Fitar Mace Ba Da Izinin Miji Ba

𝐓𝐀𝐌𝐁𝐀𝐘𝐀❓

As-Salaam Alaikum Wa Rahmatul Laah. Matar da takan samu saɓani da mijinta wanda ke aiki a wani gari har sukan yi kamar wata ɗaya ba sa magana, kuma a cikin hakan takan fita unguwa ba da izinin mijin ba domin ko ta yi masa ‘text message’ ba ya amsawa. Kuma bayan ya huce ba ya mata faɗa a kan fitar da ta yi. Ina hukuncin wannan?

𝐀𝐌𝐒𝐀❗

Wa Alaikumus Salaam Wa Rahmatul Laah Wa Barakaatuh.

Manzon Allaah (Sallal Laahu Alaihi Wa Alihi Wa Sallam) ya ce:

« إِذَا اسْتَأْذَنَتِ امْرَأَةُ أَحَدِكُمْ إِلَى الْمَسْجِدِ فَrلاَ يَمْنَعْهَا »

Idan matar ɗayanku ta nemi izininsa domin ta je masallaci, to kar ya hana ta. (Sahih Al-Bukhaariy: 5238, Sahih Muslim: 1016, Al-Musnad: 4617).

Da kuma hadisin Abu-Daawud (565) daga Abu-Hurairah (Radiyal Laahu Anhu), shi kuma daga Annabi (Sallal Laahu Alaihi Wa Alihi Wa Sallam) ya ce:

« لاَ تَمْنَعُوا إِمَاءَ اللَّهِ مَسَاجِدَ اللَّهِ وَلَكِنْ لِيَخْرُجْنَ وَهُنَّ تَفِلاَتٌ »

Kar ku hana bayin Allaah mata zuwa masallatan Allaah, sai dai kuma su fita ba da ado ko kwalliya ba. (A cikin Sahih Abi-Daawud (3/101) Al-Albaaniy ya ce: Isnadinsa kyakkyawa ne ingantacce. An-Nawawiy ya inganta shi, kuma Ibn Khuzaimah ya fitar da shi a cikin littafinsa As-Saheeh).

Sannan na ce:

Daga wannan hadisan mun fahimci cewa: Tun da dai har zuwa masallaci, wurin da ya fi soyuwa a wurin Allaah Ubangijin Halittu a duniya, sai mace ta nemi izinin mijin aurenta, to ina kuma ga zuwa wurin da ba wannan ba, kamar zuwa wuraren bukukuwa ko tarurruka ko ayyuka ko kuma ma zuwa kasuwanni, waɗanda su ne wuraren da Allaah ya fi ƙyamatar su a duniya?!

A taƙaice dai: Hadisan da suka zo a kan hana mace fita daga gidan mijinta sai da izininsa da yardarsa sahihai ne. Kuma mace ta nemi izinin mijinta kafin ta fita daga gida abu ne sananne a cikin addinin musulunci. Shiyasa tun tuni malaman Fiƙhu suka lissafa shi a cikin haƙƙoƙin miji waɗanda su ke a kan matar aure. (Sahih Fiƙhis Sunnah: 3/174, Tamaamul Minnah: 3/116).

Wannan ke nan.

Don haka sai wannan matar ta yi ƙoƙarin samun amincewa da yardar mijinta kafin ta fita ko da ta hanyar samun buɗaɗɗen izini ne, kamar ya ce: ‘Duk sadda fita ta kama, na ba ki izinin ki tafi!’ Kodayake haka ɗin wani nau’in sakaci ne kuma yana tattare da waɗansu matsaloli ababan ƙyama, sai dai kuma a nan shi ne ya fi da a bari ta yi gaban kanta, don kawai ba ya yi mata faɗa idan ta gama aikata hakan!

Rashin yin faɗar miji a kan hakan ba dalili ne mai halatta mata yin gaban kanta ba, musamman dayake fitar ta a cikin jama’a ba haƙƙin mijinta ne shi kaɗai ba. Akwai haƙƙin sauran al’umma da ya wajaba a gyara garuruwansu ta hanyar hana yawaitan fitan mata a cikin mazajen da ba muharramansu ba, a bayan haƙƙin Ubangiji Maɗaukakin Sarki da ya kafa waɗannan dokokin.

Allaah ya ganar da mu,

Wal Laahu A’lam.

Sheikh Muhammad Abdullaah Assalafiy

Zauren Fatawoyi Bisa Alkur'ani Da Sunnah. Ku kasance Damu...

ƘARIN BAYANI

FITAR MACE BA DA IZININ MIJI BA

𝐓𝐀𝐌𝐁𝐀𝐘𝐀❓

Assalamu Alaikum wa Rahmatullahi wa Barakatuh. Malam ina da tambaya: idan mace tana da saɓani da mijinta wanda yake aiki a wani gari, har wani lokaci sukan yi tsawon lokaci ba sa magana (kamar wata ɗaya ko fiye) sai mace ta buƙaci fita waje don wasu harkoki. Idan ta yi masa saƙo domin neman izininsa amma bai amsa ba, sai ta fita ba tare da izinin sa ba. Bayan sun shirya kuma mijin bai nuna damuwa ko ya yi mata faɗa a kan fitowar da ta yi ba. Mene ne hukuncin irin wannan fita a shari’ar Musulunci? Shin ya halatta ko kuwa akwai laifi a ciki?

𝐀𝐌𝐒𝐀❗️

Wa Alaikumus Salaam wa Rahmatullahi wa Barakatuh.

A cikin koyarwar Musulunci, aure yana tare da haƙƙoƙi da nauyin da Allah Ya ɗora a kan miji da mata domin su zauna cikin tsari, mutunci da fahimtar juna. Daga cikin haƙƙoƙin da malamai suka ambata akwai cewa mace ta kula da gidanta kuma ta fita daga gidan mijinta ne da izininsa, domin wannan yana cikin tsarin kula da zaman aure da kuma kare mutuncin iyali.

Annabi ﷺ ya nuna muhimmancin neman izini ko da a wurin ibada kamar zuwa masallaci. Ya ce:

« إِذَا اسْتَأْذَنَتِ امْرَأَةُ أَحَدِكُمْ إِلَى الْمَسْجِدِ فَلَا يَمْنَعْهَا »

Ma’ana:

“Idan matar ɗayanku ta nemi izininsa domin ta je masallaci, to kada ya hana ta.”

(An rawaito a Sahihul Bukhari 5238 da Sahih Muslim)

Haka kuma Annabi ﷺ ya ce:

« لَا تَمْنَعُوا إِمَاءَ اللَّهِ مَسَاجِدَ اللَّهِ وَلَكِنْ لِيَخْرُجْنَ وَهُنَّ تَفِلَاتٌ »

Ma’ana:

“Kada ku hana bayin Allah mata zuwa masallatan Allah, amma su fita ba tare da yin kwalliya ko ƙamshi ba.”

(Sunan Abi Dawud 565 – Hadisin sahihi)

Wadannan hadisan suna nuna cewa mace tana neman izinin mijinta ko da don zuwa masallaci, wanda shi ne wuri mafi daraja a duniya wajen ibada. Saboda haka malamai suka fahimci cewa fita zuwa wasu wurare kamar kasuwa, ziyara, taro ko wasu harkokin rayuwa ya fi dacewa a yi ne da izinin miji.

A Al-Qur’ani ma Allah Ya yi nuni da muhimmancin zaman mace cikin natsuwa da kiyaye tsari a rayuwar iyali:

وَقَرْنَ فِي بُيُوتِكُنَّ وَلَا تَبَرَّجْنَ تَبَرُّجَ الْجَاهِلِيَّةِ الْأُولَىٰ

Ma’ana:

“Ku zauna a gidajenku cikin natsuwa, kuma kada ku bayyana ado irin na jahiliyya ta farko.”

(Suratul Ahzab: 33)

Wannan aya tana koyar da cewa mace ta kula da mutuncinta da tsarinta, kuma kada ta rika fita yawo ba tare da dalili ba. Saboda haka malamai na fiqhu sun lissafa neman izinin miji kafin fita daga gida a matsayin ɗaya daga cikin haƙƙoƙin miji a kan mata.

Dangane da halin da aka ambata a tambayar, idan mace ta yi ƙoƙarin neman izini amma mijin bai amsa ba saboda saɓani ko rashin magana, ya fi dacewa ta yi ƙoƙari ta samu yardarsa kafin fita. Idan kuwa akwai buƙata mai muhimmanci kamar lafiya, gaggawa, ko wani abin da ya zama dole, malamai sun ce ana iya fita domin buƙatar dole, amma tare da kiyaye tsari da mutunci.

Rashin yin faɗa daga mijin bayan ya dawo ba ya nufin cewa ya amince da wannan al’ada gaba ɗaya. Don haka mafi alheri shi ne su gyara hulɗarsu, su tattauna cikin hikima, kuma mijin ya bayyana mata yadda yake so ta yi idan ta buƙaci fita. Haka kuma mace ta yi ƙoƙari ta nemi yardarsa domin kiyaye zaman aure da mutunci.

A ƙarshe, Musulunci yana ƙarfafa zaman lafiya da fahimtar juna tsakanin ma’aurata. Allah Ya ce:

وَعَاشِرُوهُنَّ بِالْمَعْرُوفِ

Ma’ana:

“Ku zauna da su (matan ku) cikin kyakkyawar mu’amala.”

(Suratun Nisa’i: 19)

Saboda haka, abin da ya fi dacewa shi ne miji da mata su magance matsalolinsu cikin hikima da haƙuri, su kiyaye dokokin Allah, domin zaman aure ya kasance cikin albarka da kwanciyar hankali.

Wallahu A’lam.

 

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.