Shin Bikin Takutaha Da Ake Yi Yana Da Alaka Da Addinin Musulunci?

𝐓𝐀𝐌𝐁𝐀𝐘𝐀❓

Assalamu Alaikum Malam Ina kwana ya gida.

Ga tambayata kamar haka; Shin bikin takutaha da ake yi a Kano yana da alaƙa da Addinin Musulunci?

SHIN BIKIN TAKUTAHA DA AKE YI YANA DA ALAƘA DA ADDININ MUSULUNCI

𝐀𝐌𝐒𝐀❗️

Wa'alaikumus Salam Warahmatullahi Wabarakatuh.

Bikin takutaha, wanda ake kira hawan takutaha ko hawan dausayi, al’ada ce da ake yi a Kano bayan Sallar Idi. Ba ya daga cikin ibadun da Musulunci ya shar’anta. Babu aya a Alƙur’ani ko hadisi sahihi da ya tabbatar da cewa Manzon Allah (Sallallahu Alaihi Wasallam) ko Sahabbai sun yi irin wannan hawa ko biki.

Allah S.W.T. Ya ce

الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الْإِسْلَامَ دِينًا

A Yau Na cika muku addininku, kuma Na cika muku ni’imata, kuma Na yarda muku da Musulunci ya zama addini. (Suratul Ma'idah).

Addinin musulunci Allah ya riga da ya cika shi babu bukatar karin wani abu. Mudai aikin dake gabanmu muyi dukkan abinda Manzon Allah (Sallallahu Alaihi Wasallam) ya koyar damu. Ba mu kirkiro wani abu daban da niyyar neman soyayyar manzon Allah (Sallallahu Alaihi Wasallam) ko neman kusanci, Ana neman yaddar Allah da Manzon Allah (Sallallahu Alaihi Wasallam) ta hanyar yin abinda suka umarce mu da hani akan abinda suka hanemu.

Manzon Allah (Sallallahu Alaihi Wasallam) ya ce

مَنْ أَحْدَثَ فِي أَمْرِنَا هَذَا مَا لَيْسَ مِنْهُ فَهُوَ رَدٌّ

Duk wanda ya ƙirƙiro wani abu a cikin al’amarinmu na addini wanda ba ya cikinsa, to an mayar da shi. (Bukhari da Muslim).

Kaga kenan duk wanda ya yi da niyyar samun lada babu lada kuma abinda ya yi an mayar masa dashi.

Idan aka ɗauki takutaha a matsayin al’adar gargajiya kawai, ba ibada ba, to ana duba abubuwan da ake yi a cikinta. Idan ta ƙunshi abubuwan da suka saɓa wa Shari’a, kamar shaye-shaye, haɗa maza da mata ta hanyar da ba ta dace ba, alfasha, shirka ko camfi, to waɗannan abubuwan haramun ne.

Amma idan al’ada ce kawai wadda ba ta ƙunshi abin da ya saɓa wa Shari’a, ba za a ɗauke ta a matsayin ibada ba kuma babu laifi akan hakan.

Bikin takutaha a Kano ba ya daga cikin ibadun da Addinin Musulunci ya shar’anta. Al’ada ce ta gargajiya da ake gudanarwa kuma bai kamata a ɗauke ta a matsayin wani ɓangare na addini ba.

Allah ne Mafisani

Zauren Fatawoyi Bisa Alkur'ani Da Sunnah.

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.