Tuwon Gero

Wannan nau’i ne na tuwo da ake samar da shi daga garin gero. Akan surfe gero a wanke sannan a daka. Garin geron shi ake tuƙawa a haɗa da kanwa ya zamo tuwon gero. A ƙauyuka an fi yin tuwon gero a maimakon birane. Haka kuma, mata da maza da yara da suke zaune a ƙauyuka sun fi yawaita cin tuwon gero fiye da sauran nau’o’in tuwo. Bugu da ƙari, har gobe a ƙauyuka ana tuƙa tuwon gero tare da ɗaiɗaikun gidaje a birane.

 Mahaɗin Tuwon Gero

         i.            Gero

       ii.            Kanwa

     iii.            Ruwa

Yayin samar da tuwon gero, akan samu geron karan kansa a surfe a kuma bushe. Daga nan sai a wanke geron (wasu kuma ba su cire dusa). Za a a daka geron. Yayin da ya daku, sai a tankaɗe shi. Bayan nan, sai a zuba ruwa a tukunya a aza bisa wuta saman murhu har sai ya tafasa.

Bayan ruwa ya tafasa, za a rage shi cikin ƙwarya ko wata roba. Sai kuma a ɗebi gari ko tsakin da ya yi saura da aka tankaɗe a yi talge da shi. Idan za a yi talge, za a jiƙa kanwa a cikin ruwa a tace ta saboda tsakuwa. Sa’annan a kwaɓa gari ko tsakin tare da ruwan kanwar. Wasu kuma da sun rage ruwan zafi sai a kaɗa guntuwar kanwa cikin tukunyar. Amma abin lura, a jiƙa kanwar a tace ya fi, saboda tsabtace abincin. Za a zuba wannan talgen a cikin ruwan zafin da aka rage a cikin tukunyar. Yayin da ake zubawa, za a riƙa gaurayawa da muciya domin ya haɗe sosai ba tare da gudaji ba.

Akan rufe tukunya kimanin mintuna ashirin (20) bayan talge, ko kuma adadin lokacin da aka tabbatar ya dafu. Bayan tabbatar da dafuwar talgen, za a ɗauko garin da aka aje, a riƙa barbaɗawa ana kuma juyawa da muciya har sai garin ya ƙare. Sai kuma a fara tuƙa tuwon sosai. Bayan an kammala tuƙi, za a bar shi rufe har tsawon mintuna ashirin (20) ko wani lokaci makamancin haka. Kafin a rufe tukunya akan ɗan zuba ruwan zafi kaɗan. Idan an tabbatar da ya salale sai a sake tuƙawa da muciya.

Da zarar an kammala tsaf, sai batun kwashewa. Akan yi amfani da mara wajen ɗebowa da zubawa cikin ƙwarya domin malmalawa. Daga nan sai batun sanyawa cikin kwanuka ko robobi ko kuma kuloli, musamman yanzu da zamani ya samar da su. An fi cin wannan nau’in tuwo da miyar yauƙi.

Tsokaci 

Tuwon gero na ɗaya daga cikin nau’o’in abinci da ke samar da ƙarfin jiki ga ɗan Adam. Za a iya hasashen cewa, yawan cin irin waɗannan nau’o’in abinci da mutanen ƙauye ke yi, shi ke ba su damar gudanar da ayyukan ƙarfi sama da mutanen birni. Kusan za a iya cewa, yaran ƙauye sun fi yaran birni ƙarfi da kuzari. Wannan kuwa ba ya rasa nasaba da bambancin abinci da akan samu daga birni zuwa ƙauye. 

Citation: Sani, A-U. & Umar, H.A. (2022). Cimakar Hausawa. Kano: WT Press. ISBN: 978-978-984-562-9.

Get a copy:

To obtain a copy of this book, kindly send a WhatsApp message to:

+2348133529736

You can also write an email to:

abuubaidasani5@gmail.com