Ashabul Shajara

𝐓𝐀𝐌𝐁𝐀𝐘𝐀❓

Assalamu Alaikum Malam KHAMIS, da fatan kana lafiya. Muna godiya sosai da fadakarwarka. Allah ya Saka maka da alkhairi. Tambayata ita ce; Su waye Ashabul Shajara?

𝐀𝐌𝐒𝐀❗️

Wa alaikumussalam warahmatullahi wabarakatuhu

Ashabul Shajara (ko Ma'abota Itaciya) suna nufin waccan rukunin Sahabbai na gari (kimanin mutum 1, 400 zuwa 1, 500) wadanda suka yi wa Annabi Muhammadu (Sallallahu Alaihi Wasallam) mubaya'a (alkawarin biyayya da sadaukarwa) a karkashin wata bishiyar magarya a lokacin yarjejeniyar Al-Hudaibiyyah.

Wannan bishiyar da suka yi rantsuwa a karkashinta ita ce ake kira da Shajara, kuma mutanen da suka tsaya a wurin ake kira Ashabul Shajara.

Wannan mubaya'a ita ce ake kira da Bay'atun Ridwan (Mubaya'ar yardarm Ubangiji), kuma ta faru ne a watan Zul-Ƙi'dah na shekara ta 6 bayan hijira.

Annabi (Sallallahu Alaihi Wasallam) da Sahabbansa sun fito daga Madina ne da nufin yin ibadar Umrah a Makka, ba domin yaki ba.

Kafiran Ƙuraisu na Makka suka hana su shiga, hakan ya sa Manzo (Sallallahu Alaihi Wasallam) ya zabi ya tsaya a wani guri da ake kira Al-Hudaibiyyah domin yin shawarwari.

Annabi (Sallallahu Alaihi Wasallam) ya aiki Sayyidina Usman Bin Affan zuwa cikin Makka domin ya bayyana musu cewa sun zo ne domin ziyara ba yaki ba.

Bayan tafiyar Sayyidina Usman, sai jita-jita ta baza cewa kafirai sun kashe shi. Jin wannan labari ya sa Annabi (Sallallahu Alaihi Wasallam) ya zauna a karkashin wata bishiya, inda Sahabbai suka yi dafifi suna yi masa alkawarin cewa ba za su gudu ba, kuma za su yi yaki har zuwa mutuwa domin kare martabar Musulunci.

Allah Madaukakin Sarki ya saukar da ayoyi na musamman a cikin Suratul Fath domin yaba wa wadannan mutane da kuma nuna ya yarda da su. Allah yana cewa:

لَقَدْ رَضِيَ اللَّهُ عَنِ الْمُؤْمِنِينَ إِذْ يُبَايِعُونَكَ تَحْتَ الشَّجَرَةِ فَعَلِمَ مَا فِي قُلُوبِهِمْ فَأَنْزَلَ السَّكِينَةَ عَلَيْهِمْ وَأَثَابَهُمْ فَتْحًا قَرِيبًا

"Lalle ne haƙĩƙa, Allah Ya yarda da muminai a lõkacin da suke yi maka mubãya, a a ƙarƙashin itãciyar nan dõmin Yã san abin da ke cikin zukãtansu sai Yã saukar da natsuwa a kansu, kuma Ya sãka musu da wani cin nasara makusanci. (Surat Al-Fath: 18)

Akwai hadisi ingantacce inda Annabi (Sallallahu Alaihi Wasallam) yake cewa: "Babu wani mutum da zai shiga wuta daga cikin wadanda suka yi mubaya'a a karkashin itaciya. " (Muslim).

Ana daukar su a matsayin rukunin Sahabbai mafi daraja bayan wadanda suka halarci yakin Badar.

Saboda yawansu ya kai kusan mutum 1, 400 zuwa 1, 500 ba za a iya lissafa dukkan sunayensu a nan ba, amman ga sunayen shahararru kuma manyan Sahabbai da suka halarci wannan mubaya'ar:

1. Abu Bakr As-Siddiƙ

2. Umar ibn al-Khattab (shi ne ma yake rike da hannun Annabi lokacin mubaya'ar)

3. Ali ibn Abi Talib

4. Uthman ibn Affan (Annabi Sallallahu Alaihi Wasallam) ya yi amfani da hannunsa na hagu ya yi mubaya'a a madadinsa tunda yana tsare a Makka)

5. Sa'd ibn Abi Waƙƙas

6. Abu Ubaidah ibn al-Jarrah

7. Abdurrahman ibn Awf

8. Zubair ibn al-Awwam

9. Talha ibn Ubaydullah

10. Jabir ibn Abdullah (babban mai fadin hadisan da suka shafi wannan taron)

11. Salamah ibn al-Akwa' (shi ne ya fara yin mubaya'ar har sau uku: a gaba, tsakiya, da bayan rundunar)

12. Ma'ƙil ibn Yasar (shi ne ya rike reshen itaciyar sama don kada ta taba Annabi Sallallahu Alaihi Wasallam)

13. Abu Sinan al-Asadi (daga cikin mutanen farko da suka yi mubaya'ar)

14. Abdullah ibn Umar

15. Mikdad ibn Aswad

16. Ammar ibn Yasir.

Da sauran manyan Sahabbai.

WALLAHU A'ALAM

Zauren Fatawoyi Bisa Alkur'ani Da Sunnah. Ku kasance damu cikin wannan group domin Fadakarwa. . .

   ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.