Diwanin Wakokin Aminu Ladan Abubakar (ALA)

Yakasai, S. A. & Sani, A-U. (2021). Diwanin Waƙoƙin Aminu Ladan Abubakar (ALA). Kaduna: Amal Printing & Publishing Nigerian LTD. ISBN: 978-978-57624-9-0.

DIWANIN WAƘOƘIN AMINU LADAN ABUBAKAR (ALA)

Salisu Ahmad Yakasai

Abu-Ubaida Sani

Copyright © Diwanin Waƙoƙin ALA

All rights reserved.

No part of this work may be reproduced in any form, and in any language, without prior written permission from the authors, Salisu Ahmad Yakasai and Abu-Ubaida Sani.

National Library of Nigeria Cataloguing-in-Publication Data

YAKASAI. Salisu Ahmad 1958 –

Dawanin waƙoƙin Aminu Ladan Abubakar (ALA)

1. Hausa (African people) - Music

I. Salisu, Abu-Ubaida. II. Tittle

M 1831.H39 Y15 2021 780.96697

ISBN: 978-978-57624-9-0 (pbk) ACCR2

First Published, March 2021

SADAUKARWA

Wannan aiki sadaukarwa ce ga masu tunani nagari da karɓar shawarwari nagari da kuma aikata aiki nagari.

GODIYA

Da sunan Allah mai rahama da jin ƙai, tsira da amincinsa su tabbata ga shugaban halittu, wato Annabi Muhammadu (SAW), da alayensa da sahabbansa da kuma masu bin sa da gaskiya har zuwa ranar ƙarshe. Aikin haɗaka tsakanin malami da ɗalibi a fagen adabi, wani abu ne sabo. Godiya ta tabbata ga Allah (SWT) da ya zamar da wannan mafarki gaskiya, wato samar da kammalallen aiki game da rayuwa da waƙoƙin Aminu Ladan Abubakar (ALAN Waƙa), da ya ƙunshi kusan dukkanin abubuwa da ake buƙata a wannan ɓangaren, musamman daga haihuwar ALA zuwa shekara ta 2018.

Muna miƙa godiya ga shi kansa wanda aka yi wannan aiki game da rayuwa da waƙoƙinsa mai taken: DIWANIN WAƘOƘIN AMINU LADAN ABUBAKAR (ALA). Amincewarsa da a gabatar da wannan aiki ne, ya share fagen samuwar lokacin da ya sadaukar domin bayar da dukkan bayanan da ake buƙata a yayin wannan bincike.

Mutane daban-daban sun taimaka ta hanyoyi da yawa domin kammaluwar wannan aiki, wato kama daga kayan aiki da shawarwari zuwa addu’o’i na fatan alheri. Godiya ta musamman ga Dakta Yakubu Aliyu Gobir na Jami’ar Usmanu Ɗanfodiyo dangane da irin rawar da ya taka a wannan aiki.

Akwai kuma jerin ɗai-ɗaikun mutane da suka sanya hannu wajen nemowa da saurare da kuma rubuta waɗannan waƙoƙi kamar yadda suke ƙunshe a cikin wannan littafi. Waɗannan katibai sun haɗa da Nazif Lamara (Gamawa) da Mujahid Ahmad Mukhtar (Misau) da Hamza Ado (Taura) da Khalid Sani (Misau) da kuma Anas Suleiman (Darazau). Allah (SWT) ya saka da alheri bisa ga ɗawainiyoyi da kuka yi domin ganin wannan aiki ya kammala a cikin nasara.

Muna godiya kuma ga rukunin wasu masana a fannonin rayuwa mabambanta, waɗanda kuma suka yi tsokaci da sanya albarka dangane da wannan littafi. Daga cikinsu akwai Alhaji Aminu Ado Bayero (WAMBAN KANO) da Ado Ahmad Gidan Dabino, MON (Tsohon Shugaban Ƙungiyar Marubuta ta Ƙasa, ANA reshen Kano) da Kabiru Muhammad Assada (Babban Editan Mujallar Muryar Arewa) da Dakta Aminu Bello (Kwalejin Ilimi ta Ƙasa FCE Zariya) da kuma Hajiya Fati Niger (Shahararriyar Mawaƙiyar Hausa). Yabo da jinjina ta musamman ga masu tunani nagari da ɗaukar shawarwari nagari, tare da aikata ayyuka nagari.

Salisu Ahmad YAKASAI
Abu-Ubaida SANI

MUƘADDIMA

Godiya ta tabbata ga Allah (Subhanahu Wata’ala) wanda ya halicci ilimi. Tsira da amincinsa su tabbata ga Annabi Muhammadu (Sallallahu Alaihi wa Sallam) wanda ya wajabta neman ilimi a kan dukkan Musulmi maza da mata. Na yi matuƙar farin ciki da aka nemi na yi muƙaddima a wannan littafi mai suna DIWANIN WAƘOƘIN AMINU LADAN ABUBAKAR (ALA), littafin da Farfesa Salisu Ahmad Yakasai da Abu-Ubaida Sani suka rubuta a kan ɗaya daga cikin shahararrun mawaƙan Hausa na wannan zamani.

Haƙiƙa irin wannan aikin haɗin-guiwa tsakanin malami da ɗalibi, wata sabuwar hanya ce ta taskacewa da kuma adana waɗannan waƙoƙi domin kada su salwanta. Abin lura a nan shi ne irin tagomashin da waɗannan waƙoƙi na zamani suke da shi, wajen isar da saƙonni ta siga daban-daban domin inganta rayuwar al’umma. Bugu da ƙari, wannan Diwani ya zo da bayani mai zurfi game da rayuwar Aminu ALA, wato tarihin ya fito da bayanai dangane da ƙimarsa a cikin al’umma da yanayin da ya samar da waƙoƙi da kuma mutanen da aka yi waƙoƙin domin su.

Wani ƙari da aka samu kuma a wannan Diwani shi ne na tattara waƙoƙin a bisa jigogin da suka dace. Wato kama daga jigon ilimantarwa da wa’azantarwa da faɗakarwa zuwa na siyasa da soyayya da sarauta da kuma na yabo da jinjina. Sauran sun haɗa da jigogi na ganin dama da na talla da na aure da na ta’aziyya da ɗaukaka da kuma na zagin kasuwa. Dukkan waɗannan abubuwa sun zama shaidar da za a tabbatar da cewa wannan aiki na marubutan haɗaka, wata gudummawa ce ga ci gaban nazari a fagen adabi, musamman ma fannin waƙoƙin Hausa na zamani.

Farfesa Sa’adiya Omar
Darakta, Cibiyar Nazarin Hausa
Jami’ar Usmanu Danfodiyo, Sakkwato

JINJINA

Muna godiya ga Allah mai kowa mai komai da ya nuna mana fitowar wannan muhimmin littafi da aka rubuta a kan waƙoƙin fasihi, gwani, rumbun hikima wato Alhaji Aminu Ladan Abubakar (ALA). Haƙiƙa ALA wani babban jigo ne kuma jagora a fagen adabin Hausa na zamani, domin shi ne fitila mafi haske a cikin fitilun da ke haskaka wannan sabon jigo na waƙoƙin Hausa na zamani.

ALA ya yi amfani da ɗimbin basirar da Allah ya yi masa wajen ɗabbaƙa sabon salo a waƙar Hausa ta yadda tilas ya ja hankalin masana da manazarta adabin Hausa.

Diwani wata taska ce ta adana ayyukan fasaha da suka danganci waƙa, da zube, da wasan kwaikwayo, da sauran ayyukan adabi. Muna maraba da wannan diwani na waƙoƙin Alhaji Aminu Ladan Abubakar, da fatan littafin zai amfanar a fagen bincike da nazari ga malamai da kuma ma’abuta sha’awar waƙoƙin Hausa.

Marubutan wannan littafi wato Prof. Salisu Ahmad Yakasai da ɗalibinsa Abu-Ubaida Sani, haƙiƙa sun yi tsinkaye da hangen nesa wajen yin wannan gagarumin aiki domin ƙara fito da wannan sabon fanni na adabi da taskace waƙoƙin ALA domin amfaninmu baki ɗaya. Allah Ya albarkaci wannan littafi, ameen.

Alhaji Aminu Ado Bayero
Mai Martaba Sarkin Kano

ALLAH SAN BARKA

Samar da littattafai a kan waƙoƙin fasihan mawaƙan Hausa na Arewacin Nijeriya babban abin jin daɗi da kuma alfahari ne, saboda ana adanawa da killace ire-iren waɗannan ayyuka domin gudun ɓacewarsu wata rana. Diwanin waƙoƙin Aminu Ladan Abubakar (ALA), na tabbata zai zama abin so ga jama’a musamman masu son waƙoƙinsa da kuma manazarta.

Ado Ahmad Gidan Dabino, MON
Tsohon Shugaban Ƙungiyar Marubuta ta Nijeriya, ANA
Reshen Jahar Kano

TSOKACI

Littafin Diwanin Waƙoƙin Amini Ladan Abubakar (ALA), wani kundi ne da ya zamo ɗaya-tamkar-da-goma idan ana maganar taskace tarihin mawaƙan Hausa na wannan zamani da kuma ayyukansu. Mawallafan littafin sun nuna ƙwarewa da naƙaltar sanin ƙabli da ba'adin wannan fage na adabi, musamman idan aka yi la'akari da tsari da zubin littafin.

Kabir Assada
Babban Edita, Mujallar Muryar Arewa

GOYON BAYA

Waƙa tana taka muhimmiyar rawa wajen haɓaka harshe da kuma bunƙasa al'adun al'umma. Samuwar DIWANIN WAƘOƘIN AMINU LADAN ABUBAKAR (ALA), tanadi ne na kare wannan aiki na adabi daga salwanta. Marubuta littafin sun nuna ƙwarewa cikin hikima.

Hajiya Fati Nijar
Mawaƙiyar Hausa

YABAWA

Yau Farfesa Salisu Yakasai,

Sani Ubaida kun yi aiki sosai,

Gun Diwanin nan na ALAN Waƙa.

Wannan aiki Allah sa albarka,

Babbar gona ce ciki ga shuka,

Kwanyar ALA ga ta nan fa ta waƙa.

Don adabi ALA yana raya shi,

Har al’ada ba a bin sa fa bashi,

To haka harshen walwala gun waƙa.

Sulaiman Salisu Muhammad
(Mai Bazazzagiya)

ƘUMSHIYA

SADAUKARWA

GODIYA

MUƘADDIMA

JINJINA

ALLAH SAN BARKA

TSOKACI

GOYON BAYA

YABAWA

GABATARWA

BABI NA ƊAYA

AMINU LADAN ABUBAKAR ALAN WAƘA

1.1 Gabatarwa

1.2 Haihuwar Aminu Ladan Abubakar (Alan Waƙa)

1.3 Bin Diddigin Laƙabinsa

1.4 Mahaifansa

1.5 Kakanninsa

1.5.1 Kakannin ALA Ta Ɓangaren Mahaifi

1.5.2 Kakannin ALA Ta Ɓangaren Mahaifiya

1.6 Aure Da Iyalensa

1.6.1 Matansa

1.6.2 ‘Ya’yansa

1.7 Iliminsa/Karatunsa

1.7.1 Karatunsa na Addini

1.7.2 Karatunsa na Boko

1.7.2.1 ALA A Duniyar Firamare

1.7.2.2 ALA A Duniyar Sakandare

1.7.2.2 ALA A Duniyar Makarantar Gaba Da Sakandare

1.8 Gwagwarmayar Rayuwa

1.8.1 Ayyukansa

1.8.2 Ayyukan Gwamnati

1.8.3 Sana’a/Kasuwanci

1.8.4 Littattafai

1.8.5 Tafiye-tafiye

1.8.6 Ƙungiyoyi

1.8.6.1 Ra’ayin ALA Game Da Ƙungiya

1.8.7 Ƙwallon Ƙafa

1.9 Kammalawa

BABI NA BIYU

ALA A DUNIYAR WAƘA

2.1 Gabatarwa

2.2 Lokaci Da Dalilin Fara Waƙar Ala

2.3 Waƙar ALA ta Farko

2.4 Ko ALA Yana da Uban Gida A Waƙa?

2.5 Gwagwarmayar ALA A Duniyar Waƙa

2.6 Ɗaukakar ALA A Duniyar Waƙa

2.7 Yadda ALA Ke Shirya Waƙoƙinsa

2.8 Kyaututtukan Da ALA Ya Samu

2.9 Muradin Ala

2.10 Koken Ala

2.11 Lokutan Ƙunci A Rayuwar Ala

2.12 Fargabar Ala

2.13 Wasiyar Ala

2.14 Rubuce-Rubuce Na Ilimi Da Aka Gabatar Game Da Ala

2.15 Kammalawa

BABI NA UKU

WAƘOƘIN ALA MASU JIGON ILIMANTARWA/WA’AZANTARWA/FAƊAKARWA

3.0 Gabatarwa

3.1 Bara a Kufai

3.2 Jami’a Gidan Bankashi

3.3 Yanar Giza-Gizo

3.4 Baba Ina Za Ka Ne?

3.5 Waƙar Ilimi

3.6 Maɗaci

3.7 Marainiya

3.8 Sakarkari

3.9 Rayuwa A Duniya Tana Ban Tsoro

3.10 Murnar Salla Ta Gani

3.11 Waiyo Kaico

3.12 Mutuwa

3.14 Almuhajura

3.15 Ɗanjarida

3.17 Jami’a Gidan Wuya

3.18 Ɗan Barno

3.19 Hangen Dala

3.20 Uba

3.21 Noma

3.22 Kushewa

3.23 Rama Cuta Ba Laifi Ne Ba

3.24 Gobe Alkiyama

3.25 Kukuma

3.26 Sababin Mutuwar Aure

3.27 Adali

3.28 Cutar Taɓin Hankali

3.29 Ɗamarar Ko Ta Kwana

3.30 Jami’a Gidan Ban Kashi 2

3.31 Mu Zauna Lafiya

3.32 Kammalawa

BABI NA HUƊU

WAƘOƘIN ALA NA SIYASA

4.0 Gabatarwa

4.1 Allah Kaɗa Guguwar Sauyi

4.2 Kira ga Gwamnoni

4.3 Dashen Mai Shukan Kainuwa Hawa Mulkin Lamaran Yaro

4.4 Zaɓe

4.5 Tallafi

4.6 Baubawan Burmi

4.7 Kamaye

4.8 Makomar Arewa

4. 9 Allah Ya Maimaita

4.10 Buɗaɗɗiyar Wasiƙa

4.11 Waiwaye

4.12 Walle-Walle

4.13 Raba Gardama

4.14 Your Eɗcellency Sir

4.15 Mallam Ibrahim Shekarau Allah Ya Maimaita

4.16 Sardaunan Mubi Mai Girma

4.17 Garkuwa Na Matasa Doktoro Yahaya Adoza

4.18 Ɗan Bello Yahaya Gwamna Mai Jihar Kogi

4.19 Gwamnan Jama’a Bindo

4.20 Gwamna Bindo Gwamnan Adamawa

4.21 Farar Aniya Alamin Nasara

4.22 Mu Kaɗe Kumfar Ruwan Kogi

4.23 Bubukuwa

4.24 Bargon Rufa

4.25 Ɗaurin Gwarmi

4.26 Kammalawa

BABI NA BIYAR

WAƘOƘIN ALA MASU JIGON SOYAYYA

5.0 Gabatarwa

5.1 Angara

5.2 Fuju’a

5.3 So

5.4 Kawalwalniya

5.5 Kibiya

5.6 Kalmar So

5.7 Amina

5.8 Tsohuwa Ta Illaila

5.9 Kammalawa

BABI NA SHIDA

WAƘOƘIN ALA NA SARAUTA

6.0 Gabatarwa

6.1 Sarkin Zazzau Shehu Idirisu

6.2 Ado Mai Kano Mai Martaba

6.3 Jaɓɓama Marafa Abubakar

6.4 Zazzau

6.5 Tamburan ‘Yan Maza: Nuhu Mamman Sunusi

6.6 Sarkin Bauchi Ka Gama Lafiya

6.7 Santuraki Ali Ado Bayeronmu

6.8 Na Laraba Gogarma

6.9 Sadaukin Lafiya Maigirma

6.10 Abubakar Na Laraba

6.11 Nasiru Ɗan Dano

6.12 Bebejin Zazzau Haji Ahmad

6.13 Usman Kogunan Gamawa

6.14 Attahiru Abdurrazak Bunun Bargu

6.15 Bargu Kingdom

6.16 Chiroma Nasiru Ado Bayero

6.17 Gimbiya Mero Tanko Almakura

6.18 Uban Musulmi Sultan Sa’ad Abubakar

6.18 Bakan Dabo

6.19 Takawa

6.21 Mai Tagwayen Masu

6.22 Kammalawa

BABI NA BAKWAI

WAƘOƘIN ALA NA YABO/JINJINA

7.0 Gabatarwa

7.1 Farfesa Yakasai

7.2 Taken Maza Buratai

7.3 Kwamishinan ‘Yan Sanda Faruk Usman Ambursa

7.4 Ruhanai

7.5 Galadiman Udubo

7.6 Farfesa Sa’idu Muhammad Na Gusau

7.7 Aminar Mama

7.8 Yahuza Ɗan Sadisu Madobi

7.9 Nana Faɗima

7.10 Janaral Murtala Mazan Jiya

7.12 Manjo Janar Mustafa 1

7.13 Manjo Almusdafa 2

7.14 Ɗiya Maza Ɗaukar Farko Baba

7.15 Mai Nasara Burtai

7.16 Ƙara Haƙƙuri Buratai

7.17 ‘Yan Mazan Gidan Soja

7.18 Mashal Sadiƙu

7.19 Mashal Sadiƙu Dogarin Ƙasata

7.20 Ginshiƙin Adabi

7.21 Hamshaƙin Sadauki

7.22 Hashim Ubale

7.23 Farfesa Ango Abdullahi

7.24 Hindu Ta Bunun Bargu

7.25 Karibu Ɗantata

7.26 Muhammadu Miftahul Futuhati

7.27 Rabbu Yarje

7.28 Ganganko

7.29 Sharu Sulaimanu Jadda

7.30 Nuhu Uba Kura

7.31 Malam Amadu mai Rauhani

7.32 Uwar Iyaye A'isha

7.33 Kammalawa

BABI NA TAKWAS

WAƘOƘIN ALA NA GANIN DAMA

8.0 Gabatarwa

8.1 Momi Ummina

8.2 Al’adun Hausa

8.3 Ala: Basasa

8.4 Zariya Gidan Ilimi

8.5 Kano Tumbin Giwa

8.6 Duniya Tana Ruɗa Ni

8.7 Dutse Gadawur

8.8 Mahaukaciya

8.9 Zuciya

8.10 Kyauta

8.11 Astagfirullah

8.12 Lafiya

8.13 Sakkwaton Usmanu

8.14 Alan Waƙa Zai Koma Gida

8.15 Nasarun Minallahi Sojojin Nijeriya

8.16 Madina Garin Ma'aiki

8.17 Addu'a Ga Masoyana

8.18 Gidan Soja Ginshiƙin Yaƙi

8.19 Hajji Garin Manzon Allah

8.20 Zuciya Ta Auri Tunanina

8.21 Bazazzagiya

8.22 Baubawa 2

8.23 Mashigan Kano

8.24 Jakadiya

8.25 Makauniya

8.26 Du'a'i

8.27 Bayi

8.28 Astagfurullah

8.29 Kammalawa

BABI NA TARA

WAƘOƘIN ALA NA TALLA

9.0 Gabatarwa

9.1 Amana Rediyo

9.2 AM FM

9.3 CTƁ

9.4 Liɓerty 'Yanci Kaduna

9.5 BBC Hausa

9.6 Inuwar Marubuta Jihar Arewa Da Hausa

9.7 Inuwar Marubuta

9.8 Kammalawa

BABI NA GOMA

WAƘOƘIN ALA MASU JIGON AURE

10.0 Gabatarwa

10.1 Tambarin Masoya

10.2 Ayyuriri Amarya Ango

10.3 Alhaji Surajo Abubakar Ango Na Farida

10.4 Auren Ussuman Lawan da Zainabu Abdullah

10.5 Muhammed Tukur Ango Na Fatima

10.6 Bikin Fadeela

10.7 Alalo-Alalo Masoya

10.8 Tambarin Amarsu Da Ango

10.9 Auren Maryama Da Aminu

10.9 Auren Dakta Abdullahi Da Bara’atu

10.10 Maryama Gimbiyar Mata

10.11 Murnar Aure

10.12 Kammalawa

BABI NA GOMA SHA ƊAYA

WAƘOƘIN ALA MASU ZAGIN KASUWA

11.0 Gabatarwa

11.1 Raƙumi

11.2 Gilashi

11.3 Hasbunallahu wa Ni’imal Wakilu

11.4 Kammalawa

BABI NA GOMA SHA BIYU

WAƘOƘIN ALA NA TA’AZIYYA

12.0 Gabatarwa

12.1 Mutuwa Rigar Kowa

12.2 Ta'ziyyar Maitama

12.3 ‘Ya’yan Sarki Ado Bayero

12.4 Ta’aziyyar Mai Martaba Alh. Dr. Ado Bayero

12.5 Kammalawa

BABI NA GOMA SHA UKU

WAƘOƘIN ALA NA ƊAUKAKA

13.0 Gabatarwa

13.1 Ɗaukaka Abar Gudu Abar Nema

13.2 Hikima Taguwa

13.3 Lu’u-Lu’u

13.4 Shahara

13.4.1 Rukunin Tarihi

13.4.4 Rukunin Ƙalubale

13.4.5 Rukunin Nasara

13.6 Kammalawa

Manazarta

GABATARWA

Martaba da ƙimar mutum su ne suke bayyana wane ne shi a cikin al’umma. Martaba ita ke ƙunshe wasu sifofi da suka danganci halayya da tunani da ƙawazuci da zamantakewa a rayuwar mutum. Hasali ma, batun ƙima da martabar mutum sun wuce yadda ake ganin su a zahiri. Wato siffofin da suke tattare a cikin ƙima da martaba, su ne suke kammala cikar mutum.

Na farko daga cikin waɗannan siffofi shi ne sauƙin kai. Mutumin da ya zama mai sauƙin kai, ba shi da wuyar mu’amala da sauran jama’a. Sai dai kuma sau nawa ka taɓa cin karo da irin wannan mutum? Mutum ne mai ƙana’a da sanin yakamata. Hasali ma, shi mutum ne wanda ba shi da saurin fushi ko kasala, kuma murmushi ko fara’arsa na inganta yanayi cikin hulɗa.

Irin wannan mutum yana bayar da goyon baya tare da ƙarfafa guiwa a rayuwar al’umma. A kowane lokaci ƙofofinsa a buɗe suke, wato a shirye yake domin sauraron jama’a da kuma ba su shawara ta gari, kuma duk inda ya je ba ya ɓuya. Saboda haka ya kasance aboki ta yadda mutane za su tunkare shi domin ba da shawara dangane da al’amuransu na rayuwa, musamman ma da yake ba batu ba ne na kuɗi, face kyawun hali.

Shin ko halayenmu suna taimakawa wajen yin mu’amala da zuciya ɗaya, kuma ko hakan na sa a sami sakamako cikin al’amuran yau da kullum na abokan hulɗa? Ba shakka duk wanda ya tafiyar da rayuwarsa a cikin sauƙi, to za a ga yadda jama’a suke kewaye shi cikin aminci da riƙon amana.

Wata siffar kuma ita ce ta ƙarfin hali. A nan ƙarfin hali da muke magana shi ne na ɗa’a da ladabi da biyayya. A zubi da tsarin rayuwa, babu abin da ya dace kuma muke buƙata face ƙarfin hali domin faɗin gaskiya. Muna kuma buƙatar ƙarfin hali musamman a lokacin da muka sami kanmu cikin yanayi na yin zaɓi tsakanin abu mai kyau da kuma marar kyau, a lokacin da babu mai kallon mu.

Muna buƙatar ƙarfin hali domin kasancewa masu gaskiya da adalci cikin mu’amala da sauran jama’a. da zarar al’umma ta samu mutum mai ƙarfin hali a matsayin jagora to rayuwar wannan al’umma za ta kasance cikin dacewa. Irin wannan ƙarfin hali shi ne ƙololuwar zama namiji. Akwai kuma ladabi da biyayya cikin aiki ko wajabci. Muna iya tantancewa tsakanin mutum mai ƙwazo da kuma biyayya. A yayin da imani yake miƙa wuya ga aiki ko umurni, ƙwazo kuwa himmatuwa ce ga abin da aka sa a gaba.

Su waɗannan siffofi guda uku, idan suka samu a lokaci guda, to ba shakka an yi tanadin abin ƙwarai ga mutum. Waɗannan abubuwa su ne jagora wajen tafiyar da rayuwa. Wato ƙwazo da miƙa wuya su ne sirrin gina kai, kuma cikin ƙwazo ne ake gina mutum. Akwai kuma tausayi. Da yawa mukan sami kanmu cikin so da ƙaunar mutane masu tausayawa. Babu wata hanya ta samun jin daɗi tamkar nuna halin tausayawa. Wato farin ciki yana samuwa nan take amma ba ya ɗorewa. Jin daɗi ko wani abu ne da ke cikin zuciya. Da yawa manzon rahama yakan hore mu da mu bayar maimakon karɓa, musamman ma da yake hannun bayarwa ya fi hannun karɓa. Ba shakka duniya na alfahari da masu tausayi, domin ba a samun nasara sai a cikin tausayawa. Hasali ma ai masu tausayawar nan su ne masu arziƙi a duniya da lahira, kuma da yake sun shayar da al’umma baiwa ta tausayawa, to zukatansu na cike da annuri.

Gaskiya ne cewa fuska ita ce riga, wato ana buƙatar cikakkiyar shiga ta kamala a kowane lokaci. Da ma dai son tufafi cikin ado ba sabon abu ba ne ga tsarin mawaƙa. Hasali ma, ai ma’abuta amfani da tufafi na ƙwarai kan ce jikin da aka kyautata shi yakan tafi tare da halayya, sannan daga baya a samu tasiri ga mutum gaba ɗaya. Wato mutumin da ya sanya tufafi masu kyau yana ɗauke da ƙima cikin daraja ta musamman. Da haka irin waɗannan mutane kan ƙara wa kansu himma da ƙwazo na aiki da armashi, kuma a daɗe ana tunawa da su a cikin al’umma saboda irin ayyukan alherin da aka san su da su.

A insaniya irin ta ɗan adam, abin da ya gabata yanayi ne da ya dace da Aminu Ladan Abubakar (ALAN Waƙa): Wato shahararren mawaƙin da muke gabatar da tarihin rayuwarsa da waƙoƙinsa a cikin wannan littafi mai suna DIWANIN WAƘOƘIN AMINU LADAN ABUBAKAR (ALAN WAƘA). Domin samun cikakken bayanin rayuwa da waƙoƙin ALA, mun kasa littafin zuwa babi-babi har guda goma sha uku (13).

Bayan gabatarwa, a babi na farko an yi bayanin haihuwar Alan waƙa, wato mahaifa da kakanni da ‘yan uwa. Akwai kuma batun aure da iyalansa da iliminsa (karatunsa) da kuma uwa-uba gwagwarmayar rayuwa. Babi na biyu kuma bayani ne a kan matsayin Alan waƙa a duniyar waƙa. Wato lokaci da dalilin fara waƙa da batun uban gida da muradi da fargaba da wasiya da kuma ɗaukakar ALA a duniyar waƙa.

Daga nan kuma sai batun jigogin waƙoƙin Aminu ALA, wato da yake jigogin na da yawa, babi na uku yana ɗauke ne da waƙoƙi na faɗakarwa. A babi na huɗu kuma, mun kawo waƙoƙin Aminu Alan Abubakar (ALAN Waƙa) ne masu jigon siyasa.

Babi na biyar kuwa shi ne ya tattaro waƙoƙin ALAN waƙa, masu jigon soyayya. A nan ɗin ma dai maƙasudin samar da waɗannan waƙoƙi shi ne so da ƙauna duka a cikin soyayya. Daga nan kuma sai batun shugabanci (ko jagoranci), wato tsari na sarauta, wadda idan ta tunkaro to dole a kauce. Babi na shida ne yake ɗauke da waƙoƙin ALA masu jigon sarauta. A babi na bakwai kuma, waƙoƙin ALA ne masu jigon yabo da kuma jinjina.

Sai kuma babi na takwas, inda a nan mun kawo waƙoƙin Aminu ALA ne masu jigo na ganin dama. Wani jigo kuma da yake da alaƙa da na waƙoƙin ganin dama shi ne na waƙoƙi masu jigon talla, a babi na tara. Daga nan kuma sai babi na goma, wanda yake ɗauke da waƙoƙi masu jigon zagin kasuwa. A nan ne msu hikimar magana suke cewa koya ya yi zagi a kasuwa ya san da wanda yake.

A babi na sha ɗaya, mun kawo waƙoƙin ALA ne masu jigon aure, wato batun nan na farko cikin matakan rayuwa. Daga nan kuma sai babi na sha biyu, wato na waƙoƙi masu jigon ta’aziya. A babi na sha uku kuma, waƙoƙin Aminu ALA ne masu jigon ɗaukaka. A nan ne muka bijoro da waƙoƙin tarihi da rukunin gwagwarmaya da na shahara da na ƙalubale da kuma uwa-uba na rukunin nasara.