Citation: Gobir, Y.A. & Sani, A-U. (2021). Waƙoƙin Hausa Na Gargajiya. Kaduna: Amal Printing & Publishing Nigerian LTD. ISBN: 978-978-59094-0-01.
7.5 Almajiri Da Ƙaho
Wannan ma na ɗaya daga cikin waƙoƙin bara da suka zaga ƙasar Hausa sosai. Yara ne suka fi amfani da wannan waƙar bara, musamman almajirai. Kimanin yara uku zuwa sama da haka ne suke rera ta yayin yawonsu na bara. Ga yadda waƙar take:
Bayarwa: Ɗan tuɓulle, tuɓulle,
Amshi: To!
Bayarwa: Ga almajiri da ƙaho,
Amshi: To!
Bayarwa: Ga almajiri da ƙaho uku,
Amshi: To!
Bayarwa: Guda na shukar gero,
Amshi: To!
Bayarwa: Guda na shukar dawa,
Amshi: To!
Bayarwa: Guda na shukar marar tuwo a saka a baki da daɗi,
Amshi: To!
Bayarwa: Sai ni malam Audu
Amshi: To!
Bayarwa: Naj je barar alkali,
Amshi: To!
Bayarwa: Ciwon ciki ya riƙe ni,
Amshi: To!
Bayarwa: Daga mai jiƙa mini kanwa,
Amshi: To!
Bayarwa: Sai mai jiƙa min manda,
Amshi: To!
Bayarwa: Ba magani ke nan ba,
Amshi: To!
Bayarwa: A samu farare-farare,
Amshi: To!
Bayarwa: A samu fararen mata,
Amshi: To!
Bayarwa: Su ɗebo nonon shanu,
Amshi: To!
Bayarwa: Su likkiɗa mini damu,
Amshi: To!
Bayarwa: In karkace hulata,
Amshi: To!
Bayarwa: In rangaɗa ma cikina,
Amshi: To!
Bayarwa: Ciwon ciki ya yi sauƙi,
Amshi: To!
Wannan waƙa ma tana ɗauke da barkwanci. Za a tsinci hakan daga kalaman mai ba da waƙar, inda ya nuna yana da ƙaho uku, yayin da guda ke shukar gero, guda kuma ke na dawa, na ukun yana can yana shukar marar tuwo a baki. ke nan dai yana ta lomar tuwo. Sannan ya yi amfani da salon alamci, inda ya bayyana yunwa a matsayin ciwon ciki.
){kind=link}
0 Comments
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.