Ire-Iren Aure Na Hausawa

Daga

Shafa'atu Salihu Labbo
Abu-Ubaida Sani

Duk da cewa asalin aure abu ɗaya ne, masana suna bayar da rabe-rabensa ta la’akari da abubuwa daban-daban. Akan yi la’akari da yanayin neman auren ko ɗaura shi ko yanayin zamantakewar aure domin saka shi a wani rukuni na musamman yayin samar da rabe-raben aure. Daga cikin fitattun ire-iren auren Hausawa akwai:

1. Auren Soyayya

Aure ne wanda namiji da mace sukan ƙulla dangantakarsu ta soyayya da juna sannan iyayensu su amince a yi aure. Nau’in ya fi shahara bayan shigowar Musulunci ƙasar Hausa da kuma musamman lokacin da aka samu tasirin zamani a rayuwar Hausawa. Gabanin wannan lokaci, sau da dama akan gina soyayya ne a gidan aure (bayan an ɗaura).[1]

2. Auren Zumunta/Zumunci

Aure ne na ‘yan’uwa, dangin uwa ko na uba. Akan nema wa yaro yarinya daga cikin dangin uwa ko na uba. Wani lokaci akan yi hakan ba tare da an shawarci yaron ko yarinyar ba. Irin wannan aure ana yin sa ne don ƙara ƙarfafa danƙon zumunta tsakanin ‘yan’uwa. Akwai lokutan da aka kama wa yaro yarinya tun tana jaririya. Akan ce an yi wa wane kamu. Idan irin haka ta faru, tun suna yara ƙanana mahaifiyar yaron ko kakarsa (ko wata cikin dangi) za ta riƙa tura kyaututtuka zuwa ga yarinyar da cewar yaron ne ya bayar da toshi.[2]

Zuwan addinin Musulunci bai dakatar da auren zumunta ba. Hasali ma, addini ya kawo bayanin waɗanda aure ya halarta a tsakaninsu, da kuma waɗanda aure bai halarta ba a tsakaninsu sakamakon kusanci na jini.

Dangogin da Aka Halatta a yi Aure da Su

A Musulunci, an halatta a yi aure da kusan dukkanin dangogi, ban da waɗanda aka ambata a matsayin haramun. Mafi yawan dangogin da Musulunci ya halatta a yi aure da su su ne:

a.      'Yan uwa na nesa (misali, 'yan uwan mahaifi ko mahaifiyar).

b.      Mutanen da ba dangi ba ne.

c.       Mutanen da ke da dangantaka da kai ta hanyar shayarwa, amma ba a matakin da ya haramta aure ba.

Dangogin da Aka Haramta a yi Aure da Su

Allah (SWT) ya bayyana waɗannan dangogi a sarari a cikin Alƙur'ani Mai Girma. Haramcin ya shafi dangantaka ta jini, dangantaka ta surukuta, da kuma dangantaka ta shayarwa.

Ga ayar da take bayani dalla-dalla kan waɗanda aka haramta a yi aure da su:

"وَلَا تَنكِحُوا مَا نَكَحَ آبَاؤُكُم مِّنَ النِّسَاءِ إِلَّا مَا قَدْ سَلَفَ ۚ إِنَّهُ كَانَ فَاحِشَةً وَمَقْتًا وَسَاءَ سَبِيلًا (22) حُرِّمَتْ عَلَيْكُمْ أُمَّهَاتُكُمْ وَبَنَاتُكُمْ وَأَخَوَاتُكُمْ وَعَمَّاتُكُمْ وَخَالَاتُكُمْ وَبَنَاتُ الْأَخِ وَبَنَاتُ الْأُخْتِ وَأُمَّهَاتُكُمُ اللَّاتِي أَرْضَعْنَكُمْ وَأَخَوَاتُكُم مِّنَ الرَّضَاعَةِ وَأُمَّهَاتُ نِسَائِكُمْ وَرَبَائِبُكُمُ اللَّاتِي فِي حُجُورِكُم مِّن نِّسَائِكُمُ اللَّاتِي دَخَلْتُم بِهِنَّ فَإِن لَّمْ تَكُونُوا دَخَلْتُم بِهِنَّ فَلَا جُنَاحَ عَلَيْكُمْ وَحَلَائِلُ أَبْنَائِكُمُ الَّذِينَ مِنْ أَصْلَابِكُمْ وَأَن تَجْمَعُوا بَيْنَ الْأُخْتَيْنِ إِلَّا مَا قَدْ سَلَفَ ۗ إِنَّ اللَّهَ كَانَ غَفُورًا رَّحِيمًا (23)"

(Suratul Nisa'i, aya ta 22-23)

Fassarar Ayar:

“Kada ku auri waɗanda ubanninku suka aura, sai dai abin da ya gabata, lalle shi ya kasance alfasha da abin ƙyama, kuma hanya ce marar kyau. An haramta muku (auren) uwayenku, da 'ya'yanku mata, da 'yan'uwanku mata, da gwaggwayenku/gwaggwanninku mata, da 'yan'uwan uwayenku mata, da 'ya'yan 'yan'uwanku maza, da 'ya'yan 'yan'uwanku mata, da uwayenku waɗanda suka shayar da ku nono, da 'yan'uwanku mata ta hanyar shayarwa, da uwayen matanku, da 'ya'yan matanku mata waɗanda suke ƙarƙashin kulawarku daga matanku waɗanda kuka kusance su. Amma idan ba ku kusance su ba, to babu laifi a kanku (idan kuka auri 'ya'yansu). Haka nan an haramta muku (auren) matan 'ya'yanku maza na jinin jikinku, kuma ba a halatta a haɗa 'yan'uwa mata biyu a matsayin mata a lokaci guda ba, sai dai abin da ya gabata. Lalle Allah ya kasance Mai gafara ne, Mai jinƙai.”

Rarrabuwar Haramcin Aure

Bisa ga wannan aya, dangogin da aka haramta a yi aure da su sun kasu kashi uku:

i. Haramcin da Ya Shafi Dangantaka ta Jini (Nasabi):

Uwaye: Uwa, kaka (uwar uba ko uwar uwa), da kakarta

'Ya'ya Mata: 'Ya'ya mace, jikanya, da 'yar jikanya

'Yan'uwa Mata: 'Yar'uwa mace na jini, ko na uba, ko na uwa.

Gwaggwaye/Gwaggwanni Mata: 'Yar'uwar uba ko na kaka

Uwa da Kaka da ‘Yan’uwansu: 'Yar'uwar uwa ko na kaka

'Ya'yan 'Yan'uwa Maza: 'Ya'yan 'yan'uwan maza

'Ya'yan 'Yan'uwa Mata: 'Ya'yan 'yan'uwanku mata

ii. Haramcin da Ya Shafi Surukuta

Matan Uba: Duk matar da mahaifi ya aura

Matan 'Ya'ya Maza: Duk matar da ɗanka na jini ya aura

Uwar Mata: Uwar matar da ka aura

'Yar Matarka (Rabiba): 'Yar matar da ka aura, idan har ka kusance ta

iii. Haramcin da Ya Shafi Shayarwa

Haramcin da ya shafi dangantaka ta shayarwa yana kama da na jini. Idan mace ta shayar da wani yaro, ita ce uwarsa ta shayarwa, kuma dukkan danginta sun zama danginsa na shayarwa. Don haka, an haramta auren:

a.      Uwar shayarwa

b.      'Yar uwa ta shayarwa

c.       'Yar uwar uba ta shayarwa, da dai sauransu

iv. Haramcin Haɗa 'Yan'uwa Mata Biyu

Wannan haramci ne na musamman da ya zo a cikin ayar, inda aka haramta wa mutum ya auri 'yan'uwa mata biyu a lokaci guda (misali, 'yan'uwa mata biyu, ko kaka da jikarta).

3. Auren Tilas/Dole

Aure ne da iyaye ko maga’isa kan tilasta yaransu a yi auren bisa tilas. Ana iya tilasta ma’auratan duka su biyu (ango da amarya), ko kuma ya kasance an tilasta ɗaya daga cikinsu (yayin da ɗayan yake so). Auren dole ya ragu sosai bayan zuwan Musulunci ƙasar Hausa. Duk da haka, akan samu misalansu jifa-jifa har zuwa yau. Musamman a wannan zamani, auren dole yakan haifar da matsaloli da dama, ciki har da kashe kai ko kisan kai ko shiga karuwanci, musamman ga mata.[3]

4. Auren Sadaka

Wannan nau’in aure ne da ake bayar da yarinya sadaka ga wanda za ta aura. Yawanci an fi bayar da sadakar mace ga malami ko almajiri, don neman tubarraki. Akan kuma bayar ga wani mutum wanda aka sadaukar wa da sadaki kuma har ma a wasu lokutan a ɗauke masa wahalhalun ɗawainiyar bukin aure. A al’ada, wani lokaci irin wannan aure akan ɗaura shi ne da mai suna Muhammadu, sa’annan a yi ta yawo da matar gida-gida har a dace da mai son sadakar, wanda kuma yake da damar yin auren.[4]

A yau, wannan al’ada ta ja baya sosai. Auren sadaka ya ƙaranta matuƙa sakamakon wayewar zamani da guguwar ‘yanci. Ko ba komai, addini bai bayar da damar tilasta wa mace auren wadda ba ta so ba. Dole ne a samu amincewarta kafin ɗaura mata aure da wani.

A cikin Musulunci, babu shakka cewa auren dole haramun ne. Musulunci ya bai wa mace cikakken 'yanci da 'yancin zaɓe a kan wanda take so ta aura. Babu wani uba, ko waliyyi, ko wani mutum da ke da ikon tilasta wa mace aure. Wannan ra'ayi an tabbatar da shi ta hanyar hadisai ingantattu na Manzon Allah (SAW). Misali

"قال رسول الله صلى الله عليه وسلم: لا تُنْكَحُ الأَيِّمُ حتى تُسْتَأْمَرَ، ولا تُنْكَحُ البِكْرُ حتى تُسْتَأْذَنَ. قالوا: يا رسولَ اللهِ، وكيف إذنها؟ قال: أَنْ تَسْكُتَ"

Fassara

Manzon Allah (SAW) ya ce: "Ba za a aurar da bazawara ba sai an nemi umurninta, kuma ba za a aurar da budurwa ba sai an nemi izninta." Sai suka ce, "Ya Manzon Allah, yaya izninta yake?" Sai ya ce: "Shirunta shi ne izninta."

Bayanin Hadisin

Wannan hadisi yana nuni da cewa, duk macen da za a aurar, dole ne a nemi ra'ayinta. Wannan ya haɗa da budurwa da kuma bazawara. A wajen budurwa, alamar yardarta shi ne shiru, saboda kunya da take hana ta faɗa a fili. Amma idan ta faɗi ra'ayinta a fili ko ta nuna rashin amincewarta, dole ne a girmama hakan.

Matsayin Auren Dole a Mahangar Fiqihu

Malaman Fiqihu na Musulunci sun haɗu a kan cewa idan mace ta nuna rashin amincewa da aure, auren bai inganta ba. Idan har waliyyi ya tilasta mata, kuma aka ɗaura auren, to wannan auren ɓatacce ne kuma mace tana da haƙƙin zuwa gaban alkali don neman soke auren.

Wannan yana nuna cikakken kariya da haƙƙin zaɓi da Musulunci ya bai wa mata, wanda ya bambanta da al'adu da tsarin zamantakewar wasu al'ummomi a lokutan baya.

5. Auren Soyayya

Wannan shi ne auren da aka saba da shi. Wato aure ne da ake bin dukkannin matakan da al’ada suka tanadar tun daga kan nema har zuwa ɗaurin aure da tarewa. Akan yi duk wani abu da aka saba yi a kowane lokaci, misali:

a.      Kayan toshi

b.      Gaisuwar uwa da uba

c.       Lefe

d.     Kuɗin aure da/ko sadaki

e.      Sayan baki

A ɓangaren gidan mata, su ma sukan yi hidindimu na kashe kuɗi. Daga ciki har da kayan ɗaki da kayan gara. Abubuwan da ake gudanarwa da yadda ake gudanar da su a wannan nau’in aure suna da alaƙa da arzikin ma’auratan.

6. Auren Jari

Aure ne da akan yi shi don nuna kwaɗayi, wato son abin duniya kamar kuɗi ko muƙami. Akan auri mace kawai ne don kuɗinta ko muƙaminta, ko kuɗin iyayenta da maga’isanta ko matsayinsu, ba wai don tsantsar so da ƙauna ba. Wannan wani nau’in aure ne da mafi yawan lokuta maza kan ƙulla shi domin cimma wani buri na rayuwa. Duk da haka, su ma mata sukan yi auren jari. Suna iya auren mutum domin kuɗinsa, ko da kuwa tsoho ne.[5]

7. Auren Ɗiban Wuta/Kashe Wuta/Kisan Wuta

Wannan nau’in aure ne da ake ƙullawa ba don zama na dindindin ba. Addinin Musulunci ya zo da tsarin sakin aure. Yayin da aka yi saki da suka kai uku (3), to matar ta haramta ga wannan miji. Abin da zai sake halarta aure a tsakaninsu kawai shi ne idan ta je ta yi wani auren bisa sunna, sannan dalili (ba na shiri ba) ya sa auren ya mutu. A wannan gaɓa ne take da damar sake komawa gidan tsohon mijinta da ya taɓa yi mata saki uku.

Mutane suna amfani da wannan dama a matsayin dabarar komawa gidan miji bayan an yi saki uku. Sukan yi hakan ta hanyar haɗa baki da wani mijin na daban, a inda za a yi auren wucin gadi. Ba da jimawa ba bayan sabon auren (misali kwanaki ko makonni ko watanni kaɗan), mijin zai saki matar domin ta koma gidan tsohon mijinta (wanda ya yi mata saki uku). Wannan shi ake kira auren kisan wuta.

Auren kisan wuta yana iya faruwa ta fuskoki daban-daban, ciki har da:

a.      Tana iya kasancewa matar da tsohon mijin da kuma sabon mijin da za ta aura duk sun san da cewa auren kisan wuta ne.

b.      Tana iya kasancewa tsohon mijin ne kawai yake da masaniya, sai ya haɗa baki da wani namiji daban domin ya auri matar, sannan ya sake ta bayan lokaci kaɗan, domin shi kuma tsohon mijin ya sake auren ta.

c.       Tana iya yiwuwa matar ce kawai take da masaniya. Za ta auri wani namiji, sannan ta kashe auren bayan lokaci kaɗan domin ta koma gidan mijinta. Tana kuma iya haɗa baki da wanda za ta aura ɗin domin su yi auren wucin gadi domin ya sake ta bayan wani lokaci wanda hakan zai ba ta damar komawa gidan mijinta.

A wasu lokutan, akan biya namijin da zai auri mata da sunan auren kisan wuta. An samu lokutan da taƙaddama takan kai har kotu a inda wanda ya yi auren kisan wuta ya tsaya kai da fata cewa shi ba zai sake matar ba.

8. Auren Dangana-Sanda/Jingina Sanda/Ɗauki Sandarka

Wannan nau’in aure ne a inda matar take zama a gidanta na kanta, amma a garin da mijin yake. Ranar kwanan ɗakin matar, mijin yakan je gidan nata domin ya kwana. Ana ganin cewar sunan jingina sandarka ko ɗauki sandarka ya samo asali ne daga yadda ire-iren waɗannan mazaje sukan je gidajen nasu da sanda – ko dai don dogarawa, ko don kariyar kai.

Yayin da mai gida ya shiga gidan matarsa, zai dangana/jingina sandar a jikin ɗaki ko dai ta waje ko ta ciki. Haka ma idan lokacin tafiyarsa ta yi yayin da gari ya waye, zai ɗauki sandarsa kafin ya tafi.

9. Auren Je Ka da Kwarinka

Wannan nau’in aure ne a inda namiji yake auren wata mata da take wani gari na daban. A al’adance, idan miji zai tafi wurinta ranar da take da girki, to sai ya ɗauki kwari ya riƙe, saboda haɗari ko hari. Dattawa da zawarawa da masu yawan tafiye-tafiye ne suka fi yin irin wannan aure. Abin da ya bambanta shi da auren dangana-sanda shi ne, a auren dangana-sanda, mijin da matar a gari ɗaya suke. A auren je ka da kwarinka kuwa, suna garuruwa daban-daban ne.[6]

10. Auren Takalmi

Wannan nau’in aure ne da yake matuƙar kama da na je ka da kwarinka. Shi ma ma’auratan sukan kasance a garuruwa mabambanta ne. Abin da ya bambanta wannan nau’in da auren je ka da kwarinka shi ne, mai auren takalmi yana da takamaimain rana ko ranakun zuwa garin matar. Yawanci akan yi auren ne a garin da mijin yake cin kasuwa ko kuma wurin da yake zuwa sallar Juma’a (bayan zuwan Musulunci).

Masu zuwa cin kasuwa sukan kwana a rumfunan kasuwanni da sauran wurare masu kyau da masu muni. A maimakon wannan rayuwar gararamba, mutum yakan auri wata mazauniyar garin. Duk ranar da ya je cin kasuwa, to a can zai sauƙa. Akwai ruwayar labarin kunne ya girmi kaka da yake nuna cewa, ana kiran wannan nau’in aure da suna auren takalmi kasancewar tafiyar mai nisa ce. Mai yin ta ba zai ji daɗin tafiyar ba har sai ya saka takalmi irin wanda yake kare mutum daga ƙaya ko ƙananan abubuwan da zai iya takawa a kan hanya.

11. Auren Ɗaukar Buta

Wannan aure ne da akan yi tsakanin dattijo da dattijuwa, musamman lokacin da mutum ya tsufa, sha’awar saduwar aure ta fita a ransa, kuma ba shi da mata. Yakan nemi wata tsohuwa mai ɗan ƙarfi su yi aure don ta riƙa taimaka masa ga ayyukan yau da kullum kawai, ba tare da iya gudanar da mu’amalar saduwa ba. A irin wannan yanayi akan ce, “ai ya yi aure ko da don ya samu mai zuba masa ruwa a buta.”

13. Huce Takaici/Auren Ɗiban Haushi/Auren Ɗebe Haushi

Akan samu lokutan da mace takan kasance mai matuƙar matsala da rashin kunya ko rashin ji a gidan aure. Za ta fitini mijinta da wulaƙanci iri-iri. A wasu lokutan, wasu mazajen da suka fuskanci makamancin wannan yanayi sukan auro wata matar ko da auren nasu na fari bai daɗe ba. Yayin da suka tashi auren, za su auro wadda ta fi matar tasu a kyau na halitta da na ɗabi’a da kuma asali. Wannan shi ake kira auren huce takaici ko auren ɗiban haushi.

A wasu lokutan kuwa, a samari ake yi wa irin wannan aure. Akan yi shi yayin da wata budurwa ta yaudari yaro ko ta ci mutuncinsa ta hanyar ƙin auren sa bayan an daɗe ana kitsa zancen aure, ko kuma idan iyayen yarinyar suka hana auren cikin wani yanayi na rashin dattaku. A irin wannan lokaci, iyayen yaron za su yi gaggawar nemo masa wata matar wadda ta fi ta farko a kyawun halitta da na hali da asali. Wani lokaci ma akan so saurayin ya riga budurwar yin aure. Babban manufar wannan aure shi ne huce takaici da cusa baƙin ciki ga yarinyar farkon da/ko iyayenta.

Ana kiran wannan nau’in aure da wasu sunaye da suka haɗa da:

a.      Auren kece raini

b.      Auren ɗiban tsiwa

14. Auren Gayya

Wannan nau’in aure ne da mutum yake yi idan matarsa ta addabe shi. Yakan yi auren kafin ya sake ta, ko kuma bayan ya sake ta amma gabanin ta gama idda. Manufar hakan shi ne don kar ta riga shi yin aure. Ana yin wannan aure ne don huce haushin wulaƙanci da matar ta yi masa ta hanyar maye gurbinta da wata, tun kafin ta sake wani aure, ko ma kafin ta fita daga gidan miji. Wato dai, ya rama wannan baƙin hali da ta nuna masa ta hanyar ramuwar gayya wadda ta fi ta gayya zafi.

15. Auren Ɓoyon Wata

Wannan nau’in aure ne da ake ƙullawa kafin azumi, a kuma rabu bayan salla. Mafi yawa ana ƙulla irin wannan aure ne domin mata zawarawa su yi azumi a gidan aure, su kuma maza su yi azumi tare da mata, don kaucewa tsangwamar al’adar Hausawa ta watan azumi. Al’adar kamun gwauro sananniya ce a ƙasar Hausa, inda ake zolayar gwagware a watan azumi.

16. Auren Kangara

Wannan nau’in aure ne a inda masu arziki ko mulki suke ture talakawa. Yayin da aka yi baikon yarinya, sai kuma wani mai kuɗi ko mulki ya yi amfani da matsayinsa domin shan gaban wanda aka yi wa baikon domin a ɗaura auren da shi (mai arziki ko mulkin), to akan kira wannan aure da suna auren kangara.

1.1.2 Ire-Iren Aure Ta Fuskar Ma’aurata

Bayan ire-iren aure da aka tattauna a sama a ƙarƙashin 1.1.1, ana kuma iya samar da rabe-raben aure ta la’akari da ma’auratan karan kansu. Wannan ya shafi nazartar waɗanda suka yi auren domin sanya su a cikin rukuni na musamman. Ta la’akari da ma’aurata, ana iya samar da ire-iren aure da suka haɗa da:

a.      Auren saurayi da budurwa

b.      Auren bazawari da bazawara

c.       Auren bazawari da budurwa

d.     Auren saurayi da bazawara

Masana irin su Yahaya da wasu (1992 sh. 95) sun tattauna waɗannan fuskokin aure inda suka tafi kan cewa rukunin farkon (auren saurayi da budurwa) ya fi armashi. A irin wannan aure ne ake shagulgulan biki masu yawa.

1. Auren Saurayi da Budurwa

Wannan aure ne da ake ƙullawa tsakanin saurayi (samrayi), (yaron da ya balaga, amma bai yi auren fari ba) da kuma budurwa (sauraya ko samraya), wato yarinyar da ita ma ba ta yi auren fari ba.

2. Auren Bazawari da Bazawara

Aure ne da ake ƙullawa tsakanin bazawari, wato namijin da ya saki matarsa ko ta mutu (rasu) ko kuma yana da mata, sai dai yana buƙatar ƙarin aure a matsayin mata ta biyu ko ta uku ko kuma cikon ta huɗu, da bazawara, wato, matar da aurenta ya mutu, ko mijinta ya mutu ta gama idda tana zaman gida kafin ta sami wani miji.

3. Auren Bazawari Da Budurwa

Aure ne da ke gudana tsakanin namiji wanda ya yi auren fari, amma ba shi da mata, yana buƙatar cike gurbinta, ko kuma yana da ita sai dai yana buƙatar ƙari, da yarinyar da ba ta yi auren fari ba. Yayin da aka yi wannan aure, matar wadda ta kasance budurwa za ta je gidansa a matsayin matar fari idan sun rabu ne da matarsa ta faro ko kuma ta rasu. Idan kuwa yana da aure a lokacin, to za ta je a matsayin mata ta biyu ko ta uku ko kuma ta huɗu.

4. Auren Saurayi da Bazawara

Aure ne da ake ɗaurawa tsakanin yaron da bai yi auren fari ba da matar da aurenta ya mutu ko kuma mijinta ya rasu. Yawanci yaro zai yarda da auren ta ne saboda tsananin so ya yake mata ko kuma yayin da ta kasance tana da kuɗi ko wani muƙami ko daraja ta musamman a cikin al’umma. Idan haka ta faru, za a ce ya yi auren jari.

Tsokaci

Ko bayan waɗannan ire-iren aure da aka tattauna a sama, yana da kyau a fahimci cewa a har kullum zamani yana sake kawo wasu sababbin nau’ukan aure. Guda biyu da zamani ya kawo kuma ake jin amonsu a yau su ne:

a.      Auren wuf

b.      Auren de onli (day only)

---

[1] Yayin da ake nazarin auren Hausawa na gargajiya (kafin zuwan Musulunci ƙasar Hausa), akan yi amfani da lafazin “hanyoyin mallakar mace.” Wannan yana nuni da yadda ake da hanyoyi da dama na zamar da mace matar aure ba tare da gina neman a kan soyayya ba. Daga ciki har da (a) tsintuwa da (b) yaƙi da (c) cire da (d) kyauta, da sauransu.

[2] Toshi kyauta ce da namiji yake ba wa mace domin kyautatawa da nuna soyayya. Ya kamata a duba wannan ma’ana ta toshi. Toshi kyauta ce kuwa? A sake duba lamarin!

[3] Domin ƙarin bayani game da matsalolin da auren dole ya haifar a wannan zamani, ana iya duba: BBC Hausa (2018) da ASAS (2025) da Hamza (2025).

[4] Dattijuwa mai suna Tambayi ‘yar ƙauyen Mamola na gundumar Rawayya a ƙaramar hukumar Bunguɗu ta bayyana cewa ita ma irin wannan aure aka yi mata. A lokacin tattaunawa da ita, tana da kimanin shekaru 70 zuwa 72 a duniya.

[5] Irin wannan aure ne ake yi wa kirari da “Auren jiran gado.”

[6] Akwai ruwayoyin labarai da suke nuna cewa, ana kiran wannan aure da je ka da kwarinka ne kasancewar mai gidan ba a gari yake ba. Yayin da zai je garin da matarsa take, zai ɗauki kwari da baka domin idan ya iske kwarto a gidansa ya auka masa da yaƙi.

Manazarta

Labbo, S.S. & Sani, A-U. (2025). Aure a ƙunshiyar karin magana. Amsoshi Academic Publishers. ISBN: 978-1-257-07209-5. DOI: https://doi.org/10.5281/zenodo.19513449