Karin Harshe Na Rukuni: Nazarin Hausar Shafin Makaranta Na Jaridar Aminiya

Amsoshi

DAGA

Nazir Ibrahim Abbas

Sashen Koyar da Harsunan Nijeriya

Jami’ar Usmanu Danfodiyo, Sokoto

Imel: ibrahimabbasnazir@gmail.com

                                                           Gsm: +2348060431934

Tsakure

 

Baya ga karin harshen Hausa da ake samu a yankuna daban-dabam na k’asar Hausa, haka ma ana samun karin harshe na rukunin al'umma daban-daban. Karin harshen rukuni kan samu ne, ko dai dalilin matsayi ko muk’ami ko aiki ko jinsi ko addini ko ilimi ko kuma shekaru. Wannan bincike ya yi nazarin wani nau'in Hausa na rukuni wadda ake samu a shafin jaridar Aminiya, mai suna 'Shafin Makaranta Hausa’. Binciken ya yi k’ok’arin fito da nau'in Hausar da shafin ke amfani da ita tare da k’ok’arin kawo bambancinta da Hausar da aka saba da ita yau da kullum, wannan shi ya k’ara tabbatar da Hausar shafin makaranta Hausa a matsayin wani nau'in karin harshe na rukuni.

https://www.amsoshi.com/2017/09/30/zumuntar-bahaushe-a-zamanin-gsm/

 

1. 
   

   0 Gabatarwa

   
   

Karin harshe wani ‘bangare ne na ilimin walwalar harshe a cikin kimiyyar harshe. Karin harshe ya danganci bambancin da ake samu na magana a cikin harshe d’aya, wanda bai kai ga ya haifar da rashin fahimta kwata-kwata ba tsakanin masu magana da harshen, sai dai ga wad’anda na ‘yan rukunin da ake amfani da shi ba. Ana iya nazarin karin harshe ko ta ‘bangaren yanki ko kuma rukuni. Karin harshe na yanki ya danganci bambancin da ake samu a cikin harshe dalilin yanki ko wurin da al'umma suke zaune. Yanki yana iya haifar da nau'in bambancin magana a cikin al'umma masu harshe d’aya, wanda shi ne ake kira karin harshe na yanki ko nahiya.

Wani nau’in karin harshe, shi ne karin harshe na rukuni. Karin harshen rukuni shi ne wanda ake samu dalilin alak’a ta rukuni a cikin al’umma. Alak’ar karin harshe na rukuni na iya kasancewa ko dai don shekaru ko matsayi ko ilimi ko addini ko jinsi ko aiki ko kuma muk’ami. Wannan rukunin shi ma ya kan haifar da nau’in magana daban, daidai rukunan da muka ambata a sama.

A wannan takardar an yi bincike mai taken: ‘Karin Harshe Na Rukuni: Nazarin Hausar Shafin Makaranta na Jaridar Aminiya’, za a duba wani nau’in Hausa na rukuni wadda ake yi a wani shafin jaridar Aminiya mai suna ‘Makaranta Hausa’. Hausar shafin makaranta ta danganci wani rukunin al’umma ke’bantattu da ke matsayin d’aliban makaranta da malaminsu mai suna ‘Dodo’. Ita wannan Hausa, d’aliban da masu karanta shafin a kai a kai ne kad’ai ke iya fahimtar abin da take nufi kai tsaye. Kalmomin da ake amfani da su a shafin na Hausa ne amma rukunin d’aliban makarantar da malaminsu ne suke tsara su, suna kuma amfani da su, kuma su ne suka fi sanin hanyar da suke bi wajen k’irk’iro kalmomin da kuma jumlolin daga cikin Hausar da aka saba da ita.

Sha’awar Hausar shafin ta la’akari da hikimomin da ke ciki, shi ya sa na yi nazari a kan Hausar a matsayin wani nau’in karin harshe na rukuni.

Bayanan da za mu yi amfani da su mun tattara su ne daga cikin jaridu goma sha uku (na makawanni 13) da ke k’unshe da shafin na ‘Makaranta Hausa’. Shafin yana fitowa a shafi na goma sha hud’u (14) na jaridar ta Aminiya wadda ake bugawa a kowane sati. Mun yi nazarin Hausar kowane shafi daga cikin wad’annan jaridun a lokacin da nake gudanar da wannan binciken.

 

• Karin Harshe Da Nau’o’insa

Masana da dama sun bayar da ma’anar karin harshe da kuma nau’o’insa. Wasu daga cikin wad’annan masanan su ne:

Skinner (1977:6) Ya kalli harshe a matsayin – ‘Wani nau’in magana a cikin harshe d’aya, wanda ba shi ne ainihin harshen ba’.

Crystal (2008:142) Ya bayyana - ‘Karin harshe ko dai na yanki ko rukuni, a matsayin wani nau’in magana na harshe wanda ake iya ganewa ta wasu kalmomi da tsarin harshe (nahawu). Y ace karin harshe mafi yawa yana da tsarin furuci ko nau’in magana da ya bambanta’.

Mathews (1977:56) kuwa ya bayyana: ‘Karin da duk wani nau’in magana na harshe musamman kuma wanda ake magana da shi a wani sashe na k’asa’.

Sani (2009: 02) ya kawo ma’anar karin harshe a matsayin; ‘Nau’i ne daga cikin  nau’o’in harshe guda wanda ake amfani da shi musamman a wani sashe na al’umma’.

Adeyanju (1989: 39) kuwa ya kawo ma’anar karin harshe- ‘A matsayin yadda mutum ya saba yin magana a cikin gungun al’umma da yawa masu harshe d’aya’.

Karin harshe ke nan yana nufin bambancin magana da ake samu tsakanin mutane masu harshe d’aya wanda bai isa ya haifar da rashin fahimta tsakaninsu ba. Duk harshen da ya bunk’asa yana iya samun karin harshe a cikinsa.

Amfani (1993:02) ya bayyana: ‘Nazarin karin harshe (dialectology) a matsayin nazarin yanayin magana na harshen mutane d’aya, wad’an da ke fahimtar juna, kuma suna da alak’ar huld’a ta magana’.

 

1.2.2 Nau’o’in Karin Harshen Hausa

Karin harshe a Hausa yana da nau’o’i guda biyu; wad’annan kuwa kamar yadda malamai suka bayyana su ne; karin harshe na yanki da kuma karin harshe na rukuni. Karin harshe na yanki, shi ne wanda ake samu dalilin wurin zama ko yankin da al’umma suka fito. A irin wannan hali yanki ko wurin zama yana iya haifar da nau’in magana na daban ga al’umma.

A Hausa kuwa akwai kare-karen harshe na yanki, kamar yadda Bergery (1934), Ahmed Da Daura (1970), Liman (1978), Malka (1978), Amfani (1980, 1993), Zaria (1992), Sani (2003), suka bayyana wad’an da suka had’a da: Kananci, Sakkwatanci, Dauranci, Zazzaganci, Bausanci, Zamfaranci, Adaranci, Damagaranci, Gobiranci, Kurfayanci, Canganci. Wad’annan kare-karen harshe kuwa ana samunsu ne a yankin Arewacin Nijeriya da Arewacin Jamhuriyar Nijar.

Wasu daga cikin malaman sun rarraba su a matsayin na sashen gabas da yamma ko manya da k’anana. Yayin da wasu suka kalle su a bisa tsarin tarihin Bayajida.

Ana iya ganin bambancin karin harshe na yanki a dukkan ‘bangarorin nazarin kimiyyar harshe tun daga ilimin furuci har i zuwa ga ilimin ma’ana.

A ‘bangaren karin harshe rukuni kuwa, Mathews (1977:344) ya bayyana cewa: ‘Nau’in magana ne, wanda ya danganci wani nau’in al’umma ko rukunin wata tawaga d’aya a cikin al’umma’.

Fagge (2001) Ya yi nazarin karin harshen Hausa na rukuni, inda ya kawo Hausar da ta shafi rukunin al’umma daban-daban wadda ta had’a da Hausar: ‘Yan siyasa da Hausar gardawa da Hausar ‘Yan k’adiriyya da Hausar ‘Yan motocin haya da Hausar ‘Yan aca’ba. Bugu da k’ari ya kawo Hausar ‘Yan Sanda da Hausar Makanikai da Hausar K’ungiyoyin addinai (‘Darik’a, Izala, Shi’a) da Hausar ‘Yan mata dai sauransu.

Yakasai (2012), Shi ma ya kawo irin wannan Hausa ta rukuni wadda ta k’unshi Hausar Kasuwanci da Hausar Sarakuna da Hausar Mawak’a da Hausar Malamai da Hausar Dattijai da Hausar Samari da ‘Yan Mata da Hausar Matan Aure da Hausar Gidana Magajiya da kuma Hausar Wurin Zaman Makoki.

 

• Karin Harshen Hausa na Rukuni

Karin harshe na rukuni, karin harshe ne wanda ya danganci bambancin magana da ake samu dalilin matsayi ko aji ko rukuni ko shekaru ko muk’ami ko jinsi ko addini ko ilimi ko kuma tarayyar aiki iri d’aya (a irin wannan yanayi ne ake samun kalmomin fannu, da suka ke’banta ga wani aiki ko ma’aikata).

Wannan nau’in karin harshe ya sha bamban da karin harshe na yanki domin ana iya samunsa a cikin al’umma ko tsakanin mutanen da suke da tarayya d’aya daga cikin abubuwan da muka ambata a baya na shekaru ko matsayi ko aji ko ilimi ko jinsi ko aiki ko muk’ami.

Bambancin da ake samu a irin wannan karin harshe na rukuni bai yi yawan na karin harshe na yanki ba, domin shi wannan ya fi shafar kalmomi ne da ‘yan guntayen jumloli wad’an da rukunin al’ummar da ke amfani da su, sun fi sauk’in fahimtar sak’on da suka k’unsa.

 

• Shafin Makaranta ‘Dodorido na Jaridar Aminiya’.

Aminiya wata shahararriyar jaridar Hausa ce, wadda kamfanin ‘Media Trust’ da ke da babban ofishinsa a Abuja, ya ke bugawa a kowane mako, jaridar tana fitowa a ranar juma’a ta kowane sati. An fara buga wannan jarida ne, a shekara ta 2006 kuma tana da shafuka arba’in (40) a cikinta.

Kamar mafi yawan jaridu, wannan jaridar ta Aminiya tana da shafukan da suka k’unshi labarai na gida da na waje da shafukan ilimantarwa da na tallace-tallace da na labaran al’ajabi da rahotanni da kuma shafukan nishad’antarwa.

Shafin da za mu yi nazari a kansa, shi ne shafin ‘Makaranta Dodorido’ na jaridar Aminiya, wanda shafi ne na, fad’akarwa da ilamantarwa da ke zuwa cikin siga ta nishad’i. Abin da ya ja hankalina akansa shi ne, Hausar da ake amfani da ita a shafin da yadda ake sarrafata da jujjuyata da k’irk’iowa da kalmomi abun ban sha’awa, har ya kai ga wanda ba d’alibin makarantar ba sai ya kasa fahimtar inda aka dosa.

Wannan shafi na ‘Makaranta Dodorido’ a kowane mako yana fitowa a shafi na goma sha hud’u (14) na jaridar Hausa ta Aminiya kuma yana da siga ta nishad’antarwa da take gudana ta hanyoyi daban-daban. Sigar tana nuna cewa ana isar da wasu sak’onni ne, na ‘yan makaranta.

Tsarin shafin ‘Makaranta Dodorido’ yana tafiya ne bisa tsarin makaranta wadda ke da d’alibai da malami d’aya da suke kira ‘Dodo’ , wannan ne, ya sa ma akwai surar wani hoto da ba a gane kowane ne ba a saman shafin, a gefen hagu, wanda ga dukkan alamu shi ne hoton ‘Dodon’  da adireshinsa na email a k’asa mai taken ‘turakundodo@yahoo.com’.

Shafin bugu da k’ari yana tafiya ne da tsarin ko dai dodon ya bayar da labari ko kuma sak’on wasik’u daga d’aliban makarantar daban-daban da ke jihohin k’asar nan, wad’an da suke rubutawa don isar da  sak’onninsu. Kowace wasik’a daga ciki tana d’auke da take, wanda ke nuna sak’on da ta k’unsa. Mafi yawan lokuta, shafin ya kan tattauna al’amurran da ake ciki a k’asar nan a cikin gugar zana da nishad’i da amfani da wasu kalmomi da jumloli na musamman.

Hausar shafin makaranta dodorido, Hausa ce ta rukunin al’umma wadda ta bambanta da Hausar da saba ji ko yi, yau da kullum. Hausa ce wadda d’aliban makarantar da malaminsu da masu sha’awar shafin wad’an dake karanta shi yau da kullum kawai ne ke gane ta. A nan muna iya kallon Hausar shafin makaranta dodorido, a matsayin karin harshe na rukunin al’umma d’aya  wanda kuma ake iya gane siffofin shi, a misalan da za mu bayar na Hausar malamin da d’aliban makarantar da za mu fito da su a cikin aikin.

 

1.5 Hausar Shafin Makaranta Na Jaridar Aminiya

Hausar Shafin makaranta dodorido ta jaridar Aminiya, wata Hausa ce ta daban wadda kalmominta da jumlolinta suka bambanta da Hausar sauran rukunin al’umma. Hausar ta k’unshi fassara wasu kalmomi da jumloli da sunaye kai tsaye tare da k’irk’ira sababbin wasu kalmomi cikin hikima da fassara wani tunanin al’umma ta hanyar k’irk’ira ta annushuwa da gugar zana. Daga cikin irin nau’in wannan Hausa ta rukuni ne ake samun irin wad’annan k’irk’irarrun kalmomi da kuma jumloli kamar haka:

Lamba	Hausar Shafin Makaranta	Ma’anarta
1.	Direban Alli	Malami
2.	Zaman Lumana	Zaman lafiya
3.	‘Yan makaranta	‘Daliban makaranta dodorido
4.	Watsattsakewa da bud’a wagegen littafi	Karatu da rubutu
5.	Taliyar indon-mami	Indomi
6.	Giz-baba	Malamin makarantar
7.	‘Yayan kaji wad’an da ba a k’yank’yashe ba	K’wayak’wai
8.	K’aramin lauje	Biyu
9.	Masu hannun riga	Mahaukata
10.	Yaron Daku	Jami’in tsaro
11.	Haramta k’wambo da bobon bokoko	Boko haram
12.	‘Dan bayan kango	Wanda ba d’an makaranta ba
13.	Shud’ad’d’iyar shekara	Shekarar bara
14.	Haurobiyawa	‘Yan Nijeriya
15.	Ankararwa	Fad’akarwa
16.	Mai-duka	Allah
17.	Jihar Jijjiga ciyawa	Jihar Jigawa
18.	Shugaba Mainasara	Shugaba Goodluck
19.	‘Dan tallafin sud’in gambiza	Kud’ad’en rarar man fetur
20.	‘Yan hannu baka hannu k’warya	Talakawa
21.	‘Yan-sa-in-d’auka-ba-tare-da-na-ajiye-ba	Barayin gwamnati
22.	‘Yan sa-mu-raba-da-shi	‘Yan kazagin gwamnati
23.	Tamola da k’afafun Haurobiyawa	Wasa da hankalin ‘Yan Nijeriya
24.	Wasoson lalita	Satar kud’in asusun gwamnati
25.	An yi walk’iya mun je gano	Mun gane gaskiya
26.	‘Yan Allah-ba-ku-mu-samu	‘Yan barandar siyasa
27.	Jatau mai-sa-in-sa	Jonathan
28.	Jan jinin Haurobiyawa	Satar dukiyar ‘yan Nijeriya
29.	Batu	Magana
30.	Jatau	Jonathan
31.	Jihar Barnawa	Borno
32.	Kwamin-titi	Kwamiti
33.	Kiran sallah da usur	Abin mamaki
34.	Direban mashahuriya makaranta	Malami
35.	Bijiro	Kawo
36.	Haurobiya	Nijeriya
37.	Niyar-jari	Nijar

 

38.	Yaren hau-hau wajen hawan sa	Harshen Hausa
39.	Bokan turai na makaranta	Malamin makaranta
40.	Yaren makaranta	Hausar shafin dodorido
41.	Damk’a shi	Kai shi
42.	Kurtun magana	Wayar Gsm
43.	Makaranta ta dodanni	Makarantar dodorido
44.	Saka-ka-tare	Sakatare
45.	Bututun batutuwa	Mai magana da yawun wasu
46.	Malam Dodo/Farfesa Dodo	Malamin makaranta
47.	Wurin k’wadago	Ma’aikata/Wurin aiki
48.	Harubja	Abuja
49.	Manja	Manaja
50.	Masu hawa sa	Hausawa
51.	Gwamnan Dabawa	Gwamnan Kano
52.	Uwar kowa	Gwamnati
53.	‘Yan ca’bawa	‘Yan aca’ba
54.	Romon makaranta	Ilimi
55.	Kwankwatsa-tsiya a birnin dabo	Kwankwasiyya a Kano
56.	‘Yan k’olaye	‘Daliban makaranta
57.	Walwalin waliyo a kan Babura	Gudu a kan babura
58.	Bagas	Gara’basar dumokurad’iyya
59.	Hana zaburar baburido	Hana aca’ba
60.	Na damo	Hak’uri
61.	Na mujiya	Idanu
62.	Saraf-na-sad’af	Sanusi Lamid’o
63.	Walata Rud’ani	Walter Rodney
64.	Kwasar gagarumar jar miya	Sata
65.	Fasko	Gano
66.	Jatau ya jona tantanin mulkinsa	Jonathan ya fara mulki
67.	Dama-dama da kurd’a-kurd’ar siyasa	Hada-hadar siyasa
68.	Shekara dubu k’aramin lauje da sili da k’aramin lauje	Shekara ta 2012
69.	Zagaye da madambaci da zagaye da manuniyar k’asa, madambaci da madambaci da manuniyar k’asa da manuniyar sama k’aramin lauje da zagaye da manuniyar k’asa	08098896209
70.	Kwashi-kwaraf	Satar kud’in gwamnati
71.	Kawun Bararrajewa	Kawu Baraje
72.	Baban-gada-gada mai burga da baragada	Gwamna Babangida
73.	Gwamna mai sunan sulalla	Gwamna Sule Lamid’o
74.	Gwamna mai kwankwatsa-tsiya a birnin dabo	Gwamna Kwankwaso
75.	Kassara al’umma	Wahalar da al’umma
76.	Ba-haurobiye	‘Dan Nijeriya
77.	Jihar Ni-na-ja	Jihar Niger
78.	Ku-zauna-a-zaure	Kazaure
79.	Garin-ja-had’e	Garin Had’eja
80.	Jam’iyya mai d’an boto da sanda jirge	Jam’iyyar PDP
81.	Shekaru sili da k’ofar hanci	Shekaru 13
82.	Arewatawa	‘Yan Arewa
83.	Kadadawa	‘Yan kudu
84.	Makarantar masu dangwala tawada a kurtu da zayyana a kan allo	Makarantar almajirai
85.	Masu laluben d’andago da d’an k’anzo	Almajirai
86.	Hauren haskaka Haurobiya	Kud’in wutar lantarki
87.	Hauren-Danja	Niger Delta
88.	Jan linzamin tsuntsayen sama	Tuk’in jigin sama
89.	‘Yan dugwi-dugwi	Yara
90.	Huta-fara	Karatun Firamare
91.	Babban kusu	Barawo

 

92.	Zagaye da kwanciyar magirbi da zagaye da manuniyar sama da kwanciyar magirbi da manuniyar k’asa tsayuwa bisa k’afa d’aya da kwanciyar magirbi da manuniyar k’asa da tsayuwa bisa k’afa d’aya da tsayuwa bisa k’afa d’aya	07067947944
93.	Loma-a-murd’e	Lamurde
94.	In-gwangwaje-in-wala	Ngozi Iweala
95.	Man tunkuza	Man fetur
96.	Ru’ba’b’ben-abban-titi	Reuben Abati
97.	Zage na ‘yan dambe	Zage damtse
98.	Kwana manuniyar k’asa	Kwana tara (9)
99.	Jihar mu-muka-fara-sharia	Jihar Zamfara
100.	Kurtun baburido	Bayan babaur
101.	Kekerido	Keke
102.	Ranar da aka haifi ‘Danladi da ‘Yar ladidiya	Ranar Lahadi
103.	Mutum mai kallon alk’ibla	Musulmi
104.	Amintattar jarida	Jaridar Aminiya
105.	Tunanin gizo da k’ok’i	K’arya
106.	Wadatacciyar sallama	Sallama
107.	Masu bautar mahalicci sili	Masu bautar Sarki d’aya
108.	Gardawan makaranta	‘Daliban makaranta
109.	Dodo uban dodanni	Malam Dodo
110.	Romon makaranta/gishirin kyautata rayuwa	Ilimi
111.	Dubannin gaisuwa	Dubun gaisuwa
112.	Malam mai almajirai	Malam Dodo
113.	Bayan kada	Kaduna
114.	Jaridar ‘Yar yau	Daily Trust
115.	Jaridar Turanci ta Gadin yana	Jaridar Guardian
117.	Fura mai kyau	Firamare

 

118.	Malam Nasara El-rusau	Malam Nasiru El-Rufa’i
119.	Gudun loko	Boyo
120.	Batu na dokin k’arfe	Batun gaskiya
121.	Jihar Bayasa	Jihar Bayelsa
122.	Janatantin	Jonathan
123.	Gazdawa	K’auyawa
124.	Man tunkuza	‘Danyen mai
125.	Damin hauro	Kud’i
126.	Barade	Sojoji
127.	K’arfe k’ofar hanci da k’ofar hanci da zagaye na yammaci	K’arfe 3:30 na yamma
128.	Baud’ad’d’en joji, Sissiliya, Gaulan Jatau	Bode George, Cesiliya, Gulak
129.	Waf-sayoyi	Websides
130.	Mafuskantar alk’iblar kad’aita mahalicci da ibada	Masallaci
131.	Makarantar dodo uban dodanni	Makaranta dodorido
132.	Ranar da aka haifi ‘Danliti	Ranar litinin
133.	Uwar jiki	Lafiya
134.	Bututun batutuwan jatau mai-sa-in-sa	Mai magana da yawun shugaban k’asa Jonathan
135.	Shugaban masu d’amara da launin fad’uwar rana a saman riga	Shugaban jami’an Civil Defence
136.	Shak’ulatin ‘bangwaro	Rik’on sakainar kashi
137.	Gidan Bokan Turai	Makaranta
138.	Masu addinin ‘Dan Amina	Musulmi
139.	Jihar Tumbin Giwa	Kano
140.	Sarki Sili	Sarki d’aya
141.	Direban buzu da jan hanjin ligidi ana bugi dutsi kwas	Malamin tsibbu mai jan tasbaha
142.	Babban rumbun adana damin hauro na k’asar Haurobiya	Babban bankin Nijeriya

 

143.	Garin Mugurgusa	Garin Gusau
144.	Masu fuskantar alk’ibla	Musulmi
145.	Jar boto	Jar hula
146.	Tudun ba ceto	Halaka
147.	Kurtun magana na Halo-Alo	Telfon
148.	Jami’ar Dodorido	Makaranta dodo
149.	Na kuturu	Hak’uri
150.	Abun da ya fi hauka rashin magani	Jahilci
151.	Ci-ba-dad’i	Wahalar da jama’a
152.	Fasa balam-balam	Fasa bam
153.	Dakarun burga	Dakarun JTF
154.	Santala K’waiduwa	Stella Odua
155.	Dokar duniya	Dokar hana fita (Curfew)
156.	‘Yan hana murk’ushe gumin ‘Dan Adam	Masu kare hak’k’in al’umma
157.	Shekara dubu k’aramin lauje da sili da k’aramin lauje da sili da k’ofar hanci	Shekara ta 2013
158.	Bututun ‘yan kwakwazo da baza na mujiya	Kafafen watsa labarai na Rediyo da Talabijin
159.	Bala-lura	Bala’i
160.	‘Yan hana bokoko	‘Yan book haram
161.	Gwamnan asusun k’arfanfana	Gwamnan babban bankin Nijeriya
162.	Mina-mina a jihar Ni-na-ja	Hada-hada a jhar Niger
163.	Tsomomuwa	Matsala
164.	Jihar Alan-goguro	Jihar Borno
165.	‘Dabi’ar kifi da kada	Wanka
166.	Kwana kwanciyar magirbi	Kwanaki bakwai (7)
167.	Takalmin malam mantau	Mantuwa
168.	Gagarumar gara’basar dama-dama da kurd’a-kurd’ar wasan Samson-siya-siya	Gajiyar Siyasa
169.	Garin gano	Ganewa
170.	Gusha-da-tsaf	Bula Tsaf
171.	Injinmiya	Injiniya
172.	Yaren kuci-kuci-hutawa	Indiyanci
173.	Turkewa a sunnar Manzo	Aure
174.	Birnin Zage-zage	Zaria
175.	‘Dan ku-ci-ku-ba-mu	Mai rok’o
176.	Masu rod’i-rod’in tufa	Sojoji
177.	Hannun zinari da k’afar gwalagwalai	Masu kud’i
178.	Mulkin mulaka’u	Mulkin wahalar da al’umma
179.	Shekara dubu k’aramin lauje da kwanciyar magirbi	Shekara ta 2007
180.	Sa’bi zarce na kusu	Sata
181.	Wasan Samson-siya-siya	Siyasa
182.	Unguwar zomo	Uzoamaka
183.	Masu d’amara da d’an taku da kulki	‘Yansanda
184.	K’aura	Canza wuri
185.	Laluban na koko	Neman abinci
186.	Hausam-fa	Shiyar Hausawa
187.	Gwarawan-fa	Gwarimpa
188.	‘Dund’ume k’ururu	Cin abinci
189.	Likimo	Kwana
190.	Karatun wasik’ar jakin dawa na da birni	K’aryar shugabanni ga talakawa
191.	Masu aika-aika	‘Yan ta’adda
192.	Kuturun hasashe	Tunanin banza
193.	Ranar da aka haifi ‘Danladi da Ladi k’aramin lauje da tsayuwa bisa k’afa d’aya	Ranar Lahadi 24 ga wata
194.	Rana ta k’aramin lauje da k’aramin lauje ga watan janye-wuri na shekara ta dubu k’aramin lauje da sili da k’ofar hanci	22-01-2013
195.	Zagaye da madambaci da sili da manuniyar sama da sili da manuniyar k’asa da tsayuwa bisa k’afa d’aya da manuniyar sama da babban lauje da sili da babban lauje	08161946515
196.	Kamfanin cefanar da labarai	Kamfanin dillancin labarai
197.	Makon da ya arce	Makon da ya gabata
198.	‘Doki-d’ora	Tsarin za’ben Nijeriya
199.	Mai martaba babban mutum mai rawani	Sarki
200.	Dirshe	Tsaya
201.	Garin dama-tumatur a jihar Yawon-bebe	Damaturu a jihar Yobe
202.	Kar’bar na koko	Kar’bar cin hanci
203.	Mutum k’aramin lauje	Talaka
204.	K’arfe k’ofar hanci da rabi	K’arfe 3:30
205.	Sana’ar zabarin baburido	Aca’ba
206.	Kumbon-tsotso	Kumbotso
207.	Taron-rauni	Tarauni
208.	K’urk’urido	A daidaita sahu
209.	Damo-da-kura-da-d’iya	Dumokurad’iyya
210.	Malala gashin tunkiya da ‘yan matsabbai	Da yawa
211.	Gandun aika-aika	Ganduje
212.	Hauro dubu d’ari babban lauje	Naira dubu d’ari biyar
213.	Damin hauro sili da zagaye da zagaye da zagaye	Naira dubu goma
214.	Babban lauje da zagaye da k’aramin lauje da zagaye da sili zagaye da babban lauje	5020105
215.	K’asashen da ja’ba da gafiya da kusu ke wandak’a	K’as ashen da ake satar dukiyar al’umma
216.	Takardun k’wadago	Takardun d’aukar aiki
217.	K’wadagon hana bak’in haure shige da fice	Immigration
218.	Tagadaz	Agadaz
219.	Jihar ‘Dakin kara	Jihar Katsina

 

220.	Masu hawa sa	Hausawa
221.	Yaren Makaranta	Hausa
222.	Masu zama bisa buzu	Malaman tsibbu
223.	Gidan malam Tunau	Makaranta
224.	Gwamnan Dabawa	Gwamnan Kano
225.	Garin da ake sa dara	Kano
226.	Angwance	Aure
227.	Gidan gaskiya	Hanya
228.	Wa-zai-zo-ya-biya	Wazobiya
229.	Sumul	K’alau
230.	K’aramin lauje da tsayuwa bisa k’afa d’aya	24
231.	‘Yan mai tako’ina	Masu hali
232.	Adon gari	Mata
233.	Ta ido	Kunya
234.	Halin amale	Handama
235.	Gobara	Lantarki
236.	In da masu yaen hau-hau wurin hawan sa suke zaune	Mazaunin Hausawa
237.	Wuri sili	Wuri d’aya
238.	Elin-zubar	Elizabeth
239.	Farcen susa	Babu dama
240.	Masu k’ask’antar da kai wajen gagara misali	Masu ibada
241.	Ta jiki	Shawara
242.	Sintirtir	Sintiri
243.	Rana ta k’aramin lauje da manuniyar k’asa ga watan mayun shekara ta dubu k’aramin lauje da sili da k’aramin lauje da sili da k’aramin lauje	29 ga watan Mayun 2012
244.	Hauro tiren taliya madambaci da gashin balama sili da zagaye da zagaye	Kud’i tiriliyon takwas da biliyan d’ari

 

 

245.	Tunar kilshi	Harakokin duniya
246.	Gaisuwa irin ta masu addinin ‘Dan Amina	Sallama
247.	Baba manga	Bamanga
248.	Tada kan adda	Ta’addanci
249.	Jami’an asusun ilimi	Shugabannin K’ungiyar ASUU
250.	Kamfanin dumdumdurundum	Kamfanin bayar da wutar lantarki
251.	Batu na ingarmar k’arfe	Gaskiya
252.	Ranar ‘yancin rani	Ranar tunawa da samun ‘yanci
253.	Baba Ojo	Obasanjo
254.	Shugaba ‘Yar bishiya	Shugaba ‘Yar adua
255.	Zaman-takewa	Cutarwa
256.	Watan Noman-baba	Watan Nuwamba
257.	Doguwar dabba	Rak’umi
258.	Watan-dashen-baba	Watan Disemba
259.	Turken rayuwa	Aure
260.	Cefanar	Sayar
261.	Masanin sisi-da-sisi	Gwamnan babban bankin Nijeriya
262.	Zari-ruga	Satar kud’in gwamnati a ‘boye
263.	Ma’aikatar kula da sufurin tsuntsayen sama	Ma’aikat kula da jiragen sama
264.	Mai gonaki otawa	Obasanjo
265.	Mace da zane	Ministar kud’i Ngozi Iweala
266.	Lalita	Asusun ajiya (Accaunt)
267.	Tayar-ladan, Malalen-suya, Indon-isiya	Thailand, Maleysia, Indonisia
268.	Niyar-jari, Zaman-gidan-buwai	Niger, Zimbabwe
269.	Damisoshin Asiya	K’asashen Asia
270.	Za’bi-sonka	Za’be
271.	Dama-dama-da-kurd’a-kurd’ar wasan Samson-siya-siya	Siyasa
272.	Samartakar kusu	Satar dukiyar gwamnati
273.	Uban-mama	Obama
274.	Amari-kowa	Amurika
275.	Dalilin-taronsu	Jaridar Daily Trust
276.	Faffale-dalili	Jaridar Peoples Daily
277.	Balon-faranti	Jaridar Blue Print
278.	Gadin-yana	Jaridar Guardian
279.	Banda-da-gadi	Jaridar Vanguard
280.	Shugaba mai Gudun-loko	Shugaba Goodluck
281.	Uwargida Damo-hak’uri	Uwargida Patient
282.	Jami’an tsoratarwa	Jami’an tsaro na had’in gwiwa
289.	Ra’ba’bas	Rivers
300.	Mai d’an taku da kulki	‘Dan sanda
301.	Tonon-Anini	Tony Anini

 

 

 

 

 

 

 

 

 

 

 

 

 

 

 

 

 

 

1.5.1 Matanin Wasu Labaran Shafin Makaranta

A wannan ‘bangare zan kawo wasu labarai da na tsakuro daga wasu shafukan ‘Makaranta Dodorido’ da ke cikin jaridar Aminiya domin ganin yadda sigar Hausar shafin take.

‘Yar makaranta ki rik’a d’umama d’umame da d’umi-d’umi

‘Bayan gaisuwa da fatar alheri ga babban direban alli na wannan makaranta da sauran d’alibai, zan taya abokiyar watsattsakewa da bud’a wagegen littafi a wannan makaranta, wacce ta angwance da yaron Giz-baba da fatan Allah ya ba su zaman lumana, kuma muna so ki nuna masa irin horon da kika samu a hannun malam wajen d’und’uma d’umame da d’umi-d’umi da kuma dafa taliyar indon-mami da ‘ya’yan kaji wad’an da ba a  k’yank’yashe ba’. Aminiya 2012, Febrairu, shafi na 14.

                                               Hausam-fa ko Gwarawan-fa?

‘A shekara ta dubu k’aramin lauje da kwanciyar magirbi kamfanin buga Amintattun jaridu k’asar Haurobiya ya yi k’aura daga unguwar Mawanawasa kan layin zaratan Zambiya zuwa garin Tako-tako, inda aka gina mana d’akin katako, mu kuwa muke laluben na koko a ciki. Tun daga waccan shekarar zuwa yau nike ta neman inda Hausam-fa take, domin na san a Harubja da akwai rukunin matsugunnin al’umma mai lak’abin ‘Gwarawan-fa’. Don haka nike ta neman ina Hausawam-fa take, ko kuma rukunin matsugunnin al’umma da aka gina a wannan katafaren birnin inda masu magana da yaren Hau-Hau wajen hawan sa ba tare da sa-in-sa suke bararraje’. Aminiya, 2012, Satumba, shafi 14.

                                                    Kada a rungumi k’adandoniya

‘Assalamu alaikum d’aliban wannan makaranta ta mu mai albarka ta Dodorido da ke farfajiyar jarida, sanin kowa ne a rayuwa kar’bar abu mai kyau ko maras kyau shi aka fi so ga mutum mai kallon alk’ibla, amma a wannan lokaci jama’a sun shiga rud’ani na rayuwa da kallon abin duniya da yin tunanin gizo da k’ok’i, yawancin mutane zuciyar su ta k’ok’e kamar k’ok’iya maza da mata suna tafiya ba kai ba gindi a harkar zamantakewa, kasuwanci da ma sauran al’amurran yau da kullum dab a a faye d’aukar k’addara ba. Kaico duniya rawar ‘yanmata na gaba ya koma baya. Hattara al’umma mu rik’a d’aukar kaddara idan mun k’i kuwa mu rungumi k’adandoniya’.

Daga: ‘Dalibar makarantar Tumbin giwa Jamila Ishak (Atinen Ziko) ta garinsu Munyi-jibir, kurtun mangana: zagaye da kwanciyar magirbi da zagaye da manuniyar sama da kwanciyar magirbi da manuniyar k’asa da tsayuwa bisa k’afa d’aya da kwanciyar magirbi da manuniyar k’asa da tsayuwa bisa k’afa d’aya da tsayuwa bisa k’afa d’aya da tsayuwa bisa k’afa d’aya’. Aminiya, 2013, Afrilu, shafi 14.

https://www.amsoshi.com/2017/09/30/nazarin-takaitawa-sakon-gsm/

1.6 Kammalawa

Wannan mak’ala mai taken ‘Karin Harshe na Rukuni: Nazarin Hausar Shafin Makaranta Na Jaridar Aminiya’ ta yi nazari a kan Hausar shafin Makaranta na jaridar Aminiya a matsayin wani nau’in karin harshe na rukuni a Hausa, wanda ya danganci wasu rukunin al’umma da suka had’u a sigar makaranta, wadda ke da malami da d’alibai. Shafin kamar yadda muka bayyana a baya ya kan fito ne, ku san kowane mako a jaridar Hausa ta Aminiya kuma ya kan tattauna al’amurran yau da kullum da suke faruwa a cikin al’umma a k’asar nan cikin nau’in wata Hausa ta daban.

Wannan Hausar kamar yadda misalan da muka bayar suka gabata, Hausa ce ta daban wadda ta ke’banta ga malami da d’aliban makarantar kawai kuma tana tafiya ne ta sigar Hausantar da kalmomi da fassara wasu tare da amfani da ayyukan wasu mutane ko takensu maimaikon sunayensu. Bugu da k’ari ana kuma k’irk’iro wasu jumloli da sassan jumlolin Hausa. Shafin musamman yana da tsarin da yake bi wajen bayyana lambobi, wanda sai k’wararre a irin wannan Hausar ne zai iya fahmitarsu. A tunani na, wannan Hausa idan aka k’ara zurfafa bincike a kanta da wasu makamantanta za ta taimaka wajen samar da nau’in wani harshe na daban wanda zai iya taimakawa wajen sadarwa a ke’ba’b’bun wurare, musamman wajen inganta sadarwa ta wasu ma’aikata na musamman ko kuma wurin ayyukan jami’an tsaro a k’asar nan. Haka ma Hausar tana iya haifar da wani karin harshe babba, wanda za a iya fad’ad’a bincike a kansa.

Akwai buk’atar a yi amfani da basira da k’warewar mutane masu irin wannan baiwar k’irk’ira a harshe domin ha’baka harshen da duban yadda za su bayar da gudummuwa ga ci gaban al’umma da k’asa baki d’aya. Wannan bincike ya nuna muna cewa harshen Hausa yana iya bunk’asa ta irin wannan hanya har a kai ya haifar da wani harshe a cikin al’umma, idan aka baiwa irin wad’annan mutane masu baiwa ta harshe goyon baya da taimakon da ya dace.

 

 

 

 

 

Manazarta

 

Abbas, N.I. (2000). ‘Zamfarci Dialect of Hausa: A Preliminary Survey’. B.A. Dissertation. DNL,             UDUS.

 

Adeyanju, T.K. (1989). Sociolinguistics And Language Education: An African Perspective.         Zaria:             Ahmadu Bello University, Press.

 

Ahmed, U. And Daura B. (1970). An Introduction to CLASSICAL HAUSA and Major Dialects. Zaria:             NNPC.

 

Amfani, A.H. (1980). ‘Nazari kan bambance-bambance Tsakanin Zazzaganci da Daidaitacciyar   Hausa ta fuskar Furuci da Fuskar K’irar Kalmomi da K’irar Jumla da Kalmomi Masu          Ma’ana ‘Daya da Nahawu’. Kundin Digirin Farko. Jami’ar Ahmadu Bello, Zaria.

 

Amfani, A.H. (1993). Aspects of Hausa Dialectology. In Research in African Languages And      Linguistics. Vol. 3. Pp 1-12

 

Aminiya, Kundi na 6 fitowa ta 34 (Juma’a 10 zuwa 16, Ga Febrairu 2012). Makaranta. Shafi na   14. Abuja: Media Trust Limited.

 

Aminiya, Kundi na 6 fitowa ta 43 (Juma’a 13 zuwa 19, Ga Afrilu 2012). Makaranta. Shafi na 14.             Abuja: Media Trust Limited.

 

Aminiya, Kundi na 6 fitowa ta 45 (Juma’a 27 zuwa 4, Ga Mayu 2012). Makaranta. Shafi na 14.   Abuja:             Media Trust Limited.

 

Aminiya, Kundi na 7 fitowa ta 013 (Juma’a 31 zuwa 6, Ga Satumba 2012). Makaranta. Shafi na 14. Abuja: Media Trust Limited.

 

Aminiya, Kundi na 7 fitowa ta 016 (Juma’a 21 zuwa 27, Ga Satumba 2012). Makaranta. Shafi na            14. Abuja: Media Trust Limited.

 

Aminiya, Kundi na 7 fitowa ta 28 (Juma’a 14 zuwa 20, Ga Disemba 2012). Makaranta. Shafi na 14. Abuja: Media Trust Limited.

 

Aminiya, Kundi na 7 fiowa ta 33 (Juma’a 18 zuwa 24, Ga Janairu 2013). Makaranta. Shafi na 14.             Abuja: Media Trust Limited.

 

Aminiya, Kundi na 7 fitowa ta 34 (Juma’a 25 zuwa 31, Ga Janairu 2013). Makaranta. Shafi na     14. Abuja: Media Trust Limited.

 

Aminiya, Kundi na 7 fitowa ta 42 (Juma’a 22 zuwa 38, Ga Maris 2013). Makaranta. Shafi na 14.             Abuja: Media Trust Limited.

 

Aminiya, Kundi na 7 fitowa ta 42 (Juma’a 12 zuwa 18, Ga Afrilu 2013). Makaranta. Shafi na 14.             Abuja: Media Trust Limited.

 

Aminiya, Kundi na 8 fitowa ta 25 (Juma’a 11 zuwa 17, Ga Oktoba 2013). Makaranta. Shafi na     14. Abuja: Media Trust Limited.

 

Aminiya, Kundi na 8 fitowa ta 25 (Juma’a 8 zuwa 14, Ga Nuwamba 2013). Makaranta. Shafi na 14. Abuja: Media Trust Limited.

 

Aminiya, Kundi na 8 fitowa ta 30 (Juma’a 20 zuwa 26, Ga Disemba 2013). Makaranta. Shafi na 14. Abuja: Media Trust Limited.

 

Bello, N. (2012). ‘Hausar Shafin Makaranta Ta Jaridar Aminiya’. Kundin Digirin Farko. Sashen Koyar da Harsunan Nijeriya, Jami’ar Usmanu Danfodiyo, Sokoto.

 

Bergery, G.P. (1934). A Hausa English  Dictionary and English Hausa Vocabulary. London:        Oxford University Press.

 

Crystal, D. (2008). A Dictionary of Linguistics and Phonetics. Sixth Edition. UK: Blackwell        Publishing.

 

Fagge, U.U. (2002). Ire-Iren Karin Harshen Hausa Na Rukuni. Kano: Benchmark Publishers        Limited.

 

Liman, M. (1978). Hausa Dialects. Zaria: Institute of Education, Ahmadu Bello University,          Zaria.

 

Malka, J.G. (1978). ‘Nazarin Bambance-bambance Da Ke Tsakanin Daidaitacciyar Hausar           (Nijeriya) da Hausar Filinge (Jamhuriyar Nijar) ta Fuskar Tsarin Furuci’. Harshe. (Vol. 1)          Zaria: Ahmadu Bello University, Zaria.

 

Mathews, P.H. (1997). Oxford Concise Dictionary of Linguistics. New York: Oxford University Press.

 

Sani, M.A.Z. (2003). Alfiyyar Mu’azu Sani 3: Karorin Harshen Hausa A Wak’e. Kano:    Benchmark Publishers Limited.

 

Skinner, N. (1977). A Grammar of Hausa For Nigerian Secondary Schools and Colleges. Zaria:   NNPC.

 

Umar, M.M. (2013). ‘Hausar Masu Kallon K’wallon K’afa A Garin Sakkwato’. Mak’alar Da Aka             Gabatar A Taron K’ara Wa Juna Sani.

 

Yakasai, S.A. (2012). Jagoran Ilmin Walwalar Harshe. Sokoto: Garkuwa Media Services.

 

Zaria, A.B. (1992). The Dialects of Hausa. Enugu: Fourth Dimension Publishing Company          Limited.