Samun Kudi Ta Hanyar Talla a Kan Intanet (Advertisement)

An ciro daga littafin:

BIƊA DA TANADI A DUNIYAR INTANET
(Sana’o’i, Kasuwanci, Ƙwadago)

Na

Abu-Ubaida SANI
Abdulrahman ALIYU

Manazartar Littafi: Sani, A-U. & Aliyu, A. (2026). Biɗa Da Tanadi a Duniyar Intanet (Sana'o'i, Kasuwanci, Ƙwadago). Amsoshi Academic Publishers. ISBN: 978-978-62480-1-1. DOI: https://doi.org/10.5281/zenodo.21361768

Tuntuɓa Domin Samun Littafi: 

Dr. Abu-Ubaida Sani: Imel - abuubaidasani5@gmail.com | WhatsApp - 08133529736

Dr. Abdulrahman Aliyu: WhatsApp - 08036954354

Talla (Advertisement)

Kalmar talla ba sabuwa ba ce ga Hausawa. A cikin rubutun Sa’id et al. (2006 sh. 423), an yi bayanin kalmar talla a matsayin: “(tàllà, sn., mc., jam., tàllàce-tàllàce) (i) yawo da kaya don sayarwa. (ii) rubuta bayanin wani abu a jaridu, ko maƙala takardu a bango ko jikin wani abu, don neman mai saye.”

A wannan bagiren, talla tana nufin tallata haja ko ra’ayi ko aƙidar wani ko waɗansu domin samun kuɗi. Kusan wannan nau’in talla ba a samun sa a duniyar zahiri – duk da akan samu makamantansa da ake gudanarwa a gidajen talabijin da na rediyo da kuma cikin finafinai. A yau Hausawa da dama sun yi nisa a wannan harkar kasuwanci. Ana gudanar da tallar kan intanet ta fuskoki daban-daban da suka haɗa da:

i.Talla a kan kafafen intanet (websites & blogs)

ii.Talla a shafuka da zaurukan kafafen sada zumunta

iii.Talla ta hanyar raba liƙau

A. Talla a Kan Kafafen Intanet (Websites & Blogs)

Wanda yake da kafar intanet da ta gawurta, yana da damar ɗora tallace-tallace a kai. Tallar tana iya kasancewa ta fuskoki guda biyu, ko dai Adsense[1] ko kuma keɓantattun tallace-tallace.[2] A ƙasa an kawo misalin yadda aka ɗora talla a kafar Isyaku (www.isyaku.com).

Hoto Na 4.18: Talla a kafar intanet

Madogara: An ɗauko daga https://www.isyaku.com/search/label/FADAKARWA

A hoto na 4.18 da yake sama, za a ga yadda aka ɗora talla a kafar Isyaku. Mamallakin wannan kafa Bahaushe ne ɗan jahar Kebbi, mai suna Isyaku Garba.

B. Talla a Shafuka Da Zaurukan Kafafen Sada Zumunta

Waɗanda suke da zauruka da shafuka a kafafen intanet na da damar ɗora tallace-tallace idan sun cika ƙa’idojin da ake buƙata. Ƙa’idojin sun danganta da kafar da kuma mutum ko mutane ko kamfanonin da za su ba da tallar. Bugu da ƙari, ƙa’idojin suna sauyawa lokaci zuwa lokaci.

Hausawa da dama suna samun kuɗi a YouTube da Facebook da Instagram da TikTok a dalilin irin wannan nau’in tallar. Mawaƙan Hausa na zamani da ‘yan barkwanci Hausawa masu yawa suna cin gajiyar wannan damar. Tuni masu tsara finafinan Hausa ma suka rungumi wannan nau’in kasuwanci inda suke sakin finafinansu a kan YouTube tare da ɗora tallace-tallace domin samun kuɗin shiga. Fitattun finafinan Hausa masu dogon zango da ake nunawa a kan YouTube sun haɗa da:

a. Amaryar TikTok

b. Asin Da Asin

c. Garwashi

d. Izzar So 

e. Kalma Ɗaya

f. Ƙwalla

g. Labarina 

h. Sarƙa

i. Zagon Ƙasa

j. Zallar Mata

Sauran ‘yan finafinan Hausa da mawaƙa da ‘yan barkwanci masu yawa suna da tashoshi a kafar YouTube. Wasu kuwa sun fi bayar da ƙarfi a kan TikTok. Sukan ɗora tallace-tallace a waɗannan kafafen. Misalansu sun haɗa da:

a. Abubakar Sadauki (Aibs_Fulani)[3]

b. Ali Muhammad Idris (Maɗagwal)[4]

c. Bello Galadanchi (Danbello)[5]

d. Mu'azu Muhammad (Bushkiddo)[6]

e. Nazifi Abdulsalam Yusuf (Nazifi Asnanic)[7]

C. Talla Ta Hanyar Raba Liƙau

Wannan nau’in kasuwancin kan intanet ya shafi tura saƙonnin talla na wani kamfani a kafafen sada zumunta ta sigar liƙau.[8] Mai wannan kasuwancin yana ɗaukar liƙau da za a riƙa ba shi a kowace rana (ko wani lokacin da aka ƙayyade) sannan ya raba a kafafen sada zumunta irin su Facebook, TikTok, WhatsApp, da sauransu.

Hausawa da dama sun samu riba mai yawa daga wannan kasuwanci. Duk da haka wannan nau’in kasuwanci tamkar caca yake. Dalili kuwa shi ne, sau da dama ire-iren waɗannan nau’o’in kasuwanci suna yin ɓatar dabo na farat ɗaya. A haka ake rufewa da kuɗaɗen waɗanda suka yi aiki ba a biya su ba, da kuma kuɗaɗen waɗanda suka sanya hannayen jari.[9] Daga cikin ire-iren waɗanda aka ci kasuwarsu kuma suka watse akwai:

a. Uwork 

b. Insme 

c. MyBonus

---

[1] Wannan nau’in talla ne inda ake rajista da kamfanin Google. Kamfanin na Google ne zai riƙa karɓar tallace-tallace sannan ya riƙa ɗora waɗanda suka dace a kafar wanda ya yi rajistar (ta la’akari da nau’o’in mutanen da suke ziyartar kafar tasa).

[2] Wannan nau’in tallace-tallace ne da ake karɓa daga ɗaiɗaikun mutane ko kamfanoni ko ƙungiyoyi. Kai tsaye akan yi ciniki da yarjejeniyar yadda tallar za ta kasance (kamar abin da ya shafi farashi, da shafukan da za a ɗora su da tsawon lokacin da za su ɗauka kafin a sauƙe su).

[3] A duba https://www.youtube.com/@abis_fulani.

[4] A duba https://www.youtube.com/@AliArtwork1.

[5] A duba https://www.youtube.com/@bellogaladanchi.

[6] A duba https://www.youtube.com/@Bushkiddo.

[7] A duba https://www.youtube.com/@nazifiasnanic.

[8] A waɗansu lokuta yakan kasance bidiyo ko hoto ko rubutu.

[9] An samu waɗannan bayanai daga tattaunawa da aka yi da Hausawa da suka ci irin wannan kasuwa a baya. A. Sani (keɓantacciyar tattaunawa, 11 ga watan Maris, 2023) ya yi cikakken bayanin yadda harƙallolin suke gudana.