Yadda Aka Yi Wa Annabi (SAW) Jana'iza

𝐓𝐀𝐌𝐁𝐀𝐘𝐀❓

Assalamu alaiku. Tambayata ita ce lokacin da Manzon Allah (sallallahu alaihi Wa sallam) ya rasu, shin yaya aka yi masa wanka kuma shin an yi masa sallah? Kuma wai an ce da kayan jikinsa aka binne shi. Shin ya ingancin wannan magana?

𝐀𝐌𝐒𝐀❗️

Wa alaikumussalam warahmatullahi wabarakatuh.

Wafatin Manzon Allah (sallallahu alaihi wa sallam) ya faru ne a ranar Litinin, 12 ga watan Rabi'ul Awwal, shekara ta 11 bayan hijira (daidai da 8 ga watan Yuni na shekara ta 632 Miladiyya), yana da shekaru 63 a duniya.

Lokacin da aka tashi yi wa Manzon Allah (Sallallahu Alaihi Wasallam) wanka, Sahabbai sun sami saɓani kan ko za su cire masa tufafi kamar yadda ake yi wa sauran gawa, ko kuma za su bar shi da kayansa. Nan take Allah ya jarrabe su da barci, sai suka ji wata murya (wani mai kira) yana cewa: "Ku wanke Annabi yana da tufafinsa a jikinsa."

Sayyidina Aliyu bin Abi Talib ne ya yi wankan, tare da taimakon baffan Annabi, Abbas bin Abdul-Muttalib, da ’ya’yansa (Fadl da Ƙusam), da kuma Usama bin Zaid da Shukran (bawan Annabi). Sayyidina Aliyu ya kasance yana goge jikin Annabi ta saman rigar ba tare da hannunsa ya taba jikinsa kai-tsaye ba.

Bayan an gama wankansa, an cire wadancan tufafin da aka yi masa wanka da su, sai aka kafaranta (sa masa likafani) da fararen tufafi guda uku masu kyau da aka yi su daga garin Sahul (dake kasar Yemen), wadanda babu riga ko rawani a cikinsu, kamar yadda ya zo a ingantaccen hadisin Sayyida Aisha (Allah ya yarda da ita) a cikin Sahihul Bukhari da Muslim. Da wadannan likafanin aka binne shi a cikin kabarinsa.

Sannan mutane sukayi sallar janazah agareshi (sallallahu alaihi wa sallam) daya bayan daya ba tareda wani liman ya jagoranci sallar ba. Saboda girma da darajar Manzon Allah (Sallallahu Alaihi Wasallam) mutane sun riƙa shiga gidan (ɗakin Sayyida Aisha) rukuni-rukuni suna yi masa sallah daban-daban ba tare da liman ba. Maza suka fara shiga, sannan mata, sannan yara. Kowane rukuni na shiga, su yi sallah, su fito, ba tare da wani ya ja su sallah ba. (Fataawa Nur alaa al-Darb, 1/350).

WALLAHU TA'ALA A'ALAM

Zauren Fatawoyi Bisa Alkur'ani Da Sunnah.

 ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.