Hukuncin Kwallon Kafa A Matsayin Sana’a

𝐓𝐀𝐌𝐁𝐀𝐘𝐀❓

As-Salaam Alaikum Wa Rahmatul Laah. Malam don Allaah: Shin ko yin ‘football as a profession’ (Watau: Ƙwallon ƙafa a matsayin sana’a) ya halatta?

ƘWALLON ƘAFA A MATSAYIN SANA’A

𝐀𝐌𝐒𝐀❗️

Wa Alaikumus Salaam Wa Rahmatul Laah Wa Barakaatuh.

A asali wasannin motsa jiki, kamar ƙwallon ƙafa sun halatta Musulmi ya shiga ya yi su, matuƙar dai manufarsa motsa jiki ne don samun ƙarin ƙarfin jiki kawai, kamar yadda Manzon Allaah (Sallal Laahu Alaihi Wa Alihi Wa Sallam) ya ce:

« الْمُؤْمِنُ الْقَوِىُّ خَيْرٌ وَأَحَبُّ إِلَى اللَّهِ مِنَ الْمُؤْمِنِ الضَّعِيفِ »

Mumini mai ƙarfi shi ya fi alheri kuma ya fi soyuwa a wurin Allaah fiye da Mumini mai rauni. (Sahih Muslim: 6945)

Amma malamai masana da suka yi nazari a cikin al’amarin wasanni kamar yadda su ke a yau sun gano wasu manyan matsalolin da suke ƙunshe musamman a cikin ƙwallon ƙafa, kamar waɗannan:

1. Ana amfani da ƙwallon ƙafa wurin raba kan al’umma, ta yadda ake samun Musulmi ’yan gida ɗaya masu sallah a masallaci ɗaya amma sun rarrabu gida-gida: Wannan na goyon bayan waccan ƙungiyar ƙwallo wancan kuma na goyon bayan waccan. A ƙarshe kuma abin har yakan kai ga zage-zage da faɗace-faɗace, har ma da kashe-kashe a wasu lokuta da wurare!

2. Ɗaruruwan dubunnai ko ma miliyoyin masu sha’awar wasan ƙwallo ba masu buga wasan ba ne, amma dai masu kallo da zuga da goyon-baya ne kawai. Wannan kuwa ba abu ne da musulunci ya koyar ko ya kwaɗaitar ba. A ce mutane su zauna ba don kallon Alƙur’ani ko Hadisi ko wani malami mai koyar da su Littafi mai amfani ba. A’a, wai kawai suna kallon wani wasa ne da babu wani lada ko la’ada a cikinsa da za su samu, sai dai asara kawai!

3. Yawancin lokuta daga wannan kallon ne wani ke rasa ransa, saboda tsananin baƙin ciki da ɓacin zuciya a kan an ci ƙungiyar da yake mara wa baya. Ko dai ta hanya fashewar zuciyarsa, ko kuma ta hanyar kashe kansa da kansa, kamar yadda ake ji da gani a kullum.

4. A wurin kallon wasan ƙwallo ana jin yadda masu kallon ke sakin bakunansu wurin yin alfasha da munanan kalmomi na zagi da sukan sashen masu wasa ko kuma sashen alƙalan wasan saboda wani abin da suka ga ya auku ba daidai ba a wurinsu. Ga kuma ƙazafi da tsinuwa da ihu da fito da sauran abubuwan da suka yi hanun-riga da koyarwar musulunci.

5. Wasan ƙwallo yana cutarwa da masu yinsa a wasu lokuta, ta yadda akan samu miki ko jin-ciwo ko karaya a kai ko hannu ko ƙafa. Wani lokaci ma waninsu kan faɗi ya suma na tsawon mintuna, wanda kuma hakan kan kai wasun su ga hallaka!

6. A baya-bayan nan ya tabbata cewa wasu, ko kuma ma yawancin ’yan wasan ƙwallo suna amfani da ƙwayoyi ko magungunan ƙara kuzari, yadda wai suke iya burgewa a wurin wasan. Yawancin waɗannan magungunan kuwa masu cutarwa ne ga jiki da lafiya ko dai a nan kusa ko kuma a nesa.

7. Wasan ƙwallo na daga cikin abubuwan da suke kange jama’a masu yawa daga zikirin Allaah da yin sallah a sadda da yadda ya dace. An sha ji da ganin yadda mutane masu yawa sukan tashi da tsakar dare domin kallon ƙwallo a cikin talbijin, a ƙarshe kuma su rasa samun sallar Asubah a kan lokaci ko a cikin jama’a!

8. Akwai lokutan da masu kallon wasan ƙwallo ke yin tafiya mai nisa daga wani yankin duniya zuwa wani, ko daga wata ƙasa zuwa wata, ko daga wani gari zuwa wani. Wani lokaci ma hakan kan kasance a ranakun Jumma’a, wanda kuma kan janyo wasu su rasa halartan sallar ta Jumma’a saboda dalilin ƙwallo!

9. Ta hanyar wasannin da ƙwallon ƙafa ke daga cikin manyansu, maƙiya suka samu daman dakushewa da raunana ƙarfin musulunci hatta a ƙasashen Musulmi, ta yadda ake kashe ma ƙudan kuɗaɗe masu yawa a wurin shiryawa da sayen kayan wasa da ’yan wasa. Kuɗaɗen da za a kashe su wurin ayyuka masu muhimmanci da amfani, kamar ta wurin koyar da sana’o’i masu muhimmanci ga mata sanmu, to da kuwa al’ummarmu ta samu ɗaukaka da ƙarin cigaba sosai.

10. Sannan kuma ta hanyar yayata wasanni da yawaita su da sauƙaƙe hanyoyin samunsu a cikinmu ne maƙiyanmu suka iya shagaltarwa da kawar da hankulan Musulmi a kan ƙoƙari wurin yin aikin domin ɗaukaka addinin musulunci a ko’ina a cikin duniya, kamar yadda suka bayyana haka a fili ƙarara a cikin littafin da suka kira: Jewish Conscipiracy (Makircin Yahudawa).

11. A cikin wasanni irin na ƙwallon ƙafa ’yan wasa maza ko mata suna buɗe cinyoyinsu a fili a gaban ’yan kallo maza da mata. Kuma abu ne sananne a koyarwar Musulunci cewa cinya al’aura ce a jikin namiji wadda ta haramta ga duk wanda ba muharraminsa ba ya kalle ta. To, ina kuma ga cinyar mace a gaban jama’a maza da mata?! A wane musulunci ne wannan ke halatta!

12. Ta hanyar wasanni irin na ƙwallon ƙafa ne maƙiya suka ci nasarar sauya tunanin wasu shugabannin Musulmi da mabiyansu game da yadda haƙiƙanin yadda al’amura su ke, ta yadda a yau ake ɗaukar fitattun mutane jarumai abin nunawa a cikin jama’a su ne ’yan wasa kawai! Maimakon yadda su ke a asali watau mujahidai masu himma da ƙaƙarin kare garuruwa da mutuncin al’umman Musulmi a ko’ina.

13. A wannan zamanin fannin wasan ƙwallo ya zama ɗaya daga cikin fannonin da ake koyo da koyarwa a cikin makarantu, fiye ma da yadda ake koyo da koyar da Alƙur’ani da sauran ilmomi masu muhimmanci da amfani ga al’umma. Malamai kuwa cewa suka yi: Idan har ilimi maƙasƙanci ya zama mai gogayya da ilimi mafifici, idan kuma har ya kai ga yana iya raunana mafificin, to a nan ko shakka babu wannan maƙasƙancin ya zama haram!

14. A yau wasan ƙwallon ƙafa ta zama wata hanyar yin caca a tsakanin jama’a, ta yadda mutane masu yawa a duniya, har a cikin birane da ƙauyukanmu suke shiga wannan harkar domin nema ko fatan cin kuɗaɗe masu yawa.

Ko a kwanan baya akwai matashin da ya samu kuɗaɗen mahaifinsa suka shiga hannunsa, kuɗaɗen da shi kansa ya san da su ne za a samu abin da za a yi cefanen da za a yi amfani da shi a gidan, amma kuma sai wannan yaron ya je ya salwantar da su duk a wannan irin cacar! Sannan kuma ya je ya yi wa mahaifin ƙaryar cewa wai kuɗaɗen sun ɓace!

(Kurratun Ƙadam Bainal Masaalih Wal Mafaasidis Shar’iyyah, shafi: 25-41 na As-Shaikh Mash-huur Bn Hasan Al-Salmaan (Hafizahul Laah)).

Idan kuwa har waɗannan su ne sharrorin da suke ƙunshe a cikin wasan ƙwallon ƙafa, to ta yaya malamai za su iya bayar da fatawar cewa wai ya halatta wani Musulmi ya mayar da wannan wasan sana’arsa da zai rayu a kanta, kuma ya riƙa ciyar da kansa da iyalinsa ta haka?!!

Allaah ya ƙara mana shiriya da fahimta a cikin addininmu.

WALLAHU A'ALAM

Sheikh Muhammad Abdullaah Assalafiy

Zauren Fatawoyi Bisa Alkur'ani Da Sunnah. Ku kasance Damu...

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.