Sallar Istikhaara

𝐓𝐀𝐌𝐁𝐀𝐘𝐀❓

As-Salaam Alaikum Wa Rahmatul Laah. Wai shin yaya ake yin Sallar Istikhaarah ne?

𝐀𝐌𝐒𝐀❗️

Wa Alaikumus Salaam Wa Rahmatul Laah Wa Barakaatuh.

Al-Imaam Al-Bukhaariy (Rahimahul Laah) ya riwaito hadisi (lamba: 1166, 6382) daga Sahabi Jaabir Bn Abdillaah (Radiyal Laahu Anhumaa) ya ce:

Manzon Allaah (Sallal Laahu Alaihi Wa Alihi Wa Sallam) ya kasance yana koya mana yin Istikhaarah a cikin al’amurra dukkansu, kamar yadda yake koya mana Surah ta Alqur’ani, yana cewa:

Idan ɗayanku ya himmatu ga wani al’amari sai ya yi sallah raka’o’i biyu ba na farilla ba, sannan kuma sai ya ce:

اللَّهُمَّ إِنِّى أَسْتَخِيرُكَ بِعِلْمِكَ ، وَأَسْتَقْدِرُكَ بِقُدْرَتِكَ ، وَأَسْأَلُكَ مِنْ فَضْلِكَ الْعَظِيمِ ، فَإِنَّكَ تَقْدِرُ وَلاَ أَقْدِرُ ، وَتَعْلَمُ وَلاَ أَعْلَمُ ، وَأَنْتَ عَلاَّمُ الْغُيُوبِ ، اللَّهُمَّ إِنْ كُنْتَ تَعْلَمُ أَنَّ هَذَا الأَمْرَ خَيْرٌ لِى فِى دِينِى ، وَمَعَاشِى ، وَعَاقِبَةِ أَمْرِى - أَوْ قَالَ : عَاجِلِ أَمْرِى وَآجِلِهِ - فَاقْدُرْهُ لِى ، وَيَسِّرْهُ لِى ، ثُمَّ بَارِكْ لِى فِيهِ ، وَإِنْ كُنْتَ تَعْلَمُ أَنَّ هَذَا الأَمْرَ شَرٌّ لِى فِى دِينِى ، وَمَعَاشِى ، وَعَاقِبَةِ أَمْرِى - أَوْ قَالَ : فِى عَاجِلِ أَمْرِى وَآجِلِهِ - فَاصْرِفْهُ عَنِّى ، وَاصْرِفْنِى عَنْهُ ، وَاقْدُرْ لِى الْخَيْرَ حَيْثُ كَانَ ، ثُمَّ أَرْضِنِى - قَالَ - : وَيُسَمِّى حَاجَتَهُ

Ya Allaah! Haƙiƙa! Ina neman zaɓinka da iliminka, kuma ina neman ƙaddarawarka da ƙudurarka, kuma ina roƙonka daga falalarka mai girma, domin kai kake ƙaddarawa ni kuwa ba na ƙaddara komai, kuma kai kake sani ni kuwa ba na sanin komai, kuma kai ne masanin duk abin da ya ke ɓoye. Ya Allaah! Idan ka san cewa wannan al’amarin alkhairi ne gare ni a cikin addinina da rayuwata da ƙarshen al’amarina, ko kuma ya ce: - Magaggaucin al’amarina da majinkircinsa -, to ka ƙaddara mini shi, kuma ka sawwaƙe mini shi, sannan kuma ka yi mini albarka a cikinsa. Ya Allaah! Idan ka san cewa wannan al’amarin sharri ne gare ni a cikin addinina da rayuwata da ƙarshen al’amarina, ko kuma ya ce: - Magaggaucin al’amarina da majinkircinsa -, to ka kawar da shi daga gare ni, kuma ka kawar da ni daga gare shi, kuma ka ƙaddara mini alkhairi daga duk inda ya ke, sannan ka yardar da ni da shi. Sai kuma ya ambaci buƙatarsa.

Malamai suka ce:

(i) Allaah (Tabaaraka Wa Ta’aala) Shi kaɗai ne ake dogaro gare shi, ake mayar da al’amura gare shi, kuma ake bauta masa, ake roƙonsa, domin shi kaɗai ne ke iya sanya zukata su amince, kuma su yarda da ƙaddararsa.

(ii) Cewa: ‘Ya Allaah! Idan ka san wannan al’amari…’ ya nuna cikakkiyar sallamawa ga Allaah ne, ba wai shakka ko kokonto a cikin iliminsa ba, kamar yadda wasu marasa fahimta suke faɗi.

(iii) Babu Istikhaarah a cikin abubuwan da suke wajibai ko mustahabbai, domin dukkan su alkhairi ne waɗanda ake neman musulmi ya aikata su.

(iv) Kuma babu Istikhaarah a cikin haramtattun abubuwa ko makaruhai, saboda dukkansu abubuwan ƙyama ne da aka hana musulmi aikata su.

(v) Sallar Istikhaarah ana yin ta ne a cikin abubuwan da mutum yake da zaɓi a cikinsu, watau abubuwan da malamai suke kiransu: Mubaahaat, watau: Halal, kamar: Shiga wani nau’in kasuwanci ko wata sana’a, da kamar zama a wani gari ko wata unguwa, ko aure da wani mutum ko wata mace, da sauransu.

(vi) Dole ne mai yin Istikhaarah ya zama ba shi da wani ra’ayi ko zaɓin ransa a cikin al’amarin da yake neman yin Istikhaarah a kansa tun da farko. Domin in ba haka ba, ya zama maƙaryaci ke nan a cikin maganarsa cewa: ‘Ya Allaah! Haƙiƙa! Ina neman zaɓinka

(vii) Kamar yadda hadisin ya nuna a fili ƙarara: A bayan sallar nafila raka’o’i biyu ne a ke yin addu’ar Istikhaarar, ba a bayan sallar farilla ba. Kuma yana ambatan buƙatarsa ce a daidai inda ya ce: ‘Wannan al’amari…’

(viii) Bayan Istikhaarah sai mutum ya ci gaba da irin abin da yake ganin shi ne daidai, yana mai dogaro ga Allaah, tare da ɗaukan matakan da suka kamata kuma yadda suka dace da shari’a. Kuma yana gane abin da aka zaɓa masa ne ta samun sauƙi wurin aikata shi, da kuma wahalar abin da ba shi ne aka zaɓa masa ba. Ba wai ta gani a mafarki ko makamancinsa ba.

(ix) Yana maimaita yin Sallar Istikhaarar ce da gwargwadon yadda ya ga buƙatar hakan, kamar dai yadda mara lafiya ke shan magani, har sai ya ga bayyanar abin da aka zaɓa masa.

(x) Ba daidai ba ne a nemi malamai wai su yi wa mutum Istikhaarah, domin kamar yadda ya zo a Hadisin, Annabi (Sallal Laahu Alaihi Wa Alihi Wa Sallam) koya wa Sahabbai yake yi, ba yi musu ba!

Dubi ƙarin bayani a cikin Tamaamul Minnah: 1/370-371.

WALLAHU A'ALAM

Sheikh Muhammad Abdullaah Assalafiy

Zauren Fatawoyi Bisa Alkur'ani Da Sunnah. Ku kasance Damu...

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

𝐓𝐄𝐋𝐄𝐆𝐑𝐀𝐌👇

https://t.me/TambayoyiDaAmsoshi

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.