Lokacin Sallar Raka'atanil-Fijir Da Wutiri

𝐓𝐀𝐌𝐁𝐀𝐘𝐀❓

Assalamu alaikum warahatullahi wa bara ka tuhu Allah ya karawa malam lafiya tambayata ita ce malam wanne lokaci ya kamata mutum ya yi raka'atanil-fijir kuma yaushe lokacin ta yake karewa? sannan dan Allah mutum ne ya kwanta da niyyar ze tashi sallar dare se bai yi wutiri ba yana nufin idan ya yi sallar cikin dare se ya yi to sai kuma ya makara bai yi sallar daren ba be kuma yi wutirin ba ga lokacin asuba ya yi to malam yazeyi da wutirin daya bari Allah ya kara lafiya

𝐀𝐌𝐒𝐀❗️

Wa alaikumussalam warahmatullahi wabarakatuh.

Lokacin yin sallar raka'atanal fajari yana farawa ne daga zarar alfijir ya keto kuma yana ƙarewa kafin a tada sallar farilla ta Asuba. Idan aka yi ta kafin alfijir ya fito, ba ta inganta a matsayin raka'atanal fajari ba. Mafi alheri da dacewa shi ne ka yi ta da wuri-wuri bayan shigar lokaci kafin a tsayar da sallar jam'i ta Asuba a masallaci. Idan ka shiga masallaci har an tada sallar Asuba (farilla), za ka shiga jam'i ne kai tsaye. Bayan an idar da sallar Asuba, za ka iya kawo ramuwarta nan take (a ra'ayin wasu malaman kamar na shafi'iyya da hanabila), ko kuma ka bari sai rana ta fito ta ɗaga sama (bayan shuruƙ).

Bukhari da Muslim da Sunan Abu Dawuda sun ruwaito cewa: Haƙiƙa ya tabba ta cewa barci ya rinjayi Manzon Allah (Sallallahu alaihi Wasallam) da Sahabbansa a wata tafiya, ba su farka ba har rana tafito sai suka sallaci rak'ata yil fajr sannan suka sallaci asuba.

A wata ruwaya akace Manzon Allah (Sallallahu alaihi Wasallam) ya umarci da a kira sallah sannan ya sallaci raatiibat (rak'ata yil fajr), sannan ya umarci ayi iƙaamah bayan haka sai ya sallaci farillah (sallar asuba).

Saboda haka ya halatta a fara yin rak'ata yil fajr kafin sallar asuba idan an rasa jam'in asuba ko da rana ta fito ne. Idan ba ka samu damar yin ta ba kafin sallar asuba, za ka iya ramawa bayan an idar da sallar asuba, ko kuma mafi kyau bayan rana ta fito ta ɗaga sama kamar lokacin sallar walaha.

Wannan nafila tana da muhimmanci sosai, domin Manzon Allah (Sallallahu Alaihi Wasallam) ya bayyana cewa: "Raka'a biyu na alfijir sun fi duniya da abin da ke cikinta alkhairi." (Sahih Muslim).

Lokacin sallar wutiri yana farawa ne da zarar an idar da sallar isha'i yana kuma karewa da ketowar alfijir saboda fadin Annabi (Sallallahu Alaihi wasallam) sallar dare raka biyu-biyuce, idan ɗayanku yana tsoran kada yakasa farkawa ya yi raka'a ɗaya saita zamto masa wutirin Abunda yasallahta. Bukhari (472)

Muslim yaruwaito hadisi daga Abu Sa'idul khudry (Allah yakara masa yarda) daga Annabi (Sallallahu Alaihi wasallam) ya ce: kuyi wutiri kafin sallar Asuba. Muslim (754)

Imamu Ahmad yafitar dahadisi daga Abu dauda da turmuzi hakim ya ingantashi daga karijata bin huzafa (Allah yakara masa yarda) Ya ce: Lallai Allah yabaku wata sallah wacce tafi muku Alkhairi samada jajayen rakuma, sai sahabbai sukace ya manzan Allah (Sallallahu Alaihi Wasallam) wacce sallah ce? sai ya ce: wutiri tsakanin sallar isha'i zuwa hudowar alfijir.

Idan Akayi kiran Sallar Assalatu Mutum baisamu damar ya yi wutiri ba zai jinkirtashi zuwa lokacin sallar walaha saiya sallaci abunda yasawwaka agareshi, raka'a biyu ko huɗu ko sama da haka, yanda Al'adarsa take, idan kasaba raka'a uku kake daddare bakasamu kayi ba darana za kayi raka'a huɗune sallama biyu, idan raka'a biyar kake to inza ka ramata da rana raka'a shida za kayi sallama uku, haka mutum zai auna yadunga lura dayanda yasaba dakuma ƙa'idar yanda zaiyi idan darana zai rama, domin Annabi (Sallallahu Alaihi wasalla) yakasance yana yin wutiri da raka'a goma sha ɗaya, idan wani Abu yashagaltar da shi daddare baiyi ba baccine ko rashin lafiya ko wani Abun, idan zai ramata darana yana yin raka'a goma sha-biyune, haka A'isha (Allah yakara mata yarda) tace kamar yanda Bukhari da Muslim Suka ruwaito wannan kuma shi ne shari'a koyi da Annabi (Sallallahu Alaihi wasallam). Maj-mu'u fatawa Bin baaz (11/300). Kamar yanda awani wajan Shaik Bin baaz yasake fada a cikin majmu'u fatawa dinsa (11/305- 308). Hakama shaik Usaimeen yabayyana a cikin maj-mu'u fatawa dinsa (14/114).

Hakika yatabba wasu jama'a daka cikin sahabbai sunce babu laifi mutum ya yi sallar wutiri bayan ketowar Alfijir harzuwa tayarda sallar asuba, daga cikinsu akwai ibnu mas'ud Nisa'i yaruwaitoshi (1667) Albani ya ingantashi a cikin sahihun nisa'iy. da Ibnu Abbas malik yaruwaito a cikin Muwadda (255) da Ubada bin Samit malik yaruwaito a cikin muwadda (257) Allah yakara yarda dasu baki ɗaya.

Shaikul Islam Ibnu taimiyyah Allah yajikansa darahama ya ce: Wanda bacci yadaukeshi baiyi wutiri ba zaiyishi daga hudowar alfijir zuwa sallar asuba, kamar yanda Abdullahi Ɗan Umar ya aikata haka da A'isha dasauransu, Abu dauda yaruwaito hadisi daga Abiy sa'idul khudry ya ce: Manzan Allah (sallallahu Alaihi wasallam) ya ce: (wanda ya yi bacci baiyi wutiri ba koya manta baiyi ba yasallaceshi idan yawayi gari koya tuna) ruwaya ta saɓa daka Ahmad shin zai rama shafa'i tareda wutiri?

Ingantacciyar magana shi ne zai ramashi tareda shafa'i, hakika ya inganta daga Annabi (sallallahu Alaihi wasallam) ya ce: Wanda bacci yadaukeshi baiyi wutiriba koya manta baiyi ba yasallaceshi idan yatuna, wannan lokacinda daya tuna koya tashi daka bacci shi ne lokacinsa) wannan yashafi sallar wajibi da kiyamullaili da wutiri da Nafiloli ratibai. Duba fatawa Kubra (2/240).

Duk wanda mutum ya yi dai-daine, idan ya rama wutiri kafin atayarda sallar asuba ya yi, idan kuma yabari sai bayan rana tafito ta washe lokacin sallar walaha shi ma babu laifi.

Abisa wannan yahalatta rama sallar wutiri bayan Sallar Asuba sai dai idan darana za ka rama to sai dai kayi shafa'i banda wutiri ba za kayi raka'a ɗaya tilo kayi sallama ba.

WALLAHU A'ALAM.

Zauren Fatawoyi Bisa Alkur'ani Da Sunnah. Ku kasance Damu...

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.