Hukuncin Yin Shafa A Kan Safar Kafa (Socks)

𝐓𝐀𝐌𝐁𝐀𝐘𝐀❓

Malam ya halaschin shafa a kafa yake lokacin da mutum ya sanya safa bayan ɗaura alwala. Bayan ya fita kuma sai fitsari ya kama mutum lokacin sallah, ya halatta ya yi shafa a kafarsa ya yin sake wata alwalar? An yi fitsari amma ba a cire safar ba, kuma sai a sake alwala kuma aka yi shafa sannan kuma aka yi sallah.

HUKUNCIN YIN SHAFA A KAN SAFAR ƘAFA (SOCKS)

𝐀𝐌𝐒𝐀❗️

Bisa Mazhabin Imamu Malik (Rahmatullahi alaihi) shi ya ce bai halatta a yi shafa a kan safar Ƙafa. Da kuma duk abin da aka yishi da tsumma. Shi awajensa ba a yin shafa sai dai a kan Huffi na fata, ko kuma bandeji (ga masu rauni ko miki).

Haka shima abu Haneefah ya ce bai halatta a yi shafa a kan safa ba. Sai dai daga baya ya dawo daga kan wannan fatawar kafin rasuwarsa da kwanaki uku ko bakwai.

Amma Imamu Ahmad da Imamush Shafi'iy da sauran Maluman Fiƙhu irin su Sufyanuth Thauree, Auza'iy, da sauransu, duk suna ganin halascin yin shafa a kan safa.

Imam Abu Dawud ya lissafo sunayen Manyan Sahabbai waɗanda aka ruwaito cewa sun yi shafa a kan safar Ƙafa. Acikinsu akwai Imamu Aliy bn Abi Talib (karramal Lahu wajhahu) da Ibnu Mas'ud, Al-Bara'u bn Aazib, Anas bn Malik, Abu Umamah, Sahlu bn Sa'ad, Amru bn Huraith, Sayyiduna Umar bn Al-Khattab, Abdullahi bn Abbas, Ammar bn Yasir, Bilal bn Rabah, Abdullahi bn Abi Awfa (Yardar Allah ta tabbata akansu baki ɗaya).

Amma kafin yin shafar ya halatta gareka Malamai sun gindaya sharudda kamar haka

1. Ya zamanto Safar tana da kauri yadda ba a ganin fatar Ƙafarka ta cikinta.

2. Ya zamanto ta rufe maka sawayenka har zuwa idon sawu.

3. Ya zamanto ka sanyasu ne bayan kayi tsarki kayi alwala cikakkiya.

4. Ya zamanto ka sameta ne ta hanyar halal. Imamu Ahmad ya ce bai halatta kayi da safar da aka sato, ko aka kwace daga wajen mai ita ba.

Siffar yadda akeyi kuma, za ka sanya tafin hannunka na dama daga sama, na hagu kuma daga Ƙasa sai ka shafo daga yatsunka zuwa duga-duganka.

Idan za ka sake alwala bayan fitsari ko ba-haya ko hutu ba sai ka cire safar ba. Za ka iya yin shafa akanta.

WALLAHU A'ALAM

Zauren Fatawoyi Bisa Alkur'ani Da Sunnah. Ku kasance Damu...

 ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.