Zan Iya Auren 'Yar Matar Da Na Taba Yin Zina Da Ita?

𝐓𝐀𝐌𝐁𝐀𝐘𝐀❓

Shin ko ya halatta mutumin da ya taɓa yin zina da wata mace kuma daga baya ya auri 'yarta??

ZAN IYA AUREN 'YAR MATAR DA NA TAƁA YIN ZINA DA ITA?

𝐀𝐌𝐒𝐀❗️

Alal-haƙiƙa malamai sun yi saɓani dangane da wannan mas'ala, mazhabin shafi'iyya da kuma wani sashe na malikiyya sun tafi ne a kan cewa idan mutum ya yi zina da mace to ya halatta a gareshi ya iya auren ita kanta matar, ko ya auri 'yarta, ko kuma ya auri uwarta, haka nan ya halatta ɗansa ya aure ta ko kuma babansa ya aure ta, hakanan suka ce idan mutum ya je ya yi zina da uwar matarsa ko kuma ya yi zina da 'yar matarsa, to aurensu da matarsa yana nan bai ɓaci ba, sannan suka ce idan mutum ya yi zina da mace har ya yi mata ciki ta haifi 'ya mace to ya halatta ya auri wannan 'yar da aka halicce ta daga ruwan maniyyinsa, suka ce zina ba ta haramta abin da aure yake iya haramtawa, daga cikin dalilansu sun kafa hujja da faɗin Aʟʟαн(ﷻ)

... وَأُحِلَّ لَكُم مَّا وَرَاءَ ذَٰلِكُمْ ...

An halatta muku (ku auri mata waɗan da suke) koma bayan waɗancan (da aka haramta muku) (suratul Nisá'i Aya ta 24).

Sai dai kuma Mazhabin Hanafiyya da Hanabila da kuma wani sashe na Malikiyya sun tafi ne a kan cewa idan Mutum ya yi zina da Mace to ya haramta a gareshi ya auri Asali (Uwarta) da kuma Reshe ('Yarta) na wannan Mata, danhaka ke nan haramun ne ya ce zai auri 'Yarta ko kuma Uwarta, haka nan shima haramun ne Ɗansa ya aure ta ko kuma Babansa ya aure ta, daga cikin Dalilansu suka ce Mαnzon Aʟʟαн (Sallallahu alaihi Wasallam) Ya faɗa acikin wani Hadisi cewa

"ملعون من نظر إلي فرج إمرأة وإبنتها"

An tsinewa duk wanda yakalli farjin wata Mace (ta hanyar sha'awa) kuma yakalli farjin 'Yarta (ta hanyar sha'awa).

Sannan suka kafa Hujja da Faɗin Aʟʟαн (ﷻ) inda Yake cewa

 وَلَا تَنْكِحُوا مَا نَكَحَ آبَاؤُكُمْ مِنَ النِّسَاءِ

Kada ku auri (ku sadu da) Matan da iyayenku Maza suka taɓa aura (suka taɓa saduwa dasu) (suratul Nisá'i Aya ta 22)

Danhaka ke nan zina tana haramta irin abin da aure yake haramtawa, suka ce babu wani bam-banci a tsakani, kuma suka ce idan Mutum ya yi zina da Uwar Matarsa ko kuma ya yi Zina da 'Yar Matarsa, to nan take aurensu da Matarsa ya ɓaci, danhaka dole ne ya rabu da ita, Saɓanin abin da Malikiyya suka tafi akansa ke nan na cewa aurensu bai ɓaci ba.

Amma sai dai magana mafi inganci a kan wannan Mas'ala ita ce, da yawa daga cikin Malamai sun rinjayar da maganar cewa zina ba ta iya haramta abin da aure yake iya haramtawa ba, danhaka ke nan ya halatta ya iya auren 'Yar Matar da ya taɓaa yin Zina da Uwarta.

Amma dangane da hukuncin cewa Mutum zai iya auren 'Yar da aka halitta daga ruwan Maniyyinsa sakamakon Zina da ya yi da Uwarta, anan kam mafi yawan Malamai sun tafi ne a kan cewa haramun ne ya aure ta, Suka ce ai dukkan Malamai sun yi Ijma'i a kan cewa haramun ne Ɗan-Zina ya auri Uwarsa da ta yi Zina ta haife shi, to ke nan meye bambanci tsakanin Uwar da Uban da wasu za su ce ya halatta Uban ya aure ta? Danhaka ke nan Yadda yake haramun ne Ɗan-Zina ya auri Uwarsa, to haka yake haramun 'Yar-Zina ta auri Ubanta.

WALLAHU TA'ALA A'ALAM

Zauren Fatawoyi Bisa Alkur'ani Da Sunnah. Ku kasance Damu...

 ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.