Hukuncin Yaron Da Aka Haifa Bayan Watanni Shida Da Yin Aure

𝐓𝐀𝐌𝐁𝐀𝐘𝐀❓

Assalamu alaykum warahmatullah. Mun gode sosai da taimaka mana da kuke yi. Allah ya ƙara muku lafiya da basira. Don Allah ina da tambaya mutum yayi aure matar ta zo da ciki, cikin kuma nashi ne ta yi watanni biyar zuwa shida ta haihu. kowa yasan da haka yanzu ya mutu. Shin wannan ɗan zai yi gadon baban ko ba zai yi ba? na gode Allah ya ƙara wa malam ilmi da basira.

𝐀𝐌𝐒𝐀❗️

Wa alaikis salam wa rahmatullahi wa barakatuhu.

Mutukar dai an tabbatar da cewa wannan Matar ta yi cikakkun watanni shida a gidan mijin kafin ta haihu, Kuma shi mijjn nata bai fito fili ya nisanta kansa daga wannan abin da ta haifa ba, to tabbas wannan yaron nasa ne. Kuma yana da gadonsa daidai da sauran 'ya'yansa.

Acikin Alƙur'ani Allah ya bayyana cewa

 ؕ وَحَمۡلُهٗ وَفِصٰلُهٗ ثَلٰـثُوۡنَ شَهۡرًا ؕ

 "Ɗaukar Cikinsa Da Rainonsa (Har Zuwa Yayewa) Watanni Talatin Ne" (Surah: Al-Ahƙaf, Ayat: 15).

Sannan acikin suratul baƙarah Allah ya bayyana cewa

وَالۡوَالِدٰتُ يُرۡضِعۡنَ اَوۡلَادَهُنَّ حَوۡلَيۡنِ كَامِلَيۡنِ لِمَنۡ اَرَادَ اَنۡ يُّتِمَّ الرَّضَاعَةَ  ؕ

Uwaye su shayar da jariransu shekaru biyu cikakku, ga wanda yake son ya cika shayarwar... (Surah: Al-Baƙara, Ayat: 233).

Wannan na nuna cewa shayarwa har zuwa shekara biyu (Wato watanni ashirin da huɗu kenan) haƙƙi ne na jariri da aka kwadaitar akai domin samun cikakkiyar lafiya da girma.

To daga waɗannan ayoyin ne manyan Malamai daga cikin sahabbai suka kafa hujjar cewa idan mace ta yi wata shida a gidan miji to duk abin da ta haifa nasa ne.

Shi addinin musulunci yana kiyaye nasaba ne da kuma tattalin kyakkyawar dangantaka atsakanin jama'a. Don haka zargin da akeyi cewar watakil ta zo da cikin ne, zargi ne marar tushe.

Idan kuma an tambayi matar ko kuma wasu shaidu nagartattu sun tabbatar da zargin da akeyi cewar ta zo gidan ne da cikinsa, To lallai wannan yaron ba zaici gadon marigayin ba. Hasali ma babu auren nan. Domin dukk auren da aka daurashi alhali matar tana ɗauke da juna-biyu, to bai dauru ba. Ba aure bane.

Don haka wannan yaron ba zai ci gadon marigayin ba. Kuma itama uwar tasa bata da gado tunda zaman nasu ba aure bane.

WALLAHU A'ALAM.

Zauren Fatawoyi Bisa Alkur'ani Da Sunnah. 

 ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.