarwar Annabi ﷺ.

Wallahu A’lam.

Jamilu Ibrahim, Zaria.

Zauren Fatawoyi Bisa Alƙur’ani Da Sunnah.

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.