Shin Miji Yana Da Damar Mayar Da Matarsa Ko Da Danginsa Ba Su Amince Ba?

𝐓𝐀𝐌𝐁𝐀𝐘𝐀❓

Assalamu alaikum. Allah gafarta malam matar abokina ce aka same ta da wani mutum, 'yan sanda ne suka kama su amma ba su samesu suna aikata wani abu ba. Amma sun kaisu office nasu sun sanya sun yi rubutu akan lallai sai sun amsa cewa sun aikata lefin zina. Ita kuma sun ce ta ba su Naira dubu hamsin (₦50,000) Sannan za su rufa mata asiri. Suka sallame ta amma ba ta bayar ba. Daga baya maganar ta fito, sai mijinta ya saketa saki ɗaya amma ta yi rantsuwar ba ta aikata komai da shi wancan mutumin ba kuma ta nemi yafiyar mijinta ya yafe mata. Amma 'yan uwan mahaifiyarsa sun ƙi amincewa ya dawo da matarsa. To Malam mene ne hukuncin wannan a addinin Musulunci? kuma wacce shawara za a ba su, domin gudun shiga wata hanyar.

𝐀𝐌𝐒𝐀❗️

Wa alaikumus salam wa rahmatullahi wa barakatuhu.

Kama matarsa da akayi ta keɓance da wani namiji wanda ba Muharrami gareta ba, tabbas wannan laifi ne babba. Kuma watakil Allah ne ya nufeta da alkhairi shi yasa asirinsu ya tonu tun kafin su aikata komai. Kuma tunda ta roki afuwar mijinta kuma ya ce ya yafe, kuma yana so zai dawo da ita amatsayin matarsa, to ai babu mai hanawa. Domin a addinin musulunci, miji ne kaɗai yake da ikon sakin matarsa ko kuma dawo da ita bayan sakin.

Kuma idan har miji ya furta cewar ya dawo da ita, babu wanda keda ikon cewa ba za ta dawo ba. Mutukar dai ba ta riga ta kammala iddarta ba. Idan ma ta kammala iddar, ai mijin nata shi yafi kowa chanchanta da ita musamman ma idan akwai haihuwa atsakaninsu.

Dangin mahaifiyar mutum, 'yan uwa ne na zumunci amma ba su da damar juya mutum bisa tilas. Musamman akan abinda shari'a ba ta ba su dama ba. Kuma musamman ma akan abinda maslahar shi mutumin ba ta cikin abinda suke ra'ayi din.

Dangin mahaifin mutum sune waliyyansa kuma sune dangi mafiya karfi. Sune awasu lokutan shari'a takan ba su damar shigowa cikin sha'anin mutum har su tirsasashi akan duk abinda suka hangi maslaha a cikinsa.

Misali kamar mutumin da ya zamanto safeehi (wato ga'bo ko marar wayo) to akan sanya igiyar aurensa ahannun waliyyinsa mafi kusanci da shi. Kamar mahaifinsa ko yayansa ko Baffansa, suna da ikon su wakilceshi su sakar masa matarsa, ko wani abinda ya yi kama da haka.

Yanzu dai tunda yana son dawowa da matarsa, to yana da cikakken ikon yin hakan ko da su wadancan din ba su amince ba. Musamman idan akwai maslaharsa ko maslahar 'ya'yansa a cikin dawowarta ɗin. Allah Ya ce

 

...وَبُعُوۡلَتُهُنَّ اَحَقُّ بِرَدِّهِنَّ فِىۡ ذٰ لِكَ اِنۡ اَرَادُوۡٓا اِصۡلَاحًا ؕ وَلَهُنَّ مِثۡلُ الَّذِىۡ عَلَيۡهِنَّ بِالۡمَعۡرُوۡفِ وَلِلرِّجَالِ عَلَيۡهِنَّ دَرَجَةٌ ؕ وَاللّٰهُ عَزِيۡزٌ حَكِيۡمٌ

Kuma mazan aurensu su ne mafiya haƙƙi ga mayar da su a cikin wancan, idan sun yi nufin gyarawa. Kuma sũ matan suna da kamar abin da yake a kansu, yadda aka sani. Kuma maza suna da wata daraja a kansu (su matan). Kuma Allah Mabuwayi ne, Mai hikima. (Suratul Baƙarah ayah ta 228).

Al Imam Ibnu katheer akarkashin wannan ayar ya ce "Ai mijin da ya saketa shi ne yafi chanchanta ya mayar da ita, mutukar dai tana cikin iddah (ba ta kammala ba). Kuma mutukar ya nufi sulhu da kuma alkhairi a cikin komawar".

WALLAHU A'ALAM.

Zauren Fatawoyi Bisa Alkur'ani Da Sunnah.

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.