Bayani Wasu Kalmomin Fannu Na Littafin Danfara a Duniyar Intanet

Wannan ɓangare na littafin yana ɗauke da taƙaitaccen bayani dangane da wasu kalmomin fannu da aka yi amfani da su a cikin littafin.

Adimin: Shugaba ko mai gudanarwa a zaurukan kafafen intanet kamar Telegram da WhatsApp/Wasaf da sauransu.

Cin Task: Yana nufin wani aiki da ake aiwatarwa domin samun maki ko sulalla da suka danganci wani kuɗin intanet.

COTP (Crypto OTC Trading Platform): A duba ma’anar OTC.

Escrow: Wani wuri ko wani mutum ko na’ura da take ajiye kuɗaɗe cikin tsaro yayin gudanar da harƙallar kasuwanci a kan intanet. Tsari ne wanda yake tabbatar da ba a yi damfara ba a harƙallar kasuwancin intanet. Misali, wanda zai sayar da kuɗin intanet, kasuwar kan intanet za ta karɓi kuɗin ta ajiye shi a escrow. Yayin da mai saya ya tura masa kuɗi, sannan mai sayarwar ya bayar da tabbacin cewa kuɗin sun shiga, to daga nan kasuwa za ta sake kuɗin daga escrow zuwa akawun ɗin wanda ya sayi kaya.

Gas Fee – Kuɗin Kasuwanci a Kan Bulokcen: Kuɗi ne da ake sakawa ko dai a sigar kuɗin intanet ko kuma kuɗin duniyar zahiri. Ana saka shi ne a matsayin wani abu mai kama da rajistar gudanar da kasuwanci a kan intanet da ya shafi wani nau’in kuɗin intanet takamaimai.

Inksnation: Wani shiri ne (project) na damfara wanda ya zo da sigar kuɗin intanet da iƙirarin yaye talauci ga ‘yan Nijeriya a cikin watanni tara (9). Hausawa masu yawa sun faɗa wannan tarko na damfara.

Mining - Haƙo: Wannan ya shafi haƙon kuɗin intanet ko kadarar intanet da ake yi ta hanyar amfani da na'urori.

Minting - Rajista/Daidaituwa: A hadahadar kuɗaɗen intanet, minting yana nufin yin rajista da daidaituwar da mutum yake yi game da wani kuɗin intanet bisa tsare-tsare da ƙa’idojin bulokcen.

OTC (Over the Counter): Wata kasuwar hadahadar kuɗaɗen intanet ta damfara da aka taɓa yi. Masu kasuwar suna iƙirarin taimaka wa ‘yan kasuwa ta hanyar ba su damar gudanar da kasuwanci a manyan kasuwannin hadahadar kuɗaɗen intanet (kamar Binance) ba tare da sun sha wahalar shiga manyan kasuwannin ba. Manyan kasuwannin suna da wahalar sha’ani domin sarƙaƙiyarsu da kuma ƙa’idojinsu.

P2P (Peer-to-Peer): Tsarin kasuwanci na mutum zuwa mutum, wato kasuwanci kai-tsaye tsakanin mutane biyu

PinKard: Sunan katin cire kuɗi ne wanda masu kuɗin intanet na Inksnation suka samar.

PinKoin: Kuɗin intanet ne wanda masu Inksnation suka samar.

USDT: Kai-tsaye yana mazaunin kuɗin intanet ne da ake kira Tether. Akan kira shi da "ticker symbol for the Tether stablecoin cryptocurrency", wato taƙaitawa da take mazaunin alama ko take wakiltar Tether.

 An ciro daga littafin:

Damfara a Duniyar Intanet

Na

Abu-Ubaida Sani

Jibril Yusuf

Muhammad Sulaiman Abdullahi

Manazarta: 

Sani, A-U.,  Yusuf, J. & Abdullahi, M.S. (2025). Damfara a duniyar intanet. SAS Publishers. ISBN: 978-978-695-575-9. DOI: https://doi.org/10.5281/zenodo.19513307