Bambancin Sha'awa Da Soyayya (Kashi na 43)

Wannan na ɗaya daga cikin jerin rubuce-rubucen da Zauren Markazus Sunna ke samarwa kan batutuwa daban-daban da suka shafi rayuwar al’umma. A wannan karon rubutun ya shafi “Bambancin Sha’awa Da Soyayya” wanda Baban Manar Alƙasim ya rubuta.

Bambancin Sha'awa Da Soyayya (Kashi na 43)

Baban Manar Alƙasim

Daya daga cikin matsalolin maza a shimfida, wanda shi ke gadar da rashin jin dadin uwargida, shi ne saurin kawowar da maigida yake yi, tabbas mace ba kamar namiji take ba, ita ko ta kawo tana iya yin haƙuri da maigida, amma shi in ya riga ta to ba wani abin kirki da zai iya tabukawa, wannan ya sa, halittar mu a al'adance ita ce mace ta riga maigidanta isa gari, in kuma ya riga ta zuwa sai ya jira ta su sauka tare, in kuwa ba zai iya jurewa ba to ya tabbatar yana da rauni, mafita kawai sai ya fara kai ta kafin ya iso, a nan ne aikin dan-tsaka zai taso, kamar dai yadda muka yi bayani a baya.

Kowani maigida ya ji tsoron Allah, ya gane cewa cutarwa a addinin muslunci haramun ne, kuma irin waɗannan abubuwan da yawa in ba neman gafarar wanda aka cuta aka yi ba Allah bai yafe wa mutum, masamman in da a ce ita macen ce ta ƙi amince wa maigidan ya biya buƙatarsa ba za a kwashe da lafiya ba, kowa sai ya ji tsakaninsu, sabo da haka alhakin biyan buƙatar uwargida yana kan maigidanta, in ba shi da ƙarfin da zai kai ta ƙololuwa sabo da saurin kawowa da yake yi, to ya bi daya hanyar, wato motsa dan-tsaka, da tsotson 'yar-tuluwa, ba shakka nan da nan za su ingiza ta har inda take buƙata, kawai dai maigida ya tabbatar ya wanke hannunsa da sabulu sabo da tsoron infection.

Abu Ghait ya ce " Wannan matsala ta saurin-isa ta yi yawa a tsakanin samari a yau" [Masamman mazauna birane, yadda za ka taras da saurayi bai dauki kwankwadar sukari a bakin komai ba, duk abin da zai sha sai ya antaya sukari, ga shan lemon kwalba, wani kullum sai ya sha kwalba daya a rana, akwai wanda in ya daga wannan ƙaton kwalbar sai ya zazzage ta, wata ƙila kuma ya ma ƙara da wani abin, in ya tashi diban gasasshen jan nama ya ci da yawa, shi wannan bai da illa ta kai tsaye.

Amma abin da yake faruwa shi ne, ya dibgi nama mai gamsasshen kitse, ya sha ruwa mai sanyi ko lemon kwalba mai bala'in sukari, ya je ƙarƙashin fanka ko ma AC ya sami wuri ya kwanta, wata ƙila kuma da tashinsa ya sami ruwan sanyi ya watsa, ya za a yi namiji ba zai zama rago a shimfida ba? Abin da ya sa matasan karkara suke riƙe da ƙarfinsu koda yaushe shi ne, ba su da kudin shan waɗannan lemon kwalban koda yaushe, amma suna cin 'ya'yan bishiyoyi da ganyayyaki, su kuma wannan suna ƙona maiƙo ne da maganin ƙananan cututtuka, ba su da kudin cin gamsasshen maiƙo koda yaushe, in ma suna ci din dai za ka gan su a gonakinsu suna aiki, su sha zafin rana sannan ga isasshen motsa jiki.

Matar da ta auri tsoho a karkara, matashi a maráya ba zai iya gamsar da ita ba, masamman wanda bai motsa jiki sai aikin ƙwaƙwalwa mai dama, daga nan za mu fahimci cewa raunin da matasammu suke fama da shi a yau su ne suke jawowa kansu, ta wurin dibar gamsasshen kitse, sukari na wuce hankali da rashin motsa jiki, mata sukan dan sami sauƙin wannan don kashi sittin da wani abu cikin dari suna motsa jininsu ta wurin ayyukan cikin gida ne, share nan, wanke can, kawar da wannan jawo wancan, wace ba ta motsa jikinta ta fi samun sanyin jiki sama da mai aikace-aikace a cikin gida, zuwa aikin gwamnati ba shi ne maganin matsalar ba, akwai bambanci a tsakanin stress da exercise, wato gajiya ko motsa jini].

Abu Ghait yake cewa "Akan sami kashi 10 cikin 100 na mata ba sa samun isa ƙololuwa a lokacin saduwa sabo da wasu 'yan matsaloli" ya ce "Amma tabbas in za a kula da aikin dan-tsaka nan da nan za a kai su" [Matsalar da muke samu a yau za ta iya kasuwa zuwa kashi biyu, ta farko ita ce: Jikin mace kamar sauran abin hawa ne masu hayaƙi, ba yadda za a yi su fara tafiya sai an tayar da su, shi ya sa ko a fiƙihun saduwa aka ce Annabi ya ce a samar da dan saƙo, wato magana mai daga sha'awa a tsakanin ma'aurata, kenan auka wa mace ba tare da motsa sha'awarta ba yana iya aukar ma ta da sanyin shimfida, a ƙarshe ba abin da za ta iya yi.

Irin wannan fiƙihun duk wani namiji yana da buƙatarsa, in ya kasance gurza ba za ta iya tunkuda uwargida zuwa ƙololuwa ba, to sai a koma tsotson 'yar tuluwa, da shafar dan tsaka don ƙarisar da ita, amma masana kamar yadda na karanta, sun yi harsashen cewa waɗan da ba su da aure bai kamata ba samsam su gwada waɗannan hanyoyi don kai kansu inda Allah bai kaisu ba, suka ce hakan yana da illoli da dama ta bangaren lafiya, rayuwa, da zamantakewa, sai kuma addini da dabi'u na ƙwarai sun ƙi haka gaba daya.

Waɗan da ba miji da mata ba in suka sami kansu a irin wannan yanayi, to ba shakka wani ƙoƙari ne na:-

1) Koyon zina, a lokacin da ƙarfi ya kai mutum ya sami lada ga shi yana neman daukar zunubi.

2) A maimakon a zakke wa dan adam an dawo saduwa da hannu.

3) Yakan kawo tursasa mabubbugar mani ta yi aikin da ya fi ƙarfinta a dan lokaci kadan, tana iya gazawa in aka nace.

4) Rashin samun cikakken sha'awar da zai tatso mani din, wanda in hakan ya yi yawa to wasu gabobin za su iya raunata ciki har da zuciya.

5) Ba dabi'a ta ƙwarai ba ce namiji ya riƙa ƙoƙarin ya fitar da mani da kansa kamar yadda jaki yake yi, bayan Allah SW ya sauwaƙe masa hanya mai dadi, kuma mai lafiya ga tarin lada, kamar yadda hadisi ya tabbatar da haka.

6) Dimantuwa a kai yakan karya ƙudurar namiji ko mace a wurin saduwa, ta yadda ba za su iya kaiwa wannan ƙololuwar ba sai ta wannan hanyar, idan mutum ya nace yin haka tabbas jijiyoyinsa suna iya gaza yin aiki da kansu a lokacin saduwa.

7) Wasu malaman sun fassara yin hakan da cewa zina ne kai tsaye.

Anan Zan Dakata Sai Mun Haɗu a Rubutu Na Gaba