Daurin Bakake Masu Kugiya

Citation: Maikwari, H.U. & Sani, A. (2020). Tahamisin Waƙaƙƙen Ƙa’idojin Rubutun Hausa. Zaria: Ahmadu Bello University Press Ltd.

 

188. Ɗaurin ƙugiya ko ba wanda ya korai,

 An kuma fid da ƙa’ida kuma ta aurai,

 Ba a hana shi ko kaɗan kuma ban sa rai,

 Harafi in da ƙugiyatai aka ɗaurai,

  Dole a bar ta liƙe nan ba a cirewa.

 

189. Za ka ji ta fito cikin lafazi sosai,

 Haka nan za ka sa shi, sai ya fita sosai,

 Ba nashe shi, kana ba a kuma yassai,

 Furucin lanƙwasar tana nan  dai sosai,

Kuma a rubuce ƙugiyar ba ta gushewa.

 

190. Ɗaurin in ya kama ‘ƙ’ kai dai ƙyale,

 Ba a cire shi dole sai dai a yi lele,

 Kalmomin da sun ka zo nan ga misale,

 Ƙaton nan ƙafarsa duk ta ƙaƙƙalle,

  Kuma ya yunƙura shina tattakawa.

 

191. To dai ga su yadda za ka rubutawa

 Raggo in an kirai yana ɓoɓɓoyewa,

 Ƙaƙƙarfan ƙanen ga nau bai ɓoyewa,

 Ɓaɓatun gyaɗa wuta ƙoƙƙonewa,

  Ga maciya a zaune sai ɓaɓɓarewa.

 

192. Riga in ta tsufa sai ta ɓaɓɓarke,

 Damma ga su ɗaure yanzu a ɗaɗɗauke,

 Na ga buhuhuwan hatsi an ɗiɗɗinke,

 Wasu ɗaɗɗaure bakunan nasu a tsuke,

  Ga wata tashe yanzu sai ɗuɗɗurawa.

 

193. In ka lura ƙugiya ba ta sauya ba,

 An jera su ka ga dai ba a canza ba,

 Ga misalin da yat taho in ka duba,

 Kowace ƙugiya a nan ba a karye ba,

Kuma mai ƙugiya kawai aka ɗaurewa.

 

194. Duk sautin da za ya ɗaure shi kalar shi,

 Ba a rubuta kowane dole a sa shi,

 Shi mai ƙugiya idan an ɗaure shi,

 Duk harafin da kas sani bai ɓoye shi,

  Sai mai ƙugiya kaɗai za ya biyowa.

 

195. Je ka yi binciken abin ga ka tantance,

Shiga littattafai ka nemo su nazarce,

Kai nazari ka duba komi ka karance,

In ka gan shi sai ka zana a rubuce

Masana sun aminta mu ba mu musawa.