Wanda Ya Ganni A Mafarki Zai Ganni A Fili

𝐓𝐀𝐌𝐁𝐀𝐘𝐀❓

Akramakallah shin akwai hadisin da ya tabbata daga manzon Allah (Sallallahu alaihi Wasallam) cewa yace '' man ra'ani fil manami fasayarani fil yaqzwa'' wato wanda ya ganni a mafarki to tabbas zai ganni a fili. To shin malam hakan tana yiwuwa, kuma har ma Annabin ya bada wata falala?

𝐀𝐌𝐒𝐀❗️

Ɗan'uwa wannan hadisi ne tabbatacce daga Annabi Sallallahu alaihi Wasallam kamar yadda Bukhari ya rawaito shi a hadisi mai lamba ta: 6592

Saidai malamai sun yi saɓani game da lafazin zai ganni a fili, wasu sun ce: ma'anarsa: zai gan shi ranar alkiyama da sifa ta musamman , wasu kuma sun ce zai gan shi a duniya, saidai wannan zancen yana da rauni sosai, tun da hadisi ya tabbata cewa Annabawa suna cikin kabarinsu, wasu malaman kuma sun ce hadisin yana Magana ne akan wadanda suka zo a zamaninnsa, ma'ana duk wanda ya gan shi a mafarki, to zai haɗu da shi.

Malamai suna cewa abin da ake nufi shi ne ka gan shi da siffofinsa wadanda suka tabbata a hadisi, inda za ka gan shi bakikkirin ba gemu, ko da mafarkin ya nuna maka Annabi ne to ba shi ba ne, tun da hakan ya saɓawa siffarsa a hadisi, wannan ya sa idan mutum ya zo ya cewa: Muhammad dan Siirin (RA) ya ga Annabi Sallallahu alaihi Wasallam a mafarki yakan ce masa siffanta min shi, in ya fadi kamannin da suka saɓawa hadisai, sai ya ce ba shi ka gani ba, an rawaito kwatankwacin haka daha Ibnu Abbas.

Ba'a karɓar wani hukunci ko wata falala daga Annabi Sallallahu alaihi Wasallam a cikin mafarki, saboda hakan yana nuna tawayar addini, tare da cewa aya ta uku a cikin suratul Ma'ida ta nuna cikar addini, tun fiye da shekara dubu

الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الْإِسْلَامَ دِينًا

A yau Na kammala muku addininku, Kuma Na cika ni'imaTa a kanku, Kuma Na yarda da Musulunci ya zama addini a gare ku. (Suratul Maida aya 3)

Don neman Karin bayani duba: Alminhaj na Nawawy 1/50 da kuma Fathul-bary 12/386.

Allah ne mafi sani

Jamilu Zarewa

Zauren Fatawoyi Bisa Alkur'ani Da Sunnah. Ku kasance Damu...

𝐖𝐇𝐀𝐓𝐒𝐀𝐏𝐏👇

https://chat.whatsapp.com/EbkKRXdFzNu4F8aQZbZ1Vx

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

𝐓𝐄𝐋𝐄𝐆𝐑𝐀𝐌👇

 https://t.me/TambayaDaAnsa

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.