Nau'o'in Kafirci Da Ilhadi Da Suka Yi Tasiri Ga Sufanci

Duk da cewa; tun farko Sufanci ya faro ne daga karkacewar masu son yin Zuhudu, a lokacin da suka cakuda shi da Bidi'o'i da Almarori, to saboda karkacewa daga Tafarkin Sunna da Shari'a a Zuhudu sai kuma karkacewar ta yi ta karuwa karuwa mai yawa kuma mai matukar muni, ta yadda sai da aka wayi gari ya cika da munanan Aqidu da Ilhadin 'Yan Falsafa da Kafircin Kiristoci.

Daga cikin mummunan karkacewa da Sufanci ya yi, Kiristanci ya yi tasiri a cikinsa, saboda cakuduwar Sufayen da Kiristoci masu bauta a Kasar Sham, inda suka fara sanya tufafi irin nasu, da wasu kayayyakin sawa a jiki da masu bautan Kiristocin suke amfani da su. Da "uzla" kauracewa wa mutane, da "khalwa", da kin aure, da sauran abubuwa da Kiristoci suke yi na Ruhbananci da suka kirkira.

Haka suka dauki Aqidar "Hululi" (Allah yana shiga jikin halittu) daga Kiristoci, kamar yadda Hallaj ya shigo da ita cikin Sufancin, da kuma Aqidar "Ittihadi" (KOMAI ALLAH NE), kamar yadda Ibnu Arabiy da sauran abokansa suka shigo da su.

Haka kuma suka fara amfani da Kalmomin Kiristanci, kamar; "Lahuut", "Nasuut", "Rahbuut" da sauransu.

Wani babban Shehin Sufaye, Dr. Abul Wafa'i Al-Taftazaniy ya ce:

فنحن لا ننكر تأثر بعض الصوفية المتفلسفين بالمسيحية، على نحو ما نجد عند الحلاج الذي استخدم في تصوفه اصطلاحات مسيحية كالكلمة واللاهوت والناسوت وما إليها

مدخل إلى التصوف الإسلامي (ص: 29)

"Mu ba ma inkarin tasirantuwar wasu Sufaye 'Yan Falsafa da Kiristanci, kamar yadda muka samu a wajen Hallaj, wanda ya yi amfani da ma'anonin Kiristanci a cikin Sufancinsa, kamar "Kalma" (Kiristoci suna cewa; kalmar Allah ce ta shiga jikin Annabi Isa (AS)), "Lahuut", "Nasuut" da makamantansu".

Kai hatta Aqidar Trinity (Allah uku) ta Kiristoci an samu a cikin Sufanci, inda Ibnu Arabiy ya ce:

تثلَّثَ محبوبي وقد كان واحداً * كما صير الأقنام بالذات أقنما

Haka Sufanci ya tasirantu da Falsafar Hindu da ta Farisanci, ta hanyar Saharawardiy, wanda ya shigar da Falsafar gabashi cikin Sufancin. Inda suka shigar da abin da ya shafi "Ruhanai", da "Tanasukh", da sauransu.

Babban Shehin Sufaye, Mahmud Abul Faidh Al-Manufiy ya tabbatar da haka inda ya ce:

وأكثر الصوفية الأعاجم خلطوا بين الفلسفة الفارسية القديمة أو الهندية وما قبسوه عن اليونانية والأفلاطونية الحديثة وبين تصوفهم الخاص، وقد تأثر أمثال أولئك ببراهمة الهند والفرس في أزيائهم وطقوسهم، واعتنقوا من أفكارهم

جمهرة الأولياء وأعلام أهل التصوف (1/ 266 - 267).

"Mafiya yawan Sufaye Ajamawa sun cakuda tsohuwar Falsafar Farisa ko Falsafar Hindu, da abin da suka tsakuro daga Falsafar Girka da sabuwar Falsafar Plato, sun cakuda su da Sufancinsu. Kuma irin wadannan Sufaye sun tasirantu da Barahiman Hindu da Farisawa a tufafinsu (na Sufanci) da aiyukan Ibadunsu, kuma suka rungumi tunaninsu".

Haka Falsafar Girka ta yi tasiri cikin Sufanci, ta hanyar sabuwar Falsafa Plato, inda suka dauko Aqidar "Wahdatul Wujudi" (KOMAI ALLAH NE) da nazariyyar "Faira" daga gare shi.

Babban Shehin Sufaye, Dr. Abul Wafa'i Al-Taftazaniy ya ce:

ونحن لا ننكر الأثر اليوناني على التصوف الإسلامي، فقد وصلت الفلسفة اليونانية عامة، والأفلاطونية المحدثة خاصة، إلى صوفية الإسلام عن طريق الترجمة والنقل، أو الاختلاط مع رهبان النصارى في الرها وحران. وقد خضع المسلمون لسلطان أرسطو، وإن كانوا قد عرفوا فلسفة أرسطو على أنها فلسفة إشراقية، لأن عبد المسيح بن ناعمة الحمصي حينما ترجم الكتاب المعروف بـ (أثولوجيا أرسطو طاليس) قدمه إلى المسلمين على أن لأرسطو على حين أنه مقتطفات من تاسوعات أفلوطين.

وليس من شك في أن فلسفة أفلوطين السكندري التي تعتبر أن المعرفة مدركة بالمشاهدة في حال الغيبة عن النفس وعن العالم المحسوس، كان لها أثرها في التصوف الإسلامي فيما نجده من كلام متفلسفي الصوفية عن المعرفة. وكذلك، كان لنظرية أفلوطين السكندري في الفيض وترتيب الموجودات عن الواحد أو الأول، أثرها على الصوفية المتفلسفين من أصحاب الوحدة كالسهروردي المقتول، ومحيي الدين بن عربي، وابن الفارض، وعبد الخالق بن سبعين، وعبد الكريم الجيلي، ومن نحا نحوهم.

ونلاحظ بعد ذلك أن أولئك المتفلسفة من الصوفية نتيجة اطلاعهم على الفلسفة اليونانية قد اصطنعوا كثيرا من مصطلحات هذه الفلسفة مثل: الكلمة – العقل الأول - العقل الكلي – العلة والمعلول... إلخ

مدخل إلى التصوف الإسلامي (ص: 33 - 34)

"Mu ba ma inkarin tasirin Falsafar Girka a cikin Sufancin Musulmai, saboda gamayyar Falsafar Girka da sabuwar Falsafar Plato a kebance sun isa ga Sufancin Musulmai ta hanyar tarjama da nakaltowa, ko kuma ta hanyar cakuduwa da masu bautan Kiristoci a garin Şanlıurfa da Harran (garuruwa ne da a yanzu suke Kasar Turkey...".

A takaice sakon da muke so mu isar ga al'ummar Musulmi shi ne; Wannan Sufancin da muke gani a yau, ba shi da alaka da Muslunci, saboda ga shi mun ga inda aka tattaro shi. Munanan Aqidu ne aka harhado su daga Falsafar Girka da ta Hindu da ta Farisa da kuma Addinin Kiristanci.

Saboda haka muna kira ga mabiya Sufanci su yi bincike, don kar su mutu a kan wannan mummunan tafarki da suke kai.

Allah ya yi mana tsari da bata.

Daga zauren Dr. Aliyu Muhammad Sani