Addu’a Ga Mai Zuciya

𝐓𝐀𝐌𝐁𝐀𝐘𝐀❓

As-Salaamu Alaikum. Ko akwai wata addu’a, ko wani abu da za a iya yi wa yaro mai zuciya?

Addu’a Ga Mai Zuciya

𝐀𝐌𝐒𝐀❗️

Wa Alaikumus Salaam Wa Rahmatul Laah Wa Barakaatuh.

A hausa idan aka ce: ‘Wane mai zuciya ne’ yana ɗaukar ma’ana kyakkyawa da kuma wata ma’ana mummuna. Mai zuciya na iya zama mai himma da ƙoƙari wurin neman na-kansa, watau neman kuɗin da zai rufa wa kansa asiri, ba tare da dogaro ko zama nauyi a kan wani, ko wasu ba. Haka kuma mai zuciya na iya zama mai saurin fushi, ko mai tsananin fushi, irin wanda wani lokaci in ya fusata yakan iya yi wa kansa ko waninsa illa.

Wannan fassarar ta biyu ce ake nufi a nan, tun da dai, kamar yadda ya zo a cikin tambayar, maganin abin ake nema.

A cikin hadisi Annabi Manzon Allaah (Sallal Laahu Alaihi Wa Alihi Wa Sallam) ya bayyana mana cewa: Shi fushi daga shaiɗan ne, don haka maganinsa sai a ɗauki matakan da za su kore shaiɗanin daga mai fushin kawai, kamar ta yin isti’azah.

Al-Bukhaariy: 6048 da Muslim: 2610 sun riwaito hadisi da isnadinsu ingantacce daga Sahabi Sulaiman Bn Surad (Radiyal Laahu Anhu) ya ce: Watarana ina zaune a wurin Manzon Allaah (Sallal Laahu Alaihi Wa Alihi Wa Sallam) ga kuma wasu mutane biyu suna faɗa, suna zagin junansu. Ɗayansu idanunsa sun yi ja-zur! Kuma jijiyoyin wuyarsa sun kumbura! Sai Manzon Allaah (Sallal Laahu Alaihi Wa Alihi Wa Sallam) ya ce: Na san wata kalmar da in da zai faɗe ta da kuwa abin da yake ji ya rabu da shi:

 In da zai ce: A’uuzu bil Laah minas-Shaitaanir Rajeem (Ina roƙon Allaah ya tsare ni daga shaiɗan jefaffe), da kuwa abin da yake ji ya rabu da shi.

Sannan kuma, har yara kanana ma ana yi musu addu’o’in neman Allaah ya tsare su daga shaiɗan, kamar yadda Al-Bukhaariy: 3371 ya riwaito daga Abdullaah Bn Abbaas (Radiyal Laahu Anhumaa) cewa: Manzon Allaah ( Sallal Laahu Alaihi Wa Alihi Wa Sallam) yana roƙa wa Alhasan da Alhusain (Radiyal Laahu Anhumaa) kariyar Allaah yana cewa:

 أُعِيذُكُمَا بِكَلِمَاتِ اللهِ التَّامَّةِ ، مِنْ كُلِّ شَيْطَانٍ وَهَامَّةٍ ، وَمِنْ كُلِّ عِيْنٍ لَامَّةٍ

 Ina tsare ku da Kalmomin Allaah Cikakku, daga duk wani shaiɗani da dabba mai dafi, kuma da duk wani kambin-ido mai cutarwa.

Allaah ya shiryar da mu, ya shiryar da ‘ya’yanmu, ya sa su zama sanyin ido, kuma masu amfani gare mu a duniya da lahira.

 Wal Laahu A’lam.

sheikh Muhammad Abdullah Assalafiy

Zauren Fatawoyi Bisa Alkur’ani Da Sunnah. Ku kasance Damu...

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.